Htû̌sò̌htò̌ 25 - Kawyaw RC

Ta̤kwisaba ta ta̤yṳ̂klè̌nè̌klò aya ta ta̤ma̤kwaǐ aya

Khwǐdǎ̤wi̤ ata̤sò̌po̤.

¹ Kǒ Cǒmara tûjûpwa̤, he hè naǒ dě kwisabahtò̌ na ta hesò̌phlǒsamabò.

² Hecǒmaradû̌, he nǎla̤ǐ pǒ̤꤮ pwǎ na. Nohtûhtò̌ pûma̤ ta̤sòwò̤ ta heya ma̤. Nosò̌le̤sò̌lò̤ ma̤pè̤kè pûma̤ he ta pwa̤sò̌khě he toǒ ma̤.

³ Nohtûhtò̌ pûma̤ ta̤sòwò̤ ta kòyò ǒpo̤kè̌shuǐ nanu toǒ ayama̤. Tûrû̌꤮ nosòwò̤ tû̌ kòyò htě a lòhǎlòho kònu toǒ.

⁴ Kǒ Cǒmara tûjûpwa̤, yṳ̂lṳbǎ he ta naklè̌. Sû̌ǐtòwòǐ bǎ he ta naklè̌cǒklè̌tè̤.

⁵ Na mî̌ Cǒmaradû̌ dě na ma̤lû̌htò̌ge he akhû̌akhî, yṳ̂klè̌nè̌klò he dě nata̤te̤ta̤mǎ akû, sû̌ǐtòwòǐ he. Pṳ̂̌plǎplǎ he ǒpo̤kè̌shuǐ na.

⁶ Kǒ Cǒmara tûjûpwa̤, gènè̤htò̌bǎ gesǒ nata̤gwèbǎǐ ta nata̤mo̤ǐ htě ahǎbòjò tò̤ dě na dǔlṳhtò̌hto yǎ dě wǐkhanu toǒ.

⁷ Bòlû̌kè heta̤sǔta̤plě ta heta̤ma̤takǎ na dě henějape akhanu toǒ nî̌. Kǒ Cǒmara tûjûpwa̤, pwǐ꤮ na ǒ ta ta̤mo̤ǐ htě ahǎbòjò tò̤ ta ta̤wǒ htǒonu akhû̌akhî, gènè̤htò̌nṳ he.

⁸ Cǒmara tûjûpwa̤ lǒbe ta ta̤cǒta̤tè̤, ta̤wǒ pṳ̂̌꤮ tacǎ. A yṳ̂klè̌nè̌klò bǎtû̌ ta̤ma̤sǔphû̌ ta klè̌toklè̌bǎ.

⁹ A sûcû̌to tû̌ kòyò htě ashò̌lò̤ asò̌phlǒ toǒ ta klè̌toklè̌bǎ. A sû̌ǐtòwòǐ nṳtû̌ asî pwǐ aklè̌aklò ǒnu.

¹⁰ Kòyò lǒ̤꤮ bò htě a cǒtè̤ ta Cǒmara ata̤olò̤, ata̤mǎlò̤nu toǒ mî̌ Cǒmara tûjûpwa̤ yṳ̂klè̌nè̌klò nû̌û ta ata̤mo̤ǐ htě ahǎbòjò tò̤ ta ata̤cǒtè̤ ta ayo̤.

¹¹ Kǒ Cǒmara tûjûpwa̤, Heta̤sǔta̤plě dû̌ tûlû̌꤮ shû̌ akhû̌akhî, la̤bè̌dubè̌na̤ nami̤wî̤mi̤wǒ ayanu, bòlû̌kè pû heta̤ma̤sǔ htǒonu toǒ.

¹² Mî̌ûpè tapwa̤ ǐsha bè̌dubè̌na̤ Cǒmara tûjûpwa̤ ala̤ pè? Asî tobǎ gûkû̌ klè̌ hî̌tènu a sû̌ǐtòwòǐ tû̌ asî pě.

¹³ Asî glè bwǐdû̌sîrîhtû. Aphû̌ali̤ sîtoǒ glè nî̤bǎ kû̌tû̌ shiga.

¹⁴ Cǒmara tûjûpwa̤ mî̌ pwa̤ǐsha bè̌dubè̌na̤ nû̌ûnu toǒ akhobǒsû̌. A ǐsî̌yalṳ bǎ asî ta ata̤wṳ̂dò.

¹⁵ Cǒmara tûjûpwa̤ ma̤lû̌htò̌ hekhò̌lopo̤ dě htò̌glokû akhû̌akhî, he kè̌htò̌pwǎ pǒ̤꤮ htě a ǒ pṳ̂̌khîpṳ̂̌kha.

¹⁶ Htû̌tiwǐ kè̌gekhî he dě gwèbǎǐ he. He ǒkè pǒ̤꤮ tû̌ pwǎ dě ajî꤮ mè̤mè̤̌ he.

¹⁷ Ma̤phikè bǎ hesò̌phlǒ gugè. Ma̤lû̌htò̌ge he dě ta̤jîta̤jû akû.

¹⁸ Gènè̤kè̌kû̌ bǎ heta̤jîta̤jû ta ta̤pò̤ta̤sha. Bòlû̌kèdǒ heta̤sǔta̤plě lǒ̤꤮ bò.

¹⁹ Gènè̤kè̌mò̌ lǒkho, pwa̤sò̌khě he toǒ ǒplṳ̂ mè̤mè̤̌. Asî sò̌khě mè̤mè̤̌ he.

²⁰ He ǒtûdû dě naǒ akhû̌akhî, ma̤kwaǐ he, ma̤lû̌htò̌ge he. Nohtûhtò̌ pûma̤ ta̤sòwò̤ ta heya ma̤.

²¹ He ǒpo̤kè̌shuǐ pwǎ pǒ̤꤮ dě naǒ akhû̌akhî, ta̤cǒta̤tè̤ ta ta̤wǒ ma̤kwaǐ he pě.

²² Kǒ Cǒmaradû̌, ma̤lû̌htò̌ Israelkhlilèphû̌ htǒo dě asîta̤pò̤ta̤sha lǒ̤꤮ bò akû nî̌.