Htû̌sò̌htò̌ 32 - Kawyaw RC

Ta̤olò̤ ta ta̤bòlû̌ ta̤sǔ

Khwǐdǎ̤wi̤ ata̤sò̌po̤ htû̌sò̌ǐ. Ebrephû̌yo̤nu, a kaǎ ta̤sò̌po̤ htǒo ta Masakǐlè ta̤sò̌po̤, dě ta̤sò̌po̤ htǒoto̤to̤ mî̌ a ǐ kò ta̤sî̌yaphlǔ.

¹ Kòyò htě Cǒmara kè̌bò̌lû̌kè nû̌û ta̤cû̌tûlû̌khatî̤lî̤, a ma̤plîkè nû̌û ta̤sǔta̤plě numî̌, a nî̤bǎ ta̤howi̤.

² Kòyò htě Cǒmara tûjûpwa̤ khwè̌mǎnǎǐpe nû̌û ta̤sǔ tò̤, ta̤lòhǎlòho ǒpe dě asò̌phlǒkû tò̤ toǒnu, a nî̤bǎ ta̤howi̤.

³ Bǎ tûklû̌klû̌ he ǒ, he olò̤ he ta̤sǔtò̤ akhanu, hekhwǐ krû̌bò. He bǎ kookasha ti̤nǐ̤ mṳhǎ.

⁴ Lṳmṳkhǐkhǐ lṳmṳshasha, na phlě he, a jî mè̤mè̤̌ he. Hekhû̌heǎ hǎbòkè, he lòdǒlòde lò̤kèta gagûrakha bǎ gagûkhanu.

⁵ He ma̤ ta̤sǔnu he pwe̤ǐlṳbò tû̌ na. He ma̤ ta̤sǔta̤plěnu he bè̌hǔ tò̤. He ǐlò̤ hesò̌phlǒ ta he olò̤bò heta̤cû̌tûlû̌khatî̤lî̤ dě Cǒmara tûjûpwa̤ alo̤mo̤. Dě na bòlû̌kèbò heta̤ma̤sǔma̤plě hǒ.

⁶ Bǎ kòyò htě asò̌phlǒcǒtè̤ ta na toǒ lo̤bǎ ta̤ akhanu, a to kwisabahtò̌ ta̤ dě naǒ. Bǎ ta̤pò̤ta̤sha pṳ̂̌꤮ tacǎ hè sǒsǒta shidû̌htò̌ akhanu, a dû̌htò̌to̤ nû̌ûǒ tò̤.

⁷ Na mî̌ hela̤ǒhǔ agûla̤. Bǎ he shěto̤bǎ ta ta̤pò̤ta̤sha akhanu, na ma̤kwaǐ he. Na noǒte̤we̤bò he ta ta̤ma̤lû̌htò̌ge ata̤sò̌po̤yi̤kǒhtò̌.

⁸ Cǒmara tûjûpwa̤ hî̌, “Na tobǎ cû̌klè̌ bǎtè tobonu, he glè yṳ̂klè̌nè̌klò sû̌ǐtòwòǐ tû̌ na. “He glè ǐsî̌yajè tû̌ na, he glè khwè̌ǐ tû̌ na.

⁹ “Ǒhtûpwa̤ sǒsǒ pûma̤ ta tîsî̌ mè̤tò̤mî̌ mòû̌lǎ htě a gana̤de kû̌kò yo̤ tò̤nu ma̤. “Na dè noěmě a ta te̤htò̌pli̤ tò̤ hî̌mî̌, na pǒǐjò yǎ tò̤.”

¹⁰ Kòyòphû̌mò̤nu toǒ mî̌ a kè̌shǐ shěto̤bǎplṳ̂ ta ta̤pò̤ta̤sha pě. Kòyò htě a yṳǎ Cǒmara tûjûpwa̤nu toǒ dě, Běcǎ ata̤mo̤ǐ htě ahǎbòjò tò̤ glè ma̤kwaǐ asî.

¹¹ Kòyòcǒkòyòtè̤ sî, sò̌le̤sò̌lò̤ mo̤sû̌mo̤sò̌ lǒkho dě Cǒmara tûjûpwa̤ akû. Kòyò sò̌phlǒcǒsò̌phlǒtè̤ toǒ, sò̌le̤sò̌lò̤ sò̌po̤htû̌sò̌htò̌ lǒkho nî̌.