Htû̌sò̌htò̌ 20 - Kawyaw RC

Ta̤kwisaba ata̤ma̤pè̤ dě Khwǐ aya

¹ Bǎ na kè̌shǐbǎ ta ta̤guta̤gè akhanu, Cǒmara tûjûpwa̤ gana̤de tû̌ta nata̤kwisaba nî̌. Yǎ̤kò acǒmara ami̤htǒo a ma̤kwaǐ tû̌ta na nî̌.

² A ǒ dě agûla̤ cahtǐ dě a ma̤jè tû̌ta na nî̌. A ǒ dě Sǐokholokhû̌ dě a ǐjè tû̌ta na nî̌.

³ A gènè̤htò̌to̤bò tû̌ta nata̤lṳta̤tò̌nu toǒ nî̌. A phî̌shǔbò tû̌ta na shû̌gè lṳhtò̌ ta̤phû̌ta̤li̤nu toǒ nî̌.

⁴ Pwǐ na sò̌yṳbònu a ǐtû̌ta na nî̌. Pwǐ na ta̤yè̤lò̤ǒnǎ tû̌ nata̤ma̤ toǒnu a behtò̌belò̤bò tû̌ta bǎ na nî̌.

⁵ Bǎ na ma̤pè̤ ta̤ akhanu, pa glè sò̌le̤sò̌lò̤ sò̌po̤mo̤mè̤. Cǒmaradû̌ ami̤ akhû̌akhî, pa glè hǔhtò̌nṳ ta̤ma̤pè̤ akhû̌pa̤la̤. Nata̤kwigwèbǎǐhtò̌ lǒ̤꤮ bò toǒnu Cǒmara tûjûpwa̤ ǐbò tû̌ta na nî̌.

⁶ Khònò̤htǒo he sî̌ya ta Cǒmara tûjûpwa̤ ma̤lû̌htò̌genṳ Khwǐ htě a wû̌htò̌nu tapwa̤. A ǒ dě mǒkhû̌ cahtǐ dě a gana̤de nû̌ûta̤kwisaba, A ma̤lû̌htò̌ge nû̌û ta acǔdemû dě asîrîpo̤phǎ.

⁷ Kòyò toǒǒ mî̌ a nǎla̤ǐtû̌ lǒkho atîsî̌lo̤ ta tîsî̌ htě ala̤htò̌shě ta̤. Pa lè̌dě, pa nǎla̤ǐpwǎ pǒ̤꤮ pacǒmara tûjûpwa̤ ami̤.

⁸ Kòyò hǐnutoǒ mî̌ a gònò̤gèglè, lòkhǔpo̤kè pě. Pa lè̌dě pa ihtǒ ǒměǒglewǒ pě.

⁹ Kǒ Cǒmara tûjûpwa̤, ma̤lû̌htò̌ Khwǐdû̌ nî̌. Bǎ pa kwihtò̌ nata̤ma̤jè akhanu, gana̤de pata̤kwi htǒo nî̌.