Htû̌sò̌htò̌ 141 - Kawyaw RC

Ta̤kwisaba ta ta̤ma̤kwaǐ aya

Khwǐdǎ̤wi̤ ata̤sò̌po̤ htû̌sò̌ǐ.

¹ Kǒ Cǒmara tûjûpwa̤, he kwigwèbǎǐ na, ma̤jè phwèmò̌ he. He kwihtò̌ nata̤ma̤jè akhanu, gana̤de bǎ he.

² He ta̤kwihtò̌ nanu nohtûtû̌ yǎta ta̤nṳmû̌. He yṳ̂htò̌ cǔde dě kwisabahtò̌ na htǒo a glè ma̤mo̤sû̌mo̤sò̌ tû̌ nasò̌phlǒ pwǐ꤮ lṳmṳhǎ ata̤lṳhtò̌nu nî̌.

³ Kǒ Cǒmara tûjûpwa̤, pǒǐ heta̤hî̌bǎ, ǒpo̤kè̌ǐ hekhû̌phě.

⁴ No cû̌ ma̤pû he ta̤phû̌mò̤shî̌hto ma̤, mè̤tò̤dě nocû̌ ma̤phû̌mò̤plǒ kû̌ pûma̤ he ta kòyòphû̌mò̤nu toǒ ma̤. No ǎhtuohtu kû̌ pûma̤ he ta asî shǎǎshǎonu ma̤ma̤.

⁵ No phlě he ta kòyòcǒkòyòtè̤nu, htǒomî̌ a glè htû ta̤ma̤mo̤ma̤wǒ ta heya. No sû̌ǐto he ta anu, htǒomî̌ alò̤ta kò plṳ mòû̌shi dě hekhǔlṳlo̤. He la̤kè nǒ asîta̤sû̌ta̤tòwò tò̤. heta̤kwisabanu a shěshǔ mè̤mè̤̌ pwa̤ma̤ta̤phû̌mò̤shî̌htonu toǒ a ta̤ma̤.

⁶ Bǎ kò wîlòte̤kè pwa̤pǒ asînu toǒ dě gòpò̤lo̤ akhanu, asî glè sî̌ya ta heta̤hî̌bǎ toǒ numî̌ ato.

⁷ Asî akhwǐakhû̌ toǒ nûpò̌nûshî nṳbò dě lṳnǎkhwǎdo sǒsǒta ta kò po̤mǔ lo̤nu.

⁸ Kǒ Cǒmara tûjûpwa̤, he Běcǎpha tûjûpwa̤, he kè̌shunǎla̤ǐ pǒ̤꤮ pwǎ na. Na mî̌ he la̤ǒtûdû agûla̤, noma̤sikè pûma̤ he ta asî ma̤.

⁹ Ma̤kwadǐdòǐ he ta sumṳ htě asî dò̌nǎ he, htò̌glo htě kòyòphû̌mò̤ dò̌nǎ henu toǒ.

¹⁰ Bǎ na ma̤lû̌htò̌ he akhanu, nopo̤bǎbò gesǒ asî ta asumṳnu toǒ.