Htû̌sò̌htò̌ 21 - Kawyaw RC

Khwǐdǎ̤wi̤ htû̌sò̌ǐ ta̤ma̤pè̤

Khwǐdǎ̤wi̤ ata̤sò̌po̤. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒdû̌ dě ta̤lṳhtò̌hokûnu tapwa̤ aya.

¹ Kǒ Cǒmara tûjûpwa̤, na ǐ Khwǐdû̌ ta̤shû̌ta̤sho akhû̌akhî, a sò̌le̤sò̌lò̤ mè̤mè̤̌. Na ma̤jè yǎ dě a ma̤pè̤kè pwa̤sò̌khě nû̌û akhû̌akhî, a mo̤sû̌mo̤sò̌ mè̤mè̤̌.

² Na ma̤lǒbebò tû̌ asò̌phlǒ ta̤sò̌yṳ. Na la̤lò̤kè ata̤kwigwèbǎǐ na tò̤.

³ Na ǐtû̌ yǎ ta̤howi̤ htě awî̤awǒ. Na glûhtò̌ bǎ yǎ khû̌glûhta htě kò ma̤ yǎta htaacè̌.

⁴ A kwihtò̌ na ta̤htûpwa̤ nědû̌lahtû. Na ǐyǎ mṳni̤mṳsa tûjûpwa̤ talakhǎ.

⁵ Na ǐyǎ ta̤ma̤pè̤ akhû̌akhî, kò bè̌dubè̌na̤ mè̤mè̤̌ nû̌û. Na ǐyǎ ta̤shû̌ta̤shopo̤phǎ dě alîarakha.

⁶ Nata̤howi̤ ǒkû̌ yǎ tûjûpwa̤. Na ǒplǒkû̌ yǎ akhû̌akhî, a sò̌le̤sò̌lò̤ mè̤mè̤̌.

⁷ Htǒomî̌ Khwǐdû̌ yṳǎ Cǒmara tûjûpwa̤ akhû̌akhî hǒ. Cǒmara htě adû̌ayǒkhlo kò htǒotapwa̤ mo̤ǐ nû̌û ta ta̤mo̤ǐ htě ahǎbòjò tò̤ akhû̌akhî, a gu hǎnòò̌ yî̤ mè̤mè̤̌ dě khû̌glûhtakhû̌.

⁸ Khwǐdû̌ glè pṳ̂ǐbò pwa̤khuwè nû̌û toǒ ta acǔde. A glè gîměbòtû̌ akhuwènu toǒ ta acǔdemû.

⁹ Bǎ Cǒmara tûjûpwa̤ hèǒlṳhtò̌ akha pěnu, a ma̤pî̌kèbò asî lò̤ta mî̌gèdû̌. A sò̌phlǒdû̌ lî̤pi̤sǐ akhû̌akhî, mî̌gète̤we̤bǐ kèbò asî. A gèlò̤ sibò asî.

¹⁰ Khwǐdû̌ glè ma̤sima̤hǎmǎkèbò asî akhlialè bǎ hǎkhû̌. A gu ma̤tṳkèbò asî aphû̌ali̤ hǎte̤gilò̤ toǒ dě kòyòhǎkhû̌phû̌ akla.

¹¹ Asî shokhû̌ye̤yo̤ ma̤phû̌mò̤ lǒkho Khwǐdû̌ pwǎtadě ata̤yè̤lò̤ shokhû̌ye̤yo̤ ma̤phû̌mò̤ toǒnu a behtò̌belò̤ dǐcǎ tò̤.

¹² A mṳ̂to asî ta akhlǐ akhû̌akhî, asî htû̌tiwǐ hǎhtò̌khlè̌gebò.

¹³ Kǒ Cǒmara tûjûpwa̤, pa glè htû̌sò̌ǐ nata̤sîrîshû̌sho. Pa sò̌po̤htû̌sò̌ǐ nata̤po̤ta̤phǎ pě.