Htû̌sò̌htò̌ 38 - Kawyaw RC

Khwǐdǎ̤wi̤ ata̤htû̌sò̌ǐ, ata̤sî̌yahtò̌ ata̤lṳhtò̌ǐ

Khwǐdǎ̤wi̤ ata̤sò̌po̤ htû̌sò̌ǐ. Bǎ akwigwèbǎǐhtò̌ Cǒmara akhanu, a sò̌po̤ ta̤sò̌po̤ htǒoto̤to̤.

¹ Kǒ Cǒmara tûjûpwa̤, bǎ na sò̌phlǒdû̌ akhanu, sǎhtǎ pûma̤ he ma̤. Bǎ na sò̌phlǒhtò̌ akha bǎbǎ, phlě pûma̤ he ma̤.

² Napla̤ hèshěnṳbò dě he we̤plǎ, na shò̌lòte̤ he.

³ Nata̤sò̌phlǒdû̌ akhû̌akhî, asha mǔsîpwî̤bò hena̤ sapwa̤bò. He ta̤sǔ akhû̌akhî, he na̤sapwa̤ toǒ shî̌shabò hǒ.

⁴ Heta̤sǔta̤plě htò̌plû̌bǐbò he sǒsǒta ta̤bǐta̤ò̌ ahtǒ. Ahtǒ tûlû̌꤮ shû̌le heya.

⁵ He ma̤takǎ tû̌ heya akhû̌akhî, he ta̤sha toǒ asobò, amihǎhtò̌bò hǒ.

⁶ Ashajîshajû mè̤mè̤̌ he akhû̌akhî, he û̌tṳglulò̤kè. Hehǎwo ti̤nǐ̤ mṳhǎ.

⁷ A shakhwǐshakhû̌ bò heshè̌kò. Asha mǔsîpwî̤bò hena̤ sapwa̤.

⁸ Hekhû̌ǎ hǎbò mṳ̂sîglîkè hǒ, he la̤gala̤prû̌ lò̤kè hǒ. He sò̌phlǒgu sò̌phlǒgè mè̤mè̤̌ akhû̌akhî, he kookasha hǒ.

⁹ Kǒ Běcǎ ta̤adû̌, he sò̌yṳ kwè̌꤮ titènu, na sî̌yabòtû̌ hǒ. Na gana̤debò tû̌ heta̤kookasha.

¹⁰ Aguagè mè̤mè̤̌ hesò̌phlǒ, hekhû̌heǎ ǒpe tò̤tò̤. Akhǐbò hemi̤sǎ.

¹¹ Heta̤sha akhû̌akhî, hekhobǒsû̌ ta hekhobǒsû̌mo̤ toǒ cû̌pa̤kèbò he. Hekhlilè phǔtînî̌ bǎbǎ, a cû̌ǒ tepheyî̤kèbò ta he.

¹² Kòyò htě a kè̌lǎ ma̤si he toǒ dò̌nǎ lǒkho htò̌glo. Kòyò htě a sò̌yṳ ma̤bǎsha he toǒ hî̌pî̌hî̌lṳ̂kèbò he. pṳ̂̌ni̤ni̤ a shokhû̌ye̤yo̤ ma̤ lòhǎlòho lǒkhopwǎ he.

¹³ Pwǎ̤tadě he sǒsǒkè ta kòyò nò̌kulǎ koo dě a gana̤depe asî ta̤hî̌bǎ tò̤. He sǒsǒkè ta kòyòpè̌ htě a hî̌shǔjòpe asî tò̤.

¹⁴ He htûhtò̌kè kòyò htě a gana̤de kû̌pe kò dǐcǎ꤮ tò̤, a htè̌shǔjò kû̌pe kò dǐcǎ꤮ tò̤nu hǒ.

¹⁵ Kǒ Cǒmara tûjûpwa̤, he ǒyṳ̂kè̌shuǐ na. Kǒ Běcǎ ta̤adû̌ mî̌ hecǒmaradû̌, na hî̌bǎgeshǔ lòtṳ̌ he pě.

¹⁶ He hî̌ ta, “Bǎ he lòkhǔlòpo̤ akhanu, nosò̌le̤sò̌lò̤ pûma̤ asî ma̤, dè mè̤tò̤mî̌ nophî̌dû̌phî̌htû pûma̤ asîna̤ dě hekhû̌ ma̤.”

¹⁷ He glè̌ htò̌tukhu lòkhǔ tikhlǐ hǒ, dě asha꤮ hènè he na̤.

¹⁸ He olò̤mèlò̤tû̌ heta̤sǔta̤plě. He sǎpla̤sǎyṳ ǐtû̌ heta̤ma̤sǔ.

¹⁹ Pwa̤sò̌khě he toǒ a ǒshǔǒmo̤, akhû̌ǎshû̌sho mè̤mè̤̌. Ta̤wi̤ta̤kè̌ ǒ dǐcǎ꤮ tò̤ pwǎ̤tadě kòyò htě a sò̌khěkhû̌khwè nòdû̌ henu a ǒplṳ̂ǒphǎ mè̤mè̤̌.

²⁰ Bǎ he gûkû̌ ta̤wî̤ta̤wǒ akhanu, asî dǒ heyo̤. He ma̤bǎ asî ta̤wî̤ta̤wǒ pwǎ̤ta asî ma̤geshǔ he ta ta̤phû̌mò̤shî̌hto.

²¹ Kǒ Cǒmara tûjûpwa̤, wîkè pûma̤ he ma̤. Kǒ hecǒmaradû̌, ǒtepheyî̤ pûma̤ ta he ma̤.

²² Kǒ Běcǎ ta̤adû̌, pwa̤ma̤lû̌htò̌ge he, hè ma̤jè phwèmò̌ he nî̌.