Htû̌sò̌htò̌ 36 - Kawyaw RC

Kòyòhǎkhû̌phû̌ ata̤sǔ ta Cǒmara ta̤wǒ

Cǒmara tûjûpwa̤ apwa̤ma̤ta̤phû̌ Khwǐdǎ̤wi̤ ata̤sò̌po̤ htû̌sò̌ǐ. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒdû̌ ta ta̤lṳhtò̌honu ta̤pwa̤ aya.

¹ Kòyò htě a ma̤takǎshǔ ta̤ toǒnu ta̤phû̌mò̤shî̌hto ǒ nû̌ûsò̌phlǒkû dě a nosho nû̌û. Asî gènè̤ lǒkho ta lo̤bǎǐsha bè̌dubè̌na̤ Cǒmara tò̤.

² A gènè̤dû̌ gènè̤htò̌yî̤ tûlû̌꤮ shû̌ ana̤ akhû̌akhî, a kè̌shǐ lò̤jòpe ata̤sǔta̤plěnu toǒ tò̤. Mè̤tò̤mî̌ a khû̌khwè lò̤jòpe ata̤sǔ tò̤tò̤.

³ Ata̤hî̌bǎhî̌shonu còcè̌꤮ ta ta̤phû̌mò̤shî̌hto, ta̤lòhǎlòho. A wîkèbò ta̤sî̌ta̤jò, ta̤ma̤wǒta̤.

⁴ Bǎ a hǎmoǒ dě la̤mi̤khû̌ akhanu bǎbǎ, a ta̤yè̤lò̤nǎ la̤ma̤ còcè̌ ta̤phû̌mò̤shî̌hto. A ma̤pe ta̤wǒ dǐcǎ꤮ tò̤. A wîkè nǒ ta̤phû̌mò̤shî̌hto tò̤tò̤.

Cǒmara tûjûpwa̤ ata̤wǒ

⁵ Kǒ Cǒmara tûjûpwa̤, nata̤mo̤ǐ htě ahǎbòjò tò̤nu adû̌ sǒsǒta mǒkhû̌. Nacǒtè̤ta nayo̤ htǒo alè̤ sǒsǒta mǒla̤.

⁶ Nata̤te̤ta̤mǎnu asǒsǒta shǒdû̌shǒhtû. Nata̤ma̤toma̤bǎnu asǒsǒta shidû̌shite̤we̤ yo̤gutṳ̌. Kǒ Cǒmara tûjûpwa̤, na kè̌ǐkhwè̌ǐ wǒ꤮ mè̤mè̤̌ kòyòhǎkhû̌phû̌ ta ta̤phû̌ta̤li̤.

⁷ Kǒ Cǒmaradû̌, nata̤mo̤ǐ htě ahǎbòjò tò̤ htǒo ale̤dû̌pwî̤htû꤮ mè̤mè̤̌. Kòyòhǎkhû̌phû̌ lǒ̤꤮ bò hèǒ to̤dû dě naǒ sǒsǒta shîmo̤ ma̤kwaǐ aphû̌ aděla̤.

⁸ Asî ǎkǒobe, shǎǎshǎo ǒlǒǒbe dě nahǐkûnu. Na ǐolǒbe asî shi ta nata̤wî̤ta̤wǒ dě nashilo̤dû̌kûnu.

⁹ Na mî̌ shipo̤htǎ htě a ǐ kò sò̌htûpwa̤ tapwa̤. Nata̤lî akhû̌akhî, pa kè̌shǐjò ta̤lî.

¹⁰ Tûrû̌꤮ mo̤ǐ sělěpo̤ pwa̤ htě a sî̌ya nanu ta nata̤mo̤ǐ htě ahǎbòjò tò̤nu. Tûrû̌꤮ ǐpa̤ nata̤cǒta̤tè̤nu ta kòyòcǒkòyòtè̤nu.

¹¹ Nohèshě pûma̤ kòyòbè̌htò̌yî̤ ana̤nu toǒ ta he ma̤. No wṳ̂khlè̌kè pûma̤ kòyòphû̌mò̤nu toǒ ta he ma̤.

¹² Kè̌mò̌ lǒkho, kòyòphû̌mò̤ lòkhǔlòpo̤bò hǒ. Kò bǎlòte̤kè asî dě asî kihtǒbò̌pe tò̤ hǒ.