Htû̌sò̌htò̌ 140 - Kawyaw RC

Ta̤kwisaba ta la̤ma̤kwaǐ aya

Khwǐdǎ̤wi̤ ata̤sò̌po̤ htû̌sò̌ǐ. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒlǒkòdû̌ dě ta̤lṳhtò̌hokûnu tapwa̤ aya.

¹ Kǒ Cǒmara tûjûpwa̤, ma̤lû̌htò̌ge he dě kòyòphû̌mò̤ toǒ acǔdekû. Ma̤kwaǐ he dě pwa̤ma̤jîma̤jû kòyò toǒ acǔdekû.

² Asî gènè̤ma̤ còcè̌꤮ ta̤phû̌mò̤shî̌hto. Pṳ̂̌ni̤ni̤ a ma̤htûhtò̌ còcè̌ ta̤shěta̤pe̤.

³ Asîplî̤nu asǒsǒ ta wṳ̂sa. Asî ta̤hî̌bǎ toǒnu awè̤ lò̤kèta wṳ̂sa pè̌ kòyò dě awè̤htò̌.

⁴ Kǒ Cǒmara tûjûpwa̤, kòyòphû̌mò̤, pwa̤ma̤jîma̤jû kòyò toǒ shokhû̌ye̤yo̤ ma̤pò̤ma̤sha he akhû̌akhî, ma̤kwaǐ he.

⁵ Kòyò phî̌dû̌phî̌htû ana̤ toǒ dò̌nǎhǔ he ta sumṳ. Asî dò̌nǎbò htò̌glo dě he la̤cû̌ klè̌nu tobo akû. Asî dò̌nǎ cû̌꤮ sumṳ dě klè̌lo̤.

⁶ He hî̌ Cǒmara tûjûpwa̤ ta, “Na mî̌ hecǒmara.” Kǒ Cǒmara tûjûpwa̤, gana̤de kû̌ he kwihtò̌ nata̤ma̤jè.

⁷ Kǒ Cǒmara tûjûpwa̤, he Běcǎ ta̤adû̌, na mî̌ pwa̤ma̤lû̌htò̌ge he ta apo̤phǎshû̌sho. Na ma̤kwaǐ he dě ta̤shěta̤pe̤ akû.

⁸ Kǒ Cǒmara tûjûpwa̤, plû ma̤pû kòyòphû̌mò̤nu toǒ pwǐ a sò̌yṳma̤nu ma̤. No dû̌htò̌htûhtò̌ pûma̤ asî ata̤tîwî̌nu toǒ ma̤, pěmî̌ asî phî̌dû̌phî̌htû ana̤ pě.

⁹ No ma̤pè̤kè pûma̤ pwa̤sò̌khě he toǒ ma̤. Asî hî̌ sò̌gònò̤ ǐsha he toǒnu nokhòbǎ gesǒ tû̌ asî.

¹⁰ No lò̤te̤ tû̌ mî̌klû̌ gèrosho dě asîlo̤. Kò glè wîlò̤nṳkè asî dě mî̌kû mè̤tò̤mî̌ dě hǎkûyo̤nu nî̌. No ihtǒbò̌pe pûma̤ asî ma̤.

¹¹ Bǎ hǎkhû̌bǎo, noǎbǎǒbǎ pûma̤ kòyò htě a hî̌jîhî̌jû kònu toǒ ma̤. No ma̤pî̌kè mò̌ pwa̤ma̤jîma̤jû kònu toǒ ta ta̤pî̌ta̤lṳ̂dû̌nu.

¹² He sî̌ya ta Cǒmara tûjûpwa̤ ma̤jè kòyò htě kò ma̤jîma̤jû asînu toǒ. A ma̤toma̤bǎ bǎ kòyò htě a shodo pwa̤ma̤jè toǒ.

¹³ Kòyòcǒkòyòtè̤ toǒ glè htû̌sò̌ǐ mè̤mè̤̌ nami̤. Asî ǒhtûpwa̤ tû̌ta dě nalo̤mo̤.