Htû̌sò̌htò̌ 45 - Kawyaw RC

Khwǐkhòmò̤mṳni̤ ata̤sò̌po̤

Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒdû̌ ta ta̤lṳhtò̌hokûnu tapwa̤ aya. Ebrephû̌yo̤nu, a kaǎ ta̤sò̌po̤ htǒoto̤to̤ ta Misakǐlè ta̤sò̌po̤ dě ta̤sò̌po̤ htǒoto̤to̤ mî̌ a ǐ kò ta̤sî̌yaphlǔ dě Kǒri akhlialè toǒ sò̌po̤ nû̌û. Dě tobǎ sò̌po̤ sǒsǒta ta̤sò̌po̤ htě ami̤ ta ta̤phota̤gînu to̤to̤. Htǒomî̌ ta̤khòmò̤ ata̤sò̌po̤.

¹ Hesò̌phlǒ htǒo a lǒbe ta yo̤ awî̤awǒ. He sò̌po̤ bǎ ta̤sò̌po̤ htǒo to̤to̤ dě khwǐ aya. He glè noǎ heyo̤ htě anî̤ sǒsǒta pwa̤khwè̌lî̤ dě asî̌jò tapwa̤ noǎ alî̤bo.

² Dě kòyòhǎkhû̌phû̌ aphû̌makhû aklanu na phasarakhlo kò, na mî̌ pwa̤ htě a hî̌bǎmo̤ hî̌bǎnî̤ mè̤mè̤̌ tapwa̤. Hǐnuakhû̌akhî, Cǒmaradû̌ howi̤ na tûjûpwa̤.

³ Kǒ kliphû̌ htě ashû̌shosî̌jò, wò̤htò̌ mò̌ na nò̌she dě na shè̌kòlo̤. Dǔlṳhtò̌ mò̌ nata̤sîrîdû̌sîrîhtû, nata̤sîrîpo̤phǎ.

⁴ Dò̌nṳ mò̌ natîsî̌, ma̤pè̤kè mò̌ pwa̤sò̌khě nanu. Ma̤kwaǐdǐdò bǎ mò̌ ta ta̤cǒta̤tè̤, ta̤shò̌lò̤sò̌, ta̤cèròtobǎ agûla̤nu tokho. Nacǔdemû dě asîrîshû̌sho a dǔlṳhtò̌ nata̤ma̤ dě asò̌gònò̤.

⁵ Napla̤ shěhtònṳbò dě pwa̤sò̌khě Khwǐ asò̌phlǒkû. Khlilèphû̌ toǒ lò̤jûkèbò dě nalo̤mo̤.

⁶ Kǒ Cǒmara nashinaga ǒyî̤tû̌ta tûjûpwa̤ talakhǎ. Na pǒǐ tû̌ta nakòyò ta ta̤cǒta̤tè̤.

⁷ Na mo̤ǐ ta̤ htě atoabǎ, na khû̌khwè ta̤ htě asǔ. Hǐnuakhû̌akhî, Cǒmara htě amî̌ na Cǒmaradû̌ wû̌lǎ na, a nodû̌khlohtûkhlo na ta nasû̌nakho dě a ǐ na ta̤mo̤sû̌mo̤sò̌.

⁸ Lǒ̤꤮ bò nahǐdopo̤to̤ toǒnu, a nṳmû̌ lò̤kèta ta̤nṳmû̌ htě kò kaǎ yǎta mǔra, alǔsa ta sǒnṳmû̌. Khwǐho htǒotoǒ kò tîwî̌wî̤ yǎta kòshòsèmè̤, ta̤ǔta̤po̤ po̤htò̌ dě Khwǐho toǒ akû dě a ma̤ sò̌le̤sò̌lò̤ na.

⁹ Mamǔ htě na bè̌dû̌ǐyǎ dě aǒ nahokû akla toǒǒnu, Khwǐ toǒ aphû̌mamǔ ǒpa dǒ. Nakhòmò̤ mamǔ ihtǒǒ dě nacǔdemû, a tîwî̌htò̌ ana̤ ta Ò̌phǐrǎga htacè̌.

¹⁰ Kǒ khòmò̤mamǔ, gana̤de, dò̌nò̌ku, gènè̤te̤mǎ, shope̤nǎǐkè mò̌ nakhlilèphû̌ ta naphakhlilènu.

¹¹ Nata̤wî̤ta̤wǒ htǒo ahtěnṳcǐnṳ Khwǐsò̌phlǒ. A mî̌ naběcǎ akhû̌akhî, bè̌dubè̌na̤ mò̌ yǎ.

¹² Turǔwî̤phû̌mǔ phî̌hènṳ sûpě tacǎ. Kòyòdû̌yò̤htò̌sa sò̌yṳ nokè̌dû̌ǐ ana̤ ta na pě.

¹³ Khòmò̤mamǔ ǒ dě Khwǐhokû, amo̤wî̤sara mè̤mè̤̌. Ahǐdo htǒonu abǒ còcè̌꤮ nû̌û ta lǔhta.

¹⁴ Kǒ Khwǐdû̌, khòmò̤mamǔ kûsǒhtò̌ hǐdo asa awî̤awǒ, kò sûnṳ nû̌û dě naǒ. Mamǔ htě a htûpwa̤tûsû̌ toǒ gûhè kû̌ nû̌û nǒkò, kò kaǎnṳdǒ asî dě na ǒǒ.

¹⁵ Kò sûhènṳ asî ta ta̤mo̤sû̌mo̤sò̌, ta̤sò̌le̤sò̌lò̤, asî hènṳ lǒkho dě Khwǐhokû.

¹⁶ Naphû̌khûsî toǒ glè htò̌htûbò hǐkǒlǒkòdû̌ dě naphiphu sîtoǒ agûla̤. Na glè nohtò̌htû asî ta pwa̤pǒ hǎkhû̌ sawî̤la̤.

¹⁷ He glè nogènè̤htò̌bǎto̤ kòyò toǒ ta na ma̤htobò ta̤ htě adû̌ayǒnu toǒ pṳ̂̌꤮ tuhtu. Hǐnuakhû̌akhî, kòyò glè htû̌sò̌ǐ na tûjûpwa̤ talakhǎ.