Htû̌sò̌htò̌ 2 - Kawyaw RC

Běcǎ Cǒmaradû̌ wû̌lǎ Khwǐ

¹ Khlilèphû̌hǔwa̤ toǒ cû̌ sò̌dû̌gûhî꤮ ma̤tè? Kòyò toǒ cû̌shokhû̌ye̤yo̤ ma̤phû̌mò̤ ta̤ ta a nòdû̌ ma̤tè?

² Hǎkhû̌ Khwǐcophǎ toǒ tîwî̌tòwònǎ ana̤ dě a glè shě Cǒmara tûjûpwa̤ ta Khwǐ htě Cǒmara wû̌lǎ nû̌û. Pwa̤pǒta̤ toǒ ǒhtuhî̌bǎplǒ nû̌û dě a glè shěplǒ ta hǎkhû̌ akhwǐcophǎ.

³ Asî hî̌lǒkho, “Pa bòphlǔkè asî pṳ̂coklomě pa. “Pa ma̤tṳkè asîsǒpli̤ htǒo hò̌.”

⁴ Běcǎ ta̤adû̌ hǎnòò̌lò̤ dě mǒkhû̌ sǎya̤ǐ asî. A hî̌tukutakǎ asî.

⁵ A sò̌phlǒdû̌ dě a sǎhtǎ asî. A sò̌phlǒdû̌ tûlû̌꤮ dě a ma̤sò̌gònò̤ ǐsha asî.

⁶ A hî̌ ta, “Khwǐ htě hewû̌lǎ yǎnu, he nohtò̌ pǒǐ yǎ dě Sǐokholo, hekholocahtǐkhû̌.”

⁷ Khwǐ htě Cǒmara tûjûpwa̤ wû̌lǎ nû̌ûnu ta̤pwa̤ hî̌, “He dǒhtû̌ǐ ta̤ htě Cǒmara tûjûpwa̤ hî̌lò̤lṳ he htǒo pě. “A hî̌ he ta, ‘Na mî̌ hephû̌khû. Khò̌ti̤ni̤, he htû napha hǒ.

⁸ “‘Kwi mò̌ he, khlilèphû̌ htǒotoǒ he glè nohtûhtò̌bò yǎta naû̌cata̤bî̌. “‘Hǎkhû̌ sawî̤la̤ glè htûbò nata.

⁹ “‘Na glè degakè asî ta nò̌po̤te̤htò̌. “‘Na glè ma̤mǔkîî̌bòkè asî pwǐ gopo̤lo̤hǎ.’”

¹⁰ Kǒ hǎkhû̌khwǐ sî, bè̌sû̌bè̌sǎkû̌ lǒkho. Kǒ hǎkhû̌khwǐcophǎ sî, sè̌rè̌ǐtû̌ sîna̤.

¹¹ Ǐsha dě bè̌dubè̌na̤ Cǒmara tûjûpwa̤, sabahtò̌ lǒkho a. Yò̤lò̤ge sîsò̌ dě ta̤gònò̤ akû.

¹² Gene̤lò̤ dě phû̌khûlo̤mo̤nu. Pěmî̌ asò̌phlǒdû̌ dě bǎ sîcû̌ klè̌lo̤ akhanu, dě ta̤gènè̤to̤tò̤ akû sîsihtò̌sumṳ hè̌. Teděsǎ akûnu asò̌phlǒdû̌ htò̌phwè mè̤mè̤̌. Kòyò hèǒtûdû ana̤ dě aǒnu a nî̤bǎ ta̤howi̤.