Htû̌sò̌htò̌ 145 - Kawyaw RC

Ta̤sò̌po̤ htû̌sò̌ǐ

Khwǐdǎ̤wi̤ ata̤sò̌po̤ htû̌sò̌ǐ.

¹ Kǒ hecǒmaradû̌, hekhwǐdû̌, he glè dǒhtû̌ǐlṳ nata̤sîrîdû̌sîrîhtû awi̤akè̌. He glè htû̌sò̌ǐ nami̤ tûjûpwa̤ talakhǎ.

² He glè htû̌sò̌ǐ na pṳ̂̌ni̤pṳ̂̌sa. He glè htû̌sò̌ǐ nami̤ tûjûpwa̤ talakhǎ.

³ Cǒmara tûjûpwa̤ mî̌ asîrîdû̌sîrîhtû na̤cè̌, a gwa htû̌sò̌ǐ mè̤mè̤̌. Asîrîdû̌sîrîhtû pwî̌꤮ tènu, kò sî̌yahtû dǐpwǎ̤꤮ tò̤.

⁴ Kòyò tuhtu hto tuhtu glè htû̌sò̌htò̌ǐbò nata̤ma̤. Asî glè dǒhtû̌ǐbò nata̤ma̤ htě apo̤aphǎ.

⁵ He glè gènè̤ pwǎ pǒ̤꤮ nata̤sîrîpo̤phǎ, nata̤sîrîdû̌sîrîhtû ata̤lîta̤rakha ta nata̤ma̤ htě acǒklî̌kî̌ya.

⁶ Asî glè dǒhtû̌ǐbò nata̤po̤ta̤phǎ htě na ma̤ ta̤te̤pe̤ sû̌pi̤sò̌pi̤. He glè pwe̤ǐlò̤lṳ bǎ kò ta nata̤ma̤ htě adû̌ayǒ.

⁷ Asî glè dǒhtû̌ǐlṳbò lǒkho nata̤wǒ htě adû̌ayǒ awi̤akè̌. Asî glè sò̌le̤sò̌lò̤ sò̌po̤htò̌ lǒkho nata̤cǒta̤tè̤ awi̤akè̌.

⁸ Cǒmara tûjûpwa̤ mî̌ a gwèbǎǐ, ma̤bwǐma̤sîrî kòyò. A sò̌phlǒhtû lǒbe ta ta̤mo̤ǐ htě ahǎbòjò tò̤.

⁹ Cǒmara tûjûpwa̤ mî̌ a ma̤wǒ ta̤ ta kò pṳ̂̌꤮ tapwa̤ aya. A gwèbǎǐbò ta̤ htě a bǒlò̤.

¹⁰ Kǒ Cǒmara tûjûpwa̤, ta̤ lǒ̤꤮ bò htě na bǒlò̤ toǒ glè htû̌sò̌htò̌ǐbò na. Lǒ̤꤮ bò nakòyò cǒtè̤ nò ayo̤ sîtoǒ glè hî̌bwǐhî̌sîrîbò na.

^11-12 Ma̤pûhǐ kò pṳ̂̌꤮ tapwa̤ sî̌yabò nata̤ma̤, nata̤po̤ta̤phǎ ta nashila̤gakû ata̤sîrîdû̌sîrîhtû ayanu, asî pwe̤ǐbò nashila̤gakû ata̤sîrîdû̌sîrîhtû awi̤akè̌. Asî dǒhtû̌ǐbò lǒkho nata̤po̤ta̤phǎ awi̤akè̌.

¹³ Nashila̤gakû numî̌ a ǒgloshomě tûjûpwa̤, na pǒǐbò kòyò tuhtu hto tuhtu. Cǒmara tûjûpwa̤ mî̌ a cǒtè̤ ta ata̤olò̤ lǒ̤꤮ bò, a ma̤ta̤ pṳ̂̌꤮ tacǎ ta ata̤mo̤ǐ htě ahǎbòjò tò̤.

¹⁴ Cǒmara tûjûpwa̤ ma̤shû̌ma̤jo kòyò ǒ dě ta̤pò̤ta̤shakû. A ma̤jè kòyò htě ashò̌lò̤ asò̌phlǒ.

¹⁵ Ta̤ htě asò̌htûpwa̤ ǒ pṳ̂̌꤮ tacǎ kè̌shu nǎla̤ǐ dě naǒ. Bǎ akhîakha bǎnu na ǐǎǐo asî.

¹⁶ Na yṳ̂htò̌ nacǔde dě na ǐǎǐo, na ma̤lǒma̤bebò ta̤ htě asò̌htûpwa̤ ǒ pṳ̂̌꤮ tacǎ ata̤sò̌yṳ.

¹⁷ Cǒmara tûjûpwa̤ ma̤toma̤bǎ ta̤pṳ̂̌꤮ tacǎ dě a ma̤ta̤ pṳ̂̌꤮ tacǎ ta ata̤mo̤ǐ htě ahǎbòjò tò̤.

¹⁸ Kòyò lǒ̤꤮ bò htě akwigwèbǎǐ Cǒmara tûjûpwa̤ ta asò̌phlǒcǒsò̌phlǒtè̤ toǒnu Cǒmara ǒphǔtînî̌ ta asî.

¹⁹ A ma̤lǒma̤bebò bǎ kòyò htě a ǐsha bè̌dubè̌na̤ nû̌ûnu toǒ ata̤sò̌yṳ. A gana̤de asî kwigwèbǎǐ ta̤ma̤jè dě a ma̤lû̌htò̌ asî.

²⁰ Cǒmara tûjûpwa̤ ma̤kwaǐ kòyò lǒ̤꤮ bò ta a mo̤ǐ nû̌û. A glè ma̤pî̌kèbò kòyòphû̌mò̤.

²¹ He glè htû̌sò̌ǐ Cǒmara tûjûpwa̤. Ta̤ lǒ̤꤮ bò htě a bǒlò̤ toǒnu to htû̌sò̌ǐ Cǒmara mi̤cahtǐ tûjûpwa̤ talakhǎ.