Htû̌sò̌htò̌ 35 - Kawyaw RC

Khwǐdǎwi̤ ata̤kwisaba ta ta̤ma̤jè aya

Khwǐdǎ̤wi̤ ata̤sò̌po̤ htû̌sò̌ǐ.

¹ Kǒ Cǒmara tûjûpwa̤, ma̤dǐdòshǔ bǎ he kòyò htě a ma̤dǐdò henu. Shěshǔkè bǎ he kòyò htě a hèshě henu.

² Pṳ̂měǐ nagòtò̤dû̌, gòtò̤phû̌, ma̤mò̌, ma̤jèmò̌ he.

³ Pṳ̂měǐ nasòbòdû̌, sòbòpî̌tî̌. Shěshǔ mò̌ pwa̤ htě a lṳ̂shǔ he. Hî̌te̤mǎ mò̌ he ta, “He mî̌ pwa̤ma̤lû̌htò̌ge na” hǐnu.

⁴ Nosòwò̤ mi̤sǎpî̌bò kòyò htě a kè̌lǎma̤si henu. Nogetîkhî, htò̌ti̤pǐ̤te̤pe̤bò pwa̤ htě a shokhû̌ye̤yo̤ ma̤phû̌mò̤shî̌hto henu.

⁵ Nonûkèbò asî sǒsǒta htǒpî̤ nûcû̌kè dě gili̤kla. Nowṳ̂htò̌ cû̌tephekèbò asî ta Cǒmara tûjûpwa̤ atanaphû̌.

⁶ Bǎ Cǒmara tûjûpwa̤ atanaphû̌ lṳ̂pṳ̂ asî akhanu, asîklè̌ khǐsuwu bǒplîbò tû̌ta nî̌.

⁷ He ma̤sǔma̤plě nǒ asî dǐcǎ꤮ tò̤ pwǎ̤tadě a dò̌hǔnǎ he sumṳ. A phoyo̤ lǒkho hǎkû ta he glè lòte̤ aya.

⁸ Bǎ asî gènè̤to̤ hǒtò̤ akhanu, ta̤pî̌ta̤lṳ̂ ǒhtò̌khǒ tû̌ta bǎ asî nî̌. Sumṳ htě asî dò̌hǔdò̌sè̌ toǒnu, nonî̤ gesǒtû̌ yǎta asîna̤. Hǎkûyo̤ htě asî phonu, nolòte̤si gesǒtû̌ yǎta asîna̤.

⁹ Ma̤hǐnudě Cǒmara tûjûpwa̤ akhû̌akhî, he glè sò̌le̤sò̌lò̤. A ma̤lû̌htò̌ge he akhû̌akhî, he glè mo̤sû̌mo̤sò̌.

¹⁰ He glè hî̌ lǒ̤sû̌lǒ̤sò̌ ta, “Kǒ Cǒmara tûjûpwa̤, kò sǒsǒta nanu aǒ ta̤pwa̤pwa̤ ya? “Kò htě a ma̤kwaǐ pwa̤shuphǔshèwèphû̌ htě kòyòshû̌ kòyòsho ma̤nûma̤cě nû̌û sǒsǒta nanu aǒ ya? “Pwa̤ htě a ma̤lû̌htò̌ge kòyò htě kò pè̤ǎpè̤o nû̌û, kòyò shodota̤ma̤jè dě pwa̤phî̌sigwita̤ acǔdekû sǒsǒta nanu aǒ yaya?”

¹¹ Pwa̤khòlòhǎlòho hî̌ lǒkho ta he ma̤ ta̤phû̌mò̤shî̌hto. Asî yṳ̂bò he ta ta̤sǔ htě he sî̌ya nǒ dǐkhò̌꤮ tò̤ toǒ.

¹² He ma̤pwǎ ta̤wǒ pwǎ̤tadě asî ma̤phû̌mò̤ còcè̌ he. A jî꤮ mè̤mè̤̌ hesò̌phlǒ.

¹³ Bǎ asî shǐsha akhanu, he kûsǒhtò̌ hǐdobǒtûphrû. He sǎpla̤ dě he dǔǎdǔo kwisaba. Pwǎ̤tadě Cǒmara gana̤de kû̌ heta̤kwisaba tò̤.

¹⁴ He bè̌ asî pwǐ hekhobǒsû̌, hepṳhewè̤. Hehǎwo sǎpla̤ lò̤kèta kò nǎsǔhǎǐ mo̤.

¹⁵ Pwǎ̤tadě bǎ he kè̌shǐshěto̤bǎ ta ta̤pò̤ta̤sha akhanu, asî sò̌le̤sò̌lò̤bò. A ǒhtuǒplǒ te̤we̤bò he, a luya̤bò he. Kòyò htě he sî̌ya nǒ tò̤ toǒ dě a pi̤jishǐcǒ ǒkǔpe he tò̤.

¹⁶ Kòyò htě a bè̌dubè̌na̤ kû̌kò Cǒmara tò̤nu toǒ a pi̤jishǐcǒ he. A kwîbò akhû̌khi.

¹⁷ Kǒ Běcǎ ta̤adû̌, na glè kè̌ sayè̤ to̤ bò̌khòtè pětè? Ma̤lû̌htò̌ge mò̌ he dě kòyò kè̌lǎma̤pî̌ma̤lṳ̂ he acǔdekû tò̤ya. Ma̤lû̌htò̌po̤ mò̌ hesò̌phlǒhtûpwa̤ dě kòyòphû̌mò̤ lò̤ta sî̌ò̌ htǒotoǒ acǔdekû tò̤ya.

¹⁸ Dè ma̤hǐnu hî̌mî̌, he glè hî̌bwǐhî̌sîrî ǐ na dě kòyòsaprṳ̂dû̌ alo̤mo̤. He glè htû̌sò̌ǐpo̤ tû̌ na dě kòyò saprṳ̂ alo̤mo̤.

¹⁹ He dè lò̤jûkè hî̌mî̌, nosò̌wî̤ǐ sò̌le̤sò̌lò̤ pûma̤ pwa̤sò̌khě he dě a lòhǎlòhonu ma̤. He ma̤sǔ nǒ asî dǐcǎ꤮ tò̤ pwǎ̤tadě asî sò̌khěbò he. He sǎpla̤ khû̌khî, nosò̌le̤sò̌lò̤ pûma̤ asî ma̤ nî̌.

²⁰ Asî hî̌bǎ lǒkho ta̤pè̤ta̤dû tò̤. Asî shokhû̌ye̤yo̤ ma̤ lòhǎlòho pwa̤mo̤ǐ ta̤pè̤ta̤dû dě shigakû.

²¹ Asî kè̌lǎnè̌ lǒkho heta̤sǔ, dě a hî̌ ta, “Grǔ꤮, na ma̤ ta̤ htǒo pa kè̌shǐ ta pami̤sǎ.”

²² Kǒ Cǒmara tûjûpwa̤, na kè̌shǐhtobò tû̌ ta̤htǒo hǒ. Dò̌tûklû̌ pûma̤. Kǒ Běcǎ ta̤adû̌, wîkè pûma̤ he ma̤.

²³ Kǒ hecǒmaradû̌, heběcǎ ta̤adû̌, kè̌mò̌, htǒǐ kû̌mò̌ he. Ma̤mò̌, pwe̤ǐlṳmò̌ kò ta heta̤sǔ ǒ dǐcǎ꤮ tò̤nu.

²⁴ Kǒ Cǒmara tûjûpwa̤, he Cǒmaradû̌, nata̤cǒta̤tè̤ akhû̌akhî, pwe̤ǐlṳ bǎ kò ta he ta̤sǔǒ dǐcǎ꤮ tò̤ htǒonu. Nosò̌wî̤ǐ, nosò̌le̤sò̌lò̤ pûma̤ he ta pwa̤sò̌khě he toǒ ma̤.

²⁵ Nohî̌ pûma̤ asî ta, “Grǔ꤮, pata̤sò̌le̤sò̌lò̤ lǒbehtò̌ mè̤mè̤̌ hǒ,” hǐnu ma̤. Nohî̌ pûma̤ asî ta, “Pa ma̤tṳbò nû̌û hò” hǐnu ma̤ma̤.

²⁶ Kòyò htě a sò̌wî̤ǐ, sò̌le̤sò̌lò̤ bǎ he kè̌shǐshěto̤bǎ ta ta̤pò̤ta̤sha akhanu, nosòwò̤ mi̤sǎpî̌bò tû̌ asî nî̌. Kòyò htě a phî̌htò̌yî̤ ana̤ dě hekhû̌ toǒnu, nokè̌shǐshěto̤bǎ asî ta̤mi̤sǎpî̌ ta ta̤sòwò̤ nî̌.

²⁷ Kòyò htě a htǒǐ hekhû̌, a sò̌le̤sò̌lò̤ sò̌po̤mo̤mè̤ shoshobò tû̌ta nî̌. “Cǒmara tûjûpwa̤ wǒ pwî̌꤮ tènu, htû̌sò̌ǐ lǒkho yǎ. “A sò̌yṳ ta apwa̤ma̤ta̤phû̌ ǒmo̤ǒbǎ,” pṳ̂̌ plǎplǎ꤮ asî glè hî̌ lǒkho hǐnu

²⁸ Hǐnuakhû̌akhî, Cǒmara cǒtè̤ pwî̌꤮ tènu, he glè pwe̤ǐlṳ bǎ kò. He htû̌sò̌ǐ na ti̤nǐ̤ mṳhǎ pě.