Htû̌sò̌htò̌ 34 - Kawyaw RC

Htû̌sò̌ǐ Cǒmara htě a ma̤lû̌htò̌ge pa dě ta̤pò̤ta̤sha akla

Khwǐdǎ̤wi̤ ata̤sò̌po̤ htû̌sò̌ǐ. Ta̤sò̌po̤ htǒoto̤to̤ mî̌ asò̌po̤ bǎ a jîkimi ana̤ Khwǐabǐmalè̌ htě awṳ̂hǎhtò̌tephekè nû̌û dě a hǎhtò̌khlè̌tephehtokè akhanu.

¹ He glè htû̌sò̌ǐ Cǒmara tûjûpwa̤ pṳ̂̌꤮ khîpṳ̂̌kha. He htû̌sò̌ǐ ǒkǔpe yǎtò̤.

² Cǒmara tûjûpwa̤ ma̤ bǎ he akhû̌akhî, he glè htû̌sò̌ǐ yǎ. Nogana̤de kòyò htě kò ma̤jîma̤jû asînu toǒ dě nosò̌le̤sò̌lò̤ asî.

³ Pwe̤ǐlṳ plǒnûû̌ ta Cǒmara tûjûpwa̤ ata̤sîrîdû̌sîrîhtû hò꤮. Pa htû̌sò̌ǐ plǒnûû̌ ta ami̤ hò꤮.

⁴ He kwihtò̌ Cǒmara tûjûpwa̤ ata̤ma̤jè dě a kǒshǔ he. A ma̤lû̌htò̌ge he dě ta̤sò̌gònò̤ ǐsha lǒ̤꤮ bò akla.

⁵ Kòyò kè̌shunǎla̤ǐ yǎ ǒ toǒ glè sò̌le̤. Asî glè sòwò̤ mi̤sǎpî̌tî̌ dǐkhò̌꤮ tò̤.

⁶ Kòyò htě kò ma̤jîma̤jû nû̌û htǒotapwa̤ kwigwèbǎǐ Cǒmara tûjûpwa̤ dě a gana̤de nû̌ûta̤kwi. A ma̤lû̌htò̌ge nû̌û dě ata̤pò̤ta̤sha lǒ̤꤮ bò akla.

⁷ Kòyò htě a ǐsha bè̌dubè̌na̤ Cǒmara tûjûpwa̤nu, Cǒmara atanaphû̌ ǒpo̤te̤we̤, ma̤lû̌htò̌ge asî.

⁸ Cǒmara tûjûpwa̤ wǒ pwî̌꤮ tènu kè̌lǎsî̌ya dě sî̌yaphlo lǒkho. Kòyò htě a ǒtûdû nǎla̤ǐ nû̌ûnu toǒ, nî̤bǎ ta̤howi̤.

⁹ Kòyò htě a bè̌dubè̌na̤ Cǒmara tûjûpwa̤ toǒ, ǐsha lǒkho yǎ nî̌. Kòyò htě a ǐsha nû̌û la̤ toǒnu, a lo̤bǎ ta̤ dě a nî̤bǎbò.

¹⁰ Sî̌ò̌ tolophû̌ toǒ ǒti̤wi̤ sǎǎsò̌o ashǎ. Pwǎtadě kòyò htě a kè̌lǎ Cǒmara tûjûpwa̤ glè nî̤bǎbò ta̤wǒ pṳ̂̌꤮ tacǎ.

¹¹ Hè lǒkho mò̌ hephû̌mǔphû̌khû sî꤮ gana̤de lǒkho heyo̤. To ǐsha bè̌dubè̌na̤ Cǒmara tûjûpwa̤ hî̌tènu, he sû̌ǐtòwòǐ bǎ sî.

¹² Sî sò̌yṳ ta̤ǒhtûpwa̤ amo̤ ya? Mî̌ sî sò̌yṳ ǒhtûpwa̤ mṳni̤mṳsahtû htě a ǒ ta ta̤sò̌le̤sò̌lò̤nu ya?

¹³ Dè hî̌ hî̌numî̌, sè̌rè̌ǐ naplî̤ dě a bǎ hî̌bǎ ta̤phû̌mò̤shî̌hto tò̤. Htohǒtò̤ sè̌rè̌ǐpo̤ nakhû̌phě dě a bǎ hî̌bǎ lòhǎlòho tò̤.

¹⁴ Cû̌tephekè ta ta̤phû̌mò̤shî̌hto, ma̤ ta̤ htě awǒ. Jipwi̤ kè̌lǎ ta̤gûjûkabǎ dě pṳ̂gleměǐ yǎ.

¹⁵ Cǒmara tûjûpwa̤ khwè̌ǐ kòyòsò̌phlǒwǒ. A gana̤de asîta̤kwihtò̌ ta̤ma̤jè.

¹⁶ Pwǎ̤tadě Cǒmara tûjûpwa̤ ma̤dǐdòshǔkè kòyò htě a ma̤ ta̤phû̌mò̤shî̌hto. A nosibò asî dě kò gènè̤to̤pe asî dǐpwǎ̤꤮ tò̤.

¹⁷ Bǎ kòyòcǒkòyòtè̤ kwihtò̌ ta̤ma̤jè akhanu, Cǒmara tûjûpwa̤ gana̤deshǔ ata̤kwi. A ma̤lû̌htò̌ge asî dě asîta̤pò̤ta̤sha lǒ̤꤮ bò akla.

¹⁸ Cǒmara tûjûpwa̤ ǒphǔkû̌ ta kòyò htě a sò̌phlǒpî̌. A ma̤lû̌htò̌ge kòyò htě ata̤kè̌shuǐ ǒpe tò̤.

¹⁹ Kòyòsò̌phlǒwǒ tapwa̤ kè̌shǐ shěto̤bǎplṳ̂ ta̤pò̤ta̤sha pwǎ̤tadě Cǒmara tûjûpwa̤ ma̤lû̌htò̌ge yǎta ta̤nu toǒ lǒ̤꤮ bò akla.

²⁰ Cǒmara tûjûpwa̤ ma̤kwaǐ wǒ꤮ mè̤mè̤̌ akhwǐ. A nola̤ga nû̌û dǐbǒ꤮ tò̤.

²¹ Ta̤phû̌mò̤shî̌hto htě kòyòphû̌mò̤ ma̤nu toǒ, a glè ma̤sigesǒ tû̌ asî. Kòyò htě a sò̌khě kòyòsò̌phlǒwǒ toǒnu, Cǒmara glè cèrò asî.

²² Cǒmara tûjûpwa̤ htè̌ge apwa̤ma̤ta̤phû̌. Kòyò htě a hèǒtûdû ana̤ dě aǒ toǒnu, a khòbǎ ta̤cèrò tò̤.