Htû̌sò̌htò̌ 29 - Kawyaw RC

Cǒmara tûjûpwa̤ ayo̤ pwe̤lṳ dě gili̤sǎplǎwi̤ akû

Khwǐdǎ̤wi̤ ata̤sò̌po̤.

¹ Kǒ mǒkhû̌tanaphû̌ toǒ, htû̌sò̌ǐ Cǒmara tûjûpwa̤. Htû̌sò̌ǐ ata̤sîrîdû̌sîrîhtû ta ata̤po̤ta̤phǎ.

² Dǒhtû̌ǐ Cǒmara tûjûpwa̤ ami̤ ta̤sîrîdû̌sîrîhtû. Gene̤lò̤ sabahtò̌ Cǒmara tûjûpwa̤ htě a ǒ ta ata̤lîrakhacahtǐ.

³ Cǒmara tûjûpwa̤ ayo̤ pwe̤lṳ dě shidû̌shite̤we̤kû. Cǒmaradû̌nu a sîrîdû̌sîrîhtû hî̌bǎ shû̌sho lò̤kèta mǒgomǒyi̤. Cǒmara tûjûpwa̤ yo̤pwe̤ te̤we̤tosobò dě shidû̌shite̤we̤kû.

⁴ Cǒmara tûjûpwa̤ ayo̤pwe̤ po̤phǎshû̌sho mè̤mè̤̌. Cǒmara tûjûpwa̤ ayo̤pwe̤ lǒbe sǒsǒta ta̤sîrîdû̌sîrîhtû.

⁵ Cǒmara tûjûpwa̤ ayo̤pwe̤ ma̤la̤gabò sûyûmṳ adû̌atònò. Sǒmṳdû̌ ǒ dě Lebanokholoklanu toǒ bǎbǎ Cǒmara tûjûpwa̤ ma̤lòkhǔlòpo̤bò.

⁶ A ma̤guyṳ Lebanokholokla sǒsǒta pṳ̂phaphû̌ pe̤. Sǐriokholo lè̌dě asǒsǒta pṳ̂mi̤ pe̤.

⁷ Cǒmara tûjûpwa̤ ayo̤pwe̤ ma̤htûhtò̌ tî̌lî̌bo.

⁸ Cǒmara tûjûpwa̤ ayo̤pwe̤ ma̤guyṳbò lo̤mî̌shǒkla lo̤seměkhû̌. A ma̤guyṳpo̤ kû̌dǒ Khadeshǎga lo̤mî̌shǒkla lo̤seměkhû̌khû̌.

⁹ Cǒmara tûjûpwa̤ ayo̤pwe̤ ma̤guyṳbò asǒmṳdû̌ cahtǐ. A ma̤lòsukèbò sǒlǎ dě mi̤kla. Kò lǒ̤꤮ bò ǒ dě ta̤lṳhtò̌hokûnu toǒ hî̌ lǒkho ta, “Ta̤sîrîdû̌sîrîhtû ǒkû̌ tû̌ta Cǒmara tûjûpwa̤.”

¹⁰ Cǒmara tûjûpwa̤ pǒǐ shidû̌. Cǒmara tûjûpwa̤ mî̌ Khwǐ htě a pǒǐ ta̤ tûjûpwa̤.

¹¹ Cǒmara tûjûpwa̤ glè ǐ akòyò ta̤khû̌ta̤ǎ. A howi̤homò̤ akòyò ta ta̤gûjûkabǎ pě.