Htû̌sò̌htò̌ 30 - Kawyaw RC

Khwǐdǎ̤wi̤ ata̤sò̌po̤hî̌bwǐhî̌sîrî

Khwǐdǎ̤wi̤ ata̤sò̌po̤.

¹ Kǒ Cǒmara tûjûpwa̤, na ma̤lû̌htò̌ge he. Kǒ Cǒmara tûjûpwa̤, na bè̌htò̌yî̤ he dě pwa̤sò̌khě toǒ sò̌wî̤ǐ he khû̌ tò̤ akhû̌akhî, he htû̌sò̌ǐ na.

² Kǒ Cǒmara tûjûpwa̤, heběcǎ, he kwihtò̌ nata̤ma̤jè. Dě na ma̤hǎmǎ bǎ heta̤shǐta̤sha.

³ Kǒ Cǒmara tûjûpwa̤, na phî̌ge hesò̌phlǒhtûpwa̤ dě lṳnǎkhwǎdo. He glè̌ lòte̤ dě lṳkûyo̤ akû dě na ma̤lû̌htò̌ge he.

⁴ Kǒ kòyò htě a bè̌dubè̌na̤ Cǒmara toǒ, sò̌po̤htò̌mò̌ Cǒmara tûjûpwa̤. Htû̌sò̌kò̌koǐ mò̌ ami̤cahtǐ.

⁵ A sò̌phlǒdû̌ teděsǎ, a kè̌dû̌ ǐ tûjûpwa̤. Hǎwo lṳmṳkhǐ, sò̌le̤sò̌lò̤ lṳmṳlî.

⁶ Bǎ heta ǒlǒǒbe lo̤bǎgugèpe tò̤ akhanu, he hî̌ hena̤ ta, “Ta̤jîta̤jû hèbǎjòpe he dǐkhò̌꤮ tò̤.”

⁷ Kǒ Cǒmara tûjûpwa̤, nabwǐdû̌ sîrîhtû akhû̌akhî, na bè̌ǒměgle he lò̤ta kholodû̌kholohtû. Bǎ na kè̌khǒkè he akhanu, he ǐsha sò̌gònò̤ mè̤mè̤̌.

⁸ Kǒ Cǒmara tûjûpwa̤, he kwigwèbǎǐhtò̌ na. He kwihtò̌ Běcǎ ta̤adû̌ ata̤ma̤jè dě a glè gwèbǎǐ he.

⁹ He dè sikè, mè̤tò̤mî̌ he dè lòte̤kè dě lṳkûyo̤ hî̌mî̌, a nî̤bwǐnî̤sîrî ta naya hî̌tè? Hena̤klû htě a htû lo̤hǎ htǒo a htû̌sò̌ǐjòpenò na ya? A htû̌sò̌ǐjòpenò nata̤cǒtè̤ ta yo̤ htǒo ya?

¹⁰ Kǒ Cǒmara tûjûpwa̤, gana̤depû he kwi nahtǒo, gwèbǎǐpû he. Kǒ Cǒmara tûjûpwa̤ ma̤jèpû he.

¹¹ Na htû̌lè̌tèplè̌kè bǎ heta̤sǎpla̤sǎyṳ ta ta̤kalî̌ htû̌sò̌kò̌ko hǒ. Na plû̌htò̌kè bǎ he ta̤sǎpla̤ hǐdohǐyò̤, na kûsǒhtò̌ bǎ he ta̤sò̌le̤sò̌lò̤ hǐdohǐyò̤.

¹² Hǐnuakhû̌akhî, khònò̤htǒo he glè sò̌po̤ htû̌sò̌kò̌koǐ na ta hesò̌phlǒsamabò, tûklû̌klû̌ he glè ǒjòpe tò̤. Kǒ he Běcǎ Cǒmara tûjûpwa̤, he glè hî̌bwǐhî̌sîrî na tûjûpwa̤ talakhǎ.