Htû̌sò̌htò̌ 148 - Kawyaw RC

Ta̤bǒlò̤ lǒ̤꤮ bò sî htû̌sò̌ǐ Cǒmara tûjûpwa̤

¹ Htû̌sò̌ǐ lǒkho Cǒmara tûjûpwa̤. Ta̤bǒlò̤ ǒ dě mǒkhû̌ toǒ htû̌sò̌ǐ mò̌ Cǒmara tûjûpwa̤. Ta̤bǒlò̤ ǒ dě mǒkhû̌ htò̌yî̤gutṳ̌ toǒ htû̌sò̌ǐ mò̌ yǎ.

² Amǒkhû̌tanaphû̌ lǒ̤꤮ bò ta akliprṳ̂ho ǒ dě mǒkhû̌ lǒ̤꤮ bò sî, htû̌sò̌ǐ lǒkho yǎ.

³ Lṳmṳ, la ta shǎ htě alîrakha lǒ̤꤮ bò toǒ, htû̌sò̌ǐ lǒkho yǎ.

⁴ Mǒkhû̌ htò̌yî̤gutṳ̌nu tò̤glò ta shi ǒ dě mǒkhû̌ toǒ, htû̌sò̌ǐ lǒkho yǎ.

⁵ Bǎ a hî̌lò̤ yo̤ akhanu, asî htûhtò̌ lǒ̤bò akhû̌akhî, nohtû̌sò̌ǐbò asî ta Cǒmara tûjûpwa̤ ami̤.

⁶ A bè̌ ǒměǒgle ta̤bǒlò̤ lǒ̤꤮ bò tûjûpwa̤. Ata̤hî̌bǎlò̤yo̤nu a pî̌jòkè tò̤.

⁷ Ta̤ ǒ dě hǎkhû̌, ta̤bǒlò̤ ǒ dě shidû̌shite̤we̤kû, shikwishiyo̤kû lǒ̤꤮ bò sî,

⁸ Mî̌ ta sèwèji, cashi ta poǒlṳ, gili̤sǎplǎwi̤ htě a gana̤de nû̌ûyo̤ lǒ̤꤮ bò sî,

⁹ Kholodû̌kholohtû, kholo, sǒmṳ htě a sǎhtò̌jò, sǒmṳdû̌ lǒ̤꤮ bò sî,

¹⁰ Lǒ̤꤮ bò ta̤mi̤ta̤mò̤ htě aplò̤, ta̤phû̌ta̤li̤ htě abî̌, lǒ̤꤮ bò ta̤phû̌ta̤li̤ htě adû̌dû̌ apî̌tî̌tî̌, htû̌phû̌ htě awi̤ lǒ̤꤮ bò sî,

¹¹ Khwǐ, pwa̤htûhǐkǒlǒkòdû̌, pwa̤pǒshipǒga ta khlilèphû̌ ǒ dě hǎkhû̌ lǒ̤꤮ bò sî,

¹² Makhûphû̌sǎ, mamǔphû̌sǎ, wè̤khǔwè̤pwa̤ ta phijaû̌phû̌ toǒ sî, htû̌sò̌ǐ lǒkho Cǒmara tûjûpwa̤.

¹³ No htû̌sò̌htò̌ǐbò asî ta Cǒmara tûjûpwa̤ ami̤ htǒonu. Mi̤ htě adû̌ahtû numî̌ pǒ̤꤮ pwǎ ami̤ htǒo hǒ. A mî̌ asîrîdû̌sîrîhtûkhlo ta hǎkhû̌ ta mǒkhû̌.

¹⁴ Ma̤pûhǐ kò bè̌dubè̌na̤ Cǒmaradû̌ akòyò Israelphû̌ htě a cǒtè̤ ta a, a ǒphǔ ta anu toǒ ayanu, a ma̤ shû̌htò̌shohtò̌ ǐ asî. Htû̌sò̌ǐ lǒkho Cǒmara tûjûpwa̤.