Htû̌sò̌htò̌ 41 - Kawyaw RC

Ta̤kwisaba bǎ khòbǎ ta̤shǐta̤sha akha

Khwǐdǎ̤wi̤ ata̤sò̌po̤ htû̌sò̌ǐ. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒdû̌ ta ta̤lṳhtò̌hokûnu tapwa̤ aya.

¹ Kòyò htě a gènè̤to̤bǎ kòyò shuphǔshèwèphû̌ toǒnu, a nî̤bǎ ta̤howi̤. Bǎ a shěto̤bǎ ta ta̤pò̤ta̤sha akhanu, Cǒmara tûjûpwa̤ ma̤lû̌htò̌ge tû̌ta yǎ.

² Cǒmara tûjûpwa̤ ma̤kwaǐ, a ǒpo̤kè̌ǐkhwè̌ǐ tû̌ta nû̌û sò̌phlǒhtûpwa̤. Cǒmara tûjûpwa̤ glè howi̤ nû̌û dě gakû. Pwa̤sò̌khě nû̌û toǒ sò̌yṳma̤ hî̌tè꤮ nu a noma̤ tò̤.

³ Bǎ a shǐsha hǎmoǒtò̤ dě la̤mi̤khû̌ akhanu, Cǒmara tûjûpwa̤ glè khwè̌ǐ ma̤jè nû̌û, a gu noǒshû̌ǒmo̤wǒ gesǒ nû̌û.

⁴ He dě, he hî̌ ta, “Kǒ Cǒmara tûjûpwa̤, he ma̤sǔma̤plě na hǒ, gwèbǎǐ pû he, ma̤ ǒmo̤ǒkwǐ mò̌ he.”

⁵ Pwa̤khû̌khwè he toǒ sò̌khě dě a hî̌phû̌mò̤shî̌hto he ta, “A si pě dě a phû̌ǒkè tò̤ akhli hǎmǎkè pě.”

⁶ Bǎkhò tè꤮ bǎbǎ, kòyò tapwa̤pwa̤ dè hèǒlè kè̌shǐ ta he hî̌nu, a hè jîkhǒjîwa̤ pwǐ sû̌kho, dě a gènè̤ còcè̌ la̤hî̌pi̤ hemi̤. Bǎ a hǎhtò̌ge akhanu, a cû̌dǒbò heyo̤ pṳ̂̌꤮ tò̤glò.

⁷ Bò꤮ kòyò htě a sò̌khěkhû̌khwè he toǒnu, a dǒhǔdǒsè̌ plǒbò nû̌û ta heyo̤. A yè̤lò̤nǎ ta a glè ma̤ phû̌mò̤shî̌hto he.

⁸ A hî̌ lǒkho ta, “A ǒtṳ̂rṳ̂kè hǒ, a ihtǒbò̌pe lòtṳ̌ tò̤ hǒ.”

⁹ Hekhobǒsû̌ htě he bǒsû̌khǎkho mo̤ǐkhlo nû̌û ta he yṳǎkhlo nû̌ûnu tapwa̤ bǎbǎ, a ǎhtuohtu kû̌ ta henu tapwa̤ bǎbǎ, a sò̌yṳ shaǎkè hemi̤.

¹⁰ Pwǎ̤tadě kǒ Cǒmara tûjûpwa̤, ma̤pûhǐ he ma̤ geshǔbò̌ asî ayanu, gwèbǎǐ he, cǐihtǒpû he.

¹¹ Pwa̤khû̌khwè he toǒ ma̤pè̤jò he tò̤ akhû̌akhî, he sî̌yatû̌ ta na sò̌phlǒǒ sò̌phlǒto kû̌ta he.

¹² Hecǒhetè̤ akhû̌akhî, na ma̤jè he. Na bè̌ǒhtu kû̌ he ta na dě nalo̤mo̤ tûjûpwa̤ talakhǎ.

¹³ Htû̌sò̌ǐ Cǒmara tûjûpwa̤, amî̌ Israelkhlilèphû̌ acǒmaradû̌ htǒo tûjûpwa̤ talakhǎ nî̌. Amè̤, Amè̤.