Htû̌sò̌htò̌ 28 - Kawyaw RC

Ta̤kwisaba ta la̤ma̤jè aya

Khwǐdǎ̤wi̤ ata̤sò̌po̤.

¹ Kǒ Cǒmara tûjûpwa̤, helo̤dû̌, he kwigwèbǎǐ na. Jî koo pûma̤ nanò̌ku ma̤. Na dè dò̌tûklû̌ hî̌mî̌, he sǒsǒkè ta kòyò lòte̤nṳ dě lṳnǎkhwǎdonu.

² Bǎ he yṳ̂htò̌to hecǔde dě na gûla̤cahtǐ htò̌yî̤gutṳ̌꤮ akhanu, gana̤de he kwigwèbǎǐhtò̌ na ta̤ma̤jè htǒo.

³ Cèròhtu kû̌ pûma̤ he ta kòyòkhu kòyòhî, kòyòphû̌mò̤, kòyòsò̌phlǒphû̌mò̤shî̌hto htě a jîhî̌bǎmo̤hî̌bǎwǒshǔjò ahǐphòkòshî̌nu toǒ ma̤.

⁴ Ma̤geshǔ asî ta li̤ pwǐ agwa ta asî ma̤ ta̤phû̌mò̤shî̌htonu toǒ. Ma̤geshǔ asî ta li̤ pwǐ acǔde ma̤ ta̤nu. Pwǐ asî mahtonu ǐgeshǔsǒ asî ta li̤ pwǐ agwa ta asînu.

⁵ Asî sî̌yate̤mǎbò kû̌ Cǒmara tûjûpwa̤ ata̤ma̤ ta acǔde ata̤ma̤nu toǒ tò̤. Hǐnudě Cǒmara tûjûpwa̤ glè cèrò asî, a glè ma̤pî̌kèbò asî tûjûpwa̤.

⁶ Cǒmara tûjûpwa̤ gana̤de he kwihtò̌ ta̤ma̤jè akhû̌akhî, htû̌sò̌ǐ yǎ.

⁷ Cǒmara tûjûpwa̤ mî̌ hekhû̌heǎ, hegòtò̤. He nǎla̤ǐ tû̌꤮ yǎ. A ma̤jè he dě he sò̌le̤sò̌lò̤. He glè htû̌sò̌ hî̌bwǐsîrî yǎta ta̤hǎta̤wo.

⁸ Cǒmara tûjûpwa̤ mî̌ ta̤khû̌ta̤ǎ ta akòyò toǒ aya. A ma̤kwaǐ, a ma̤lû̌htò̌ge akhwǐ htě a wû̌lǎnu.

⁹ Ma̤lû̌htò̌ge nakòyò, howi̤homò̤ naû̌cata̤bî̌. Htû tû̌ pwa̤gèǐ asî sǒsǒta kò gèǐ sophû̌ tapwa̤nu, khwè̌ǐ ma̤kwaǐwǒ tû̌ asî tûjûpwa̤ nî̌.