Htû̌sò̌htò̌ 44 - Kawyaw RC

Ta̤kwisaba ta ta̤ma̤kwaǐ aya

Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒdû̌ ta ta̤lṳhtò̌hokûnu tapwa̤ aya. Ebrephû̌yo̤nu, a kaǎ ta̤sò̌po̤ htǒo ta Misakǐlè ta̤sò̌po̤ dě ta̤sò̌po̤ htǒoto̤to̤ mî̌ a ǐ kò ta̤sî̌yaphlǔ dě Kǒri akhlialè toǒ sò̌po̤ nû̌û.

¹ Kǒ Cǒmaradû̌, dě꤮ wǐkha paphipaphusî ahtukha, nama̤ kwè̌꤮ bǎ asî hî̌tènu, asî dǒhtû̌ǐlṳ gebǎ pa dě pa gana̤de ta pana̤.

² Na wṳ̂hǎhtò̌kè khlilèhǔwa̤ toǒ ta nata̤sîrîshû̌sho, na noǒ paphipaphusî toǒ bǎ gakû bǎo. Na ma̤pî̌ma̤lṳ̂kèbò khlilèphû̌hǔwa̤ sîtoǒ, na ǐ dû̌htò̌htûhtò̌ paphiphu sîtoǒ.

³ Asî pǒǐ shiga htǒo numî̌ asî nò̌she akhû̌akhî mè̤tò̤. Asî ta̤ma̤pè̤ htǒonu bǎbǎ, asî khû̌ǎ tû̌ akhû̌akhî, mè̤tò̤tò̤. Asî ma̤mo̤ nasò̌phlǒ, nata̤sîrîshû̌sho, nakhû̌naǎ, nata̤kè̌dû̌ asî akhû̌akhî, asî ma̤pè̤ ta̤.

⁴ Na mî̌ hekhwǐ, hecǒmaradû̌ dě a ǐ Israel khlilèphû̌ ata̤ma̤pè̤.

⁵ Nakhû̌nakhî pa ma̤sima̤hǎmǎ bòmṳ̂sîglîkè tṳtṳ pwa̤khû̌khwè pa toǒ. Nami̤ akhû̌akhî, pa glè yî̤pò̌cû̌ kèbò pwa̤khû̌khwè pa toǒ.

⁶ He nǎla̤ǐ tû̌ hekhlǐ dî̌kî̌꤮ tò̤. He nò̌she꤮ mî̌ a ǐjò he ta̤ma̤pè̤ tò̤tò̤.

⁷ Na noma̤pè̤kè pa ta pwa̤sò̌khě panu. Na nosòwò̤kè kòyò htě a sò̌khěkhû̌khwè pa.

⁸ Cǒmaradû̌ ma̤pè̤kèbò pwa̤sò̌khě pa toǒ akhû̌akhî, pa htû̌sò̌ǐ yǎ dě kòhǔwa̤ lo̤mo̤ ti̤nǐ̤ mṳhǎ. Pa glè htû̌sò̌ǐ nami̤ tûjûpwa̤.

⁹ Pwǎ̤tadě khònò̤htǒo na wîkè pa, na nosòwò̤kè pa. Na htò̌shěhtu kû̌pe ta̤shě ta pakliphû̌ toǒ tò̤.

¹⁰ Na nokhlè̌gekèbò pa ta pwa̤sò̌khě pa toǒ ala̤. Kòyò htě asò̌khěkhû̌khwè pa toǒ asò̌yṳ titètè̌꤮ dě a phî̌sigwibò pata.

¹¹ Na noma̤sikèbò pa pwǐ꤮ kò ma̤si sophû̌. Na ma̤htò̌pò̌htò̌shî cû̌kèbò pa dě khlilèhǔwa̤ toǒ akla.

¹² Na shaǎpwî̤ja tû̌pwǎ nakòyò. Na kwidû̌kû̌ asî pwî̤ tò̤.

¹³ Na nopi̤jishǐcǒ sòwò̤, hî̌jîhî̌jû, luya̤bò pa ta kòyò ǒ te̤wǐte̤we̤ ta pa.

¹⁴ Dě khlilèhǔwa̤ toǒ aklanu, na nopi̤jishǐcǒ luya̤bò kò ta pa. Kòyò gènè̤pî̌tî̌ pa, a jîsutǔ ame̤htò̌ nǒlò̤ lǒkho ahǐkǒ.

¹⁵ He gènè̤sòwò̤ǐ mè̤mè̤̌ hena̤ ti̤nǐ̤ mṳhǎ. Hemi̤sǎ ǒkû̌pe kò tò̤.

¹⁶ Kò pi̤jishǐcǒ he, kò hî̌khǒhî̌wa̤ he, kò ma̤ he hǐnu dě pwa̤sò̌khě he, pwa̤ sò̌yṳ ma̤sha he toǒ alo̤mo̤ akhû̌akhî, he khòbǎ hǐnu.

¹⁷ Pa shope̤nǎǐkè na tò̤tò̤, nata̤wṳ̂dò dě pa cû̌tûlû̌khatî̤lî̤ tò̤tò̤, pwǎ̤tadě pa khòbǎbò ta̤htǒo toǒ.

¹⁸ Pasò̌phlǒ tèlè̌khǒpe nǒ tò̤. Pa cû̌khǒkè nǒ naklè̌ dǐkhò̌꤮ tò̤tò̤.

¹⁹ Pwǎ̤ta na ma̤la̤gala̤prû̌ lò̤kè pa bǎ chyǐmi̤ la̤ǒ agûla̤. Na bè̌ǒkè pa dě ta̤si la̤pǒ agûla̤.

²⁰ Pa dè shope̤nǎǐkè pacǒmaradû̌, pa dè cû̌ sabahtò̌khǒ Cǒmara ahǔwa̤ toǒ hî̌mî̌,

²¹ Cǒmaradû̌nu a sî̌yabòtû̌ pata̤gènè̤hǔ gènè̤sè̌ toǒ akhû̌akhî, ta̤htûhtò̌ htǒotoǒ mî̌ a sî̌ya nòtò̤ ya?

²² Pa gûkû̌ nakò akhû̌akhî, pa kè̌shǐshěto̤bǎ ta ta̤si ti̤nǐ̤ mṳhǎ. Kò gènè̤ pa pwǐ sophû̌ htě kò glè̌ ma̤si nû̌ûnu.

²³ Kǒ Běcǎ ta̤adû̌ ihtǒma̤ mò̌, na cû̌꤮ hǎmoǒshope̤ ma̤titè? Ihtǒma̤ mò̌, wîkè pûma̤ pa ma̤.

²⁴ Na cû̌ htû̌tiwǐkhǒkè tǒ̤ nami̤sǎ ma̤tè? Na shope̤nǎkè nò pa khòjîkhòjû htǒonu ta kò ma̤jîma̤jû pa htǒotoǒ hǒ ya?

²⁵ Pa lò̤jû dě lòkhǔpo̤kè dě hǎmǔkla. Palòkhǔ lò̤lo dě hǎkhû̌.

²⁶ Hèma̤jè mò̌ pa, na mo̤ǐ pa ta nata̤mo̤ǐ htě ahǎbòjò tò̤ htǒo akhû̌akhî, ma̤lû̌htò̌ge mò̌ pa tò̤ya.