Htû̌sò̌htò̌ 26 - Kawyaw RC

Kòyòcǒkòyòtè̤ ata̤kwisaba

Khwǐdǎ̤wi̤ ata̤sò̌po̤.

¹ Kǒ Cǒmara tûjûpwa̤, he ma̤ còcè̌ ta̤ dě acǒatè̤ akhû̌akhî, olò̤mèlò̤ bǎ dǒ he ta heta̤sǔ ǒ dǐcǎ꤮ tò̤. He nǎla̤ǐ pwǎ꤮ pǒ̤ Cǒmara tûjûpwa̤. Hesò̌phlǒ nûhtonûlò̤ nǒtò̤.

^2-3 Kǒ Cǒmara tûjûpwa̤, nata̤mo̤ǐ htě ahǎbòjò tò̤ htǒo a yṳ̂klè̌nè̌klò he dě he ǒhtûpwa̤ nata̤te̤ta̤mǎ akû akhû̌akhî, sèlèkè̌ mò̌ hesò̌phlǒ, sèlèkè̌ mò̌ hesǔshi.

⁴ He cû̌hǎnòò̌htu kû̌ta kòyòlòhǎlòhonu tò̤. He cû̌bǒsû̌htu kû̌ta kòyòjîcǒjîtè̤ ana̤nu toǒ tò̤tò̤.

⁵ He sò̌khě kòyòphû̌mò̤nu toǒ ata̤ǒhtuhî̌bǎplǒ. He hǎnòò̌htu kû̌ta kòyòkhu kòyòhî toǒ tò̤.

⁶ Kǒ Cǒmara tûjûpwa̤, he shǔbòkè hecǔde la̤dǔlṳ ta heta̤sǔta̤plě ǒtò̤. He cû̌te̤we̤ tû̌ nata̤lṳhtò̌wa̤.

⁷ He sò̌po̤htû̌sò̌ǐ hî̌bwǐhî̌sîrî yi̤kǒyi̤hta. He pwe̤ǐlṳbò nata̤ma̤ cǒklî̌kî̌ya.

⁸ Kǒ Cǒmara tûjûpwa̤, he mo̤ǐ hǐ htě na ǒǐnu ta gûla̤ htě nata̤sîrîdû̌sîrîhtû lîrakhahtò̌lṳnu tò̤glò.

⁹ Ma̤pî̌htu kû̌ pûma̤ he ta ta̤ma̤sǔphû̌nu toǒ ma̤. Ma̤sihtu kû̌ pûma̤ he ta pwa̤ma̤sima̤hǎmǎ kònu toǒ ma̤.

¹⁰ Asîcǔdenu a ma̤ còcè̌꤮ ta̤phû̌mò̤shî̌hto. Asîcǔdemûnu a lǒbebò ta ta̤phû̌bǐǎshǎ.

¹¹ He lè̌dě he ma̤pwǎ ta̤ acǒatè̤. Gwèbǎǐ dě ma̤lû̌htò̌ge mò̌ he.

¹² He ǒ dě klè̌toklè̌bǎ akû. Dě kòyòprṳ̂ho aklanu he htû̌sò̌ǐ tû̌ta Cǒmara tûjûpwa̤ pě.