Htû̌sò̌htò̌ 33 - Kawyaw RC

Ta̤htû̌sò̌ǐ pwa̤bǒlò̤ta̤ ta pwa̤pǒǐta̤

¹ Kǒ kòyòcǒkòyòtè̤ sî, sò̌le̤sò̌lò̤ sò̌po̤htû̌sò̌ǐ mò̌ Cǒmara tûjûpwa̤. Kòyò htě a gana̤de jûle̤phî̌yo̤ Cǒmara tûjûpwa̤ ayo̤ toǒ ata̤htû̌sò̌htò̌ a numî̌ atoabǎ.

² Dǒ lǒkho tǐtute̤gwe, htû̌sò̌hî̌bwǐsîrî Cǒmara tûjûpwa̤. Sò̌po̤htû̌sò̌ǐ yǎta ta̤ǔta̤po̤ htě apli̤ǒ aboshǐ.

³ Sò̌po̤ǐ yǎta ta̤sò̌po̤ asa. Dǒ jòwǒ tǐtute̤gwe, sò̌le̤sò̌lò̤ kaǎgusò̌po̤htò̌ lǒkho.

⁴ Cǒmara tûjûpwa̤ ale̤ayo̤ mî̌ atoabǎ atoamè̤. A cǒtè̤ ayo̤ ta a ma̤ta̤ lǒ̤꤮ bò.

⁵ Cǒmara tûjûpwa̤ mo̤ǐ ta̤cǒta̤tè̤, a cèròto cèròbǎ ta̤. Hǎkhû̌akhû̌htǒo, a lǒbe ta Cǒmara ata̤mo̤ǐ htě ahǎbòjò tò̤.

⁶ Cǒmara tûjûpwa̤ bǒlò̤ mǒkhû̌ ta ale̤. A bǒlò̤ lṳmṳ, la, shǎ ta ayo̤.

⁷ A bè̌plǒhtubò shidû̌shite̤we̤ ashi toǒ gûla̤ tò̤glò̌pa. A bè̌htubò nû̌û sǒsǒta kò bè̌plǒ sǒsǎwû̌pho dě phòkû.

⁸ Noǐshabò hǎkhû̌ tebě ta Cǒmara tûjûpwa̤. Nobè̌dubè̌na̤ ǐbò kòyòhǎkhû̌phû̌ lǒ̤꤮ bò ta a.

⁹ Bǎ a hî̌bǎ꤮ pwǎ ayo̤ akhanu, hǎkhû̌ ǒhtûhtò̌. Bǎ a hî̌lò̤꤮ pwǎ ayo̤ akhanu, ta̤ pṳ̂̌꤮ tacǎ ǒlṳhtò̌.

¹⁰ Cǒmara tûjûpwa̤ ma̤dǐdòkèbò khlilèphû̌ toǒ ta̤tîwî̌tòwònǎ. A ma̤pî̌kèbò kòyòhǎkhû̌phû̌ ata̤yè̤lò̤nǎnu.

¹¹ Cǒmara tûjûpwa̤ ata̤tîwî̌tòwònǎ numî̌, a ǒměǒgle tûjûpwa̤. Ata̤yè̤lò̤nǎ mî̌ a ǒměgle tuhtu hto tuhtu.

¹² Kòyòkhlilèphû̌ htě Cǒmara tûjûpwa̤ htû asî Cǒmara dě a wû̌htò̌ asî ta aû̌cata̤bî̌ toǒnu a nî̤bǎ ta̤howi̤.

¹³ Cǒmara tûjûpwa̤ ǒ dě mǒkhû̌ kè̌lò̤, a kè̌lò̤shǐbò kòyòhǎkhû̌phû̌.

¹⁴ A ǒ dě gògohtahtò̌yî̤khû̌ la̤pǒǐ htǒodě a kè̌lò̤ kòyò pṳ̂̌꤮ tapwa̤ dě hǎkhû̌.

¹⁵ A mî̌ pwa̤ htě a bǒlò̤ kòyòhǎkhû̌phû̌ pṳ̂̌꤮ tapwa̤ asò̌phlǒ ta̤gènè̤. A sî̌ya bòmṳ̂sîglî asî ma̤ ta̤ pṳ̂̌꤮ tacǎ.

¹⁶ Khwǐ ûpèpè̌ bǎbǎ aklisaprṳ̂dû̌ akhû̌akhî, a shěpè̤bò̌jò nǒ ta̤shěta̤pe̤ tò̤. Kliphû̌ hǐkǒdû̌ htě ajò ta̤shě ûpèpè̌ bǎbǎ, a ma̤lû̌htò̌gejò tû̌ ata̤khû̌ta̤ǎ dǐkhò̌꤮ tò̤.

¹⁷ Tîsî̌ la̤shě ta̤shě toǒ bǎbǎ, la̤nala̤ǐ asî ta la̤shěpè̤ ta̤shě ayanu aǒ tò̤. Asîkhû̌ǎ shû̌sho pwǎtadě a ma̤lû̌htò̌gejò sî tò̤.

¹⁸ Cǒmara tûjûpwa̤ khwè̌ǐ kòyò htě a ǐsha bè̌dubè̌na̤ nû̌û, kòyò htě a kè̌shu nǎla̤ǐ nû̌û ta̤mo̤ǐ htě ahǎbòjò tò̤nu.

¹⁹ A ma̤lû̌htò̌ge asî dě ta̤si akla. Bǎ gawi̤gakodû̌ akha, a bè̌ǒhtûpwa̤pe asî.

²⁰ Pa ǒpo̤kè̌shuǐ Cǒmara tûjûpwa̤. A mî̌ pwa̤ htě a ma̤jè pa, pwa̤ htě a ma̤kwaǐ pa.

²¹ Pa yṳǎ ami̤cahtǐ akhû̌akhî, pa sò̌le̤sò̌lò̤ mè̤mè̤̌.

²² Kǒ Cǒmara tûjûpwa̤, pwǐ pa kè̌shunǎla̤ǐ ta̤ dě naǒnu, nata̤mo̤ǐ htě ahǎbòjò tò̤ htǒo a ǒkû̌ tû̌ta pa nî̌.