Htû̌sò̌htò̌ 19 - Kawyaw RC

Cǒmaradû̌ ata̤sîrîdû̌sîrîhtû dě ta̤bǒlò̤ akû

Khwǐdǎ̤wi̤ ata̤sò̌po̤. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒdû̌ dě ta̤lṳhtò̌hokûnu tapwa̤ aya.

¹ Mǒkhû̌ pwe̤ǐlṳ Cǒmaradû̌ ata̤sîrîdû̌sîrîhtû. Mǒla̤ dǒhtû̌ǐlṳ Cǒmara ata̤bǒlò̤.

² Ti̤ni̤ hto ti̤ni̤ asî pwe̤ǐlṳ sělěpo̤ anǒkò ti̤ni̤. Tasa hto tasa asî dǔlṳhtò̌ Cǒmara ata̤sî̌ta̤jò.

³ Asî hî̌bǎ nǒ dǐmû̌꤮ tò̤, a yo̤pwe̤htò̌ nǒ dǐphlǒ꤮ tò̤, gana̤de nǒ asî yo̤ dǐplǎ꤮ tò̤.

⁴ Pwǎtadě asîta̤dǒhtû̌ǐ htǒonu a lṳpîshîcû̌bò hǎkhû̌ tebě. Asî ale̤ayo̤ htǒonu a cû̌to̤bò dě hǎkhû̌ gutṳ. Dě mǒla̤nu Cǒmara ma̤htò̌ bǎ lṳmṳ ahǐ tama.

⁵ Lṳmṳ htǒonu a ǒ dě ahǐkû, a hǎhtò̌ lò̤ta khòmò̤makhû sò̌le̤sò̌lò̤ tapwa̤. Asǒsǒta pwa̤khlè̌ta̤ htě akhlè̌shokhlè̌phwè dě a sò̌le̤sò̌lò̤ glè̌ nṳkhlè̌ ta̤ kû̌ kònu tapwa̤.

⁶ A htò̌ dě mǒkòtṳ kòshî̌, a lò̤te̤ dě mǒkòtṳ gutṳ. Ta̤ htě a ǒtûdûbǐjò ta lṳmṳ htǒonu a ǒ dǐcǎ꤮ tò̤.

Cǒmara tûjûpwa̤ ata̤sû̌ta̤tòwò

⁷ Cǒmara tûjûpwa̤ ata̤sû̌ta̤tòwò mî̌ alǒabe. A ǐshû̌htò̌shohtò̌ kòsò̌phlǒ. Cǒmara tûjûpwa̤ ata̤mǎlò̤ mî̌ la̤yṳǎ te̤mǎ. A ǐ sî̌jòlîmòjò bǎ kòyòǒò̌.

⁸ Cǒmara tûjûpwa̤ ata̤sû̌ǐ numî̌ acǒatè̤. A ǐsò̌le̤sò̌lò̤htò̌ kòsò̌phlǒ. Cǒmara tûjûpwa̤ ata̤mǎlò̤ numî̌ aplîaphǔ. A ǐlîhtò̌ kò mi̤sǎphlǒ.

⁹ Ta̤ǐsha, ta̤bè̌dubè̌na̤ Cǒmara tûjûpwa̤ mî̌ awî̤awǒ. Aǒměǒgle tûjû꤮ pwa̤. Cǒmara tûjûpwa̤ ata̤cèrò htǒonu atoabǎ, acǒatè̤.

¹⁰ Htohǒtò̤ ale̤dû̌pwî̤htûkhlope ta hta. A pwî̤dû̌khlo ta hta acè̌. A shukhlope ta wè̌khû̌shi. A shukhlo ta wè̌khû̌shi acè̌.

¹¹ Nale̤nayo̤ ǐsè̌rè̌ napwa̤ma̤ta̤phû̌. Bǎ he gûǒhtûpwa̤ kû̌ pwǐ ata̤sû̌ta̤tòwò akhanu, he nî̤bǎ ta̤ awǒ.

¹² Tapwǎ̤꤮ mî̌ kò sî̌yajòbò tû̌ kò ta̤sǔ tò̤. Kǒ Cǒmara tûjûpwa̤ ma̤lû̌htò̌ge he ta ta̤sǔ htě he sî̌ya tò̤ dě he ma̤sǔnu toǒ.

¹³ Ma̤dǐdòbǐ napwa̤ma̤ta̤phû̌ mî̌ he htǒo ta ta̤sǔ htě he sî̌ya dě he ma̤nu toǒ. Nopǒ pûma̤ he ta ta̤hǐnu toǒ ma̤. Dè ma̤hî̌nu hî̌mî̌, he lû̌kè ta ta̤sǔ, dě he ma̤tûlû̌talǎpe ta̤sǔdû̌nu toǒ tò̤hǒ.

¹⁴ Kǒ Cǒmara tûjûpwa̤, he khû̌phě ata̤hî̌bǎ ta hesò̌phlǒ ata̤gènè̤ toǒnu, nototû̌ nasò̌phlǒ nobǎtû̌ nasǔshi. Na mî̌ hela̤ǒtûdû lo̤dû̌, pwa̤htè̌ge he.