Htû̌sò̌htò̌ 18 - Kawyaw RC

Khwǐdǎ̤wi̤ ata̤sò̌po̤ htû̌sò̌ǐ htě ama̤pè̤kè pwa̤sò̌khě toǒ

Cǒmara tûjûpwa̤ apwa̤ma̤ta̤phû̌ Khwǐdǎ̤wi̤ ata̤sò̌po̤. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒdû̌ dě ta̤lṳhtò̌hokûnu tapwa̤ aya. Bǎ Cǒmara tûjûpwa̤ ma̤lû̌htò̌ge nû̌û ta bò pwa̤sò̌khě nû̌û toǒ acǔdekû ta dě Khwǐsò̌lǔ acǔdekû akhanu, asò̌po̤ htû̌sò̌ǐ Cǒmara tûjûpwa̤ ta lî̤sò̌po̤ htǒoto̤to̤.

¹ Kǒ Cǒmara tûjûpwa̤, he mo̤ǐ na, na mî̌ hekhû̌heǎ.

² Cǒmara tûjûpwa̤ mî̌ helo̤dû̌, hewî̤we̤dû̌ htě atònò, pwa̤ma̤lû̌htò̌ge he, hecǒmaradû̌ mî̌ helo̤dû̌ htě he la̤ǒhǔ tûdû. A mî̌ pwa̤ma̤kwaǐ he lò̤ta gòtò̤, pwa̤sîrîshû̌sho htě a ma̤lû̌htò̌ge he, hela̤ǒhǔ htě aměagle.

³ He kwigwèbǎǐ Cǒmara tûjûpwa̤ htě kò gwa htû̌sò̌ǐ htǒotapwa̤. A ma̤lû̌htò̌ge he dě pwa̤sò̌khě he toǒ acǔdekû.

⁴ Ta̤si asǒpli̤ bǒbǐměbò he. Ta̤pî̌ta̤lṳ̂ sǒsǒta shikhodû̌ dû̌hèbǐ he.

⁵ Lṳnǎkhwǎdo asǒpli̤ bobǐměbò he hǒ. Ta̤si ahtò̌glo pṳ̂měǐ he hǒ.

⁶ Kǒ Cǒmara tûjûpwa̤, bǎ he kwigwèbǎǐ na ta̤ma̤jè akhanumî̌, he shěto̤bǎ ta ta̤guta̤gè ajîajû akhanu hǒ. Na ǒ dě nata̤lṳhtò̌hokû dě na gana̤de he yo̤ hǒ, na gana̤de hekwihtò̌ na hǒ.

⁷ Cǒmara tûjûpwa̤ sò̌phlǒdû̌ akhû̌akhî, hǎkhû̌ guyṳ, tṳtṳhtû̌dî̌ lǒ̤bò, kholokòtṳ sîtoǒmî̌ gîyî̌guyṳ awî̌wòbò.

⁸ Mî̌ khǔhtò̌ nû̌û nò̌khikû. Mî̌ plo̤htò̌ nû̌û gokû. Mî̌klû̌lî̤pi̤sǐ uhtò̌ nû̌û hò̌kû.

⁹ A htǒmo mǒkhû̌ sǒsǒta kò cǐlè̌ hǔgònu dě ahèlò̤. Poǒlṳjo khǐsuwu ǒ dě akhò̌lòpo̤la̤.

¹⁰ A dò̌nu tanaphû̌ Rǔbe dě a wi̤htò̌. A plûwi̤ ana̤ ta gili̤ pwǐ꤮ htû̌phû̌ wi̤nu.

¹¹ Cǒmara tûjûpwa̤ ǒhǔ dě poǒlṳkla. A htǒbǐwǒ ana̤ ta poǒlṳ khǐsuwu ta poǒlṳ bědû̌ htě khwè̌ju khǐsuwunu toǒ.

¹² Ta̤lîta̤rakha shěrakha hǎhtò̌ nû̌ûlo̤mo̤. Sèwèji ta mî̌plo̤ gèlî̤pî̤sǐ rakhahtò̌ bǐkèbò poǒlṳ khǐsuwu.

¹³ Cǒmara tûjûpwa̤ ǒ dě mǒkhû̌ hî̌bǎlò̤ sǒsǒta mǒgo. Cǒmara htě adû̌ayǒkhlo kò ayo̤ mî̌ apo̤te̤we̤toso.

¹⁴ A khǎ apla̤ dě pwa̤khuwè nû̌û toǒ hǎhtò̌khlè̌bò. A nolò̤ tî̌lî̌bo dě pwa̤khuwè nû̌û toǒ nûpò̌nûshîbò.

¹⁵ Kǒ Cǒmara tûjûpwa̤, bǎ na sǎhtǎ pwa̤khuwè na dě na sǎhtò̌ gili̤ dě nanò̌khikû akhanu, shidû̌shite̤we̤ sǔkhwe to̤ dě akòdǎ. Hǎkhû̌ ǒmo to̤ dě akòtṳ.

¹⁶ A ǒ dě mǒkhû̌ gûla̤htò̌yî̤, a yṳ̂lò̤ acǔde dě a pṳ̂mě he. A cǐhtò̌ mè̤mè̤̌ he dě shiyo̤sò̌go akû.

¹⁷ A ma̤lû̌htò̌genṳ he dě hekhuwè htě ashû̌asho sîtoǒ acǔdekû. Pwa̤ htě a sò̌khě he dě a khû̌ǎshû̌sho꤮ mè̤mè̤̌ ta heyanu toǒ acǔdekû.

¹⁸ Bǎ he bè̌pò̤bè̌sha akhanu, asî hèshě he. Pwǎta Cǒmara tûjûpwa̤ ma̤jè he.

¹⁹ A sûcû̌ he dě gûla̤mo̤gûla̤wǒ. A mo̤ǐ he akhû̌akhî, a ma̤lû̌htò̌ge he.

²⁰ Hecǒhetè̤ akhû̌akhî, Cǒmara tûjûpwa̤ ǐbwǐǐsîrî he. Heta̤sǔta̤plě ǒ dǐcǎ꤮ tò̤ akhû̌akhî, a howi̤homò̤ he.

²¹ He jûle̤phî̌yo̤ Cǒmara tûjûpwa̤ ata̤sû̌ta̤tòwò, he htû̌tiwǐ cû̌pa̤kè ta hecǒmaradû̌ aklè̌ tò̤ akhû̌akhî, a howi̤ he.

²² He jûle̤phî̌yo̤ gûma̤kû̌ bò꤮ ata̤yṳ̂klè̌yṳ̂klònu toǒ. He cû̌tûlû̌khatî̤lî̤kè ta ata̤sû̌ta̤tòwò toǒ tò̤.

²³ Dě Cǒmara tûjûpwa̤ alo̤mo̤nu he lû̌kè ta ta̤sǔ. He sè̌rè̌ǐ hena̤ ta ma̤ta̤sǔta̤plě hǒ.

²⁴ Cǒmara tûjûpwa̤htǒo sî̌ya ta hecǒhetè̤, he ta̤sǔta̤plě ǒtò̤ akhû̌akhî, a ǐ he akhû̌akǎ hǒ.

²⁵ Na cǒtè̤ ta kòyò htě a cǒtè̤ ta nanu toǒ. Na dǔlṳ nata̤cǒta̤tè̤ ta kòyò htě ata̤sǔ ǒ dǐcǎ꤮ tò̤nu toǒ.

²⁶ Na dǔlṳ nata̤wî̤ta̤cò ta kòyò htě a sò̌phlǒ wî̤cò. Na shěshǔ kòyò htě asò̌phlǒ phû̌mò̤shî̌hto.

²⁷ Na ma̤lû̌htò̌ge kòyò htě ashò̌lò̤ asò̌phlǒ. Na shò̌lò̤kè kòyò htě a phî̌dû̌phî̌htò̌yî̤ ana̤.

²⁸ Kǒ Cǒmara tûjûpwa̤, na dǎlî bǎ he mî̌ko. Kǒ Cǒmaradû̌, ta̤khî̌ta̤lo̤htǒo na ma̤lîhtò̌ bǎ he hǒ.

²⁹ Na ma̤jè he akhû̌akhî, he shěpè̤ he khuwè hǒ. He htò̌nṳ tûlû̌bò̌ hekhuwè toǒ awî̤we̤dû̌ hǒ.

³⁰ Cǒmaradû̌ aklè̌aklò numî̌ alǒbe. Cǒmara tûjûpwa̤ ale̤ayo̤ htǒonu asǔ dǐcǎ꤮ tò̤. Kòyò htě a hèǒ tûdû hǔbǐ ana̤ ta anu toǒ, a ma̤kwadǐdòbǐ bǎ nû̌û lò̤ta gòtò̤.

³¹ Cǒmaradû̌ mî̌ tǒ̤꤮ pwǎ Cǒmara tûjûpwa̤ htǒo tapwa̤. Cǒmaradû̌ htě asǒsǒta la̤ǒtûdûlo̤dû̌ mî̌ tǒ̤꤮ pwǎ pacǒmara tûjûpwa̤ htǒo tapwa̤.

³² A mî̌ Cǒmaradû̌ htě a ǐ he ta̤khû̌ta̤ǎ. Pwa̤ htě a ma̤ phlophlǔ bǎ he klè̌.

³³ A ǐ hekhò̌lopo̤ dě a pe̤phwè sǒsǒta tikhi khò̌lòpo̤. A nohtò̌ihtǒǒjò he dě kholotò̌nò̌khû̌.

³⁴ A sû̌ǐ bǎ pǒ̤꤮ he ta glè shě ta̤shěta̤pe̤ ayanu mè̤tò̤, a sû̌ǐ bǎpo̤ he ta he glè wî̌wòpè̤ dǒ khlǐpla̤.

³⁵ Na ǐ he ta nagòtò̤ dě a ma̤lû̌htò̌ge he ta̤htûpwa̤. Nacǔdemû ma̤shû̌ma̤jo he. Na hèlò̤ ma̤jè he dě na ǐshû̌htò̌shohtò̌ he.

³⁶ Na no lṳ̂pṳ̂nṳ he ta hekhuwè tò̤. He lò̤jû dǐkhò̌꤮ tò̤.

³⁷ He lṳ̂pṳ̂ pwa̤khuwè he toǒ dě he lṳ̂pṳ̂ nṳlǎ asî. He dè ma̤sinṳbò asî tò̤ hî̌mî̌, he htû̌tiwǐgepe tò̤.

³⁸ Ma̤pûhǐ asî ihtǒbò̌pe tò̤nu, he po̤lòkhǔkèbò asî.

³⁹ Na ǐ he ta̤khû̌ta̤ǎ ta he glè shě ta̤ aya. Na nolò̤jûkèbò asî dě a hègenelò̤bò hekhò̌lopo̤kòshî̌.

⁴⁰ Na nolò̤jûkè hekhuwè toǒ dě he yî̤lò̤ asîgobo dě hekhǎlǎla̤. He ma̤sikèbò asî.

⁴¹ Asî yi̤kǒkwihtò̌ ta̤ma̤jè pwǎtadě kò ma̤lû̌htò̌ge asî dǐpwǎ̤꤮ tò̤. Asî kwihtò̌ ta̤ma̤jè dě Cǒmara tûjûpwa̤ aǒ pwǎtadě a gana̤deshǔ nǒ asî tò̤.

⁴² He demǔkîî̌kè asî sǒsǒta lo̤hǎ htě gili̤ sǎcû̌kè yǎnu toǒ. He yî̤cǎpǎbò asî sǒsǒta kò yî̤cǎpǎ hǎpèè̌ dě klè̌dakû.

⁴³ Na ma̤lû̌htò̌kè he ta kòyò htě a yi̤kǒyi̤hta henu toǒ. Na nohtò̌pǒǐ he ta khlilèhǔwa̤ toǒ. Khlilèphû̌ htě hesî̌ya nǒtò̤ toǒ bǎbǎ a ǒbò dě heta̤pǒ ala̤.

⁴⁴ Asî gana̤de he hî̌bǎbǎ ta a gana̤de jûle̤phî̌yo̤ lǒ̤bò heyo̤. Shihǔwa̤gaphû̌ toǒ hègene̤ û̌tṳglulò̤bò dě helo̤mo̤.

⁴⁵ Asî ta̤khuta̤ha toǒ hǎmǎkèbò. Asî ǒ dě wî̤we̤dû̌ tònò akû, a gònò̤gèglè dě hǎhtò̌ lǒkho.

⁴⁶ Cǒmara tûjûpwa̤htǒo a htûpwa̤ mè̤mè̤̌. Htû̌sò̌ǐ hecǒmara htě asǒsǒta la̤ǒtûdû lo̤dû̌ htǒotapwa̤. Kò bè̌htò̌yî̤ tû̌ta Cǒmara htě a ma̤lû̌htò̌ge he htǒotapwa̤ nî̌.

⁴⁷ A mî̌ Cǒmaradû̌ htě a ma̤le̤ma̤geshǔ bǎ he ta hekhuwè. A nopǒǐ he ta khlilèphû̌ toǒ dě khlilèphû̌ toǒ ǒbò dě hela̤ pě.

⁴⁸ A ma̤lû̌htò̌ge he dě pwa̤khuwè he toǒ acǔdekû. A dò̌htò̌ he dě hekhuwè toǒ akhû̌. A ma̤lû̌htò̌ge he ta kòyò htě a ma̤jîma̤jû kònu toǒ acǔdekû.

⁴⁹ Kǒ Cǒmara tûjûpwa̤, he glè htû̌sò̌ǐ na dě khlilèphû̌ toǒ akla. He htû̌sò̌ǐ na ta he ta̤sò̌po̤ sîtoǒ pě.

⁵⁰ Cǒmara ǐ Khwǐ htě awû̌htò̌nu tapwa̤ ta ta̤ma̤pè̤ htě adû̌. A dǔlṳ ata̤mo̤ǐ htě ahǎbòjò tò̤ htǒo ta Khwǐdǎ̤wi̤ htě a wû̌lǎ nû̌û htǒotapwa̤, akhlialè hǎte̤gilò̤ tûjûpwa̤ talakhǎ.