Htû̌sò̌htò̌ 14 - Kawyaw RC

Kòyòhǎkhû̌phû̌ ata̤phû̌mò̤shî̌hto

Khwǐdǎ̤wi̤ ata̤sò̌po̤ htû̌sò̌ǐ. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒdû̌ dě ta̤lṳhtò̌hokûnu tapwa̤ aya.

¹ Kòyònòdû̌ hî̌ lǒkho dě asò̌phlǒkû ta, “Cǒmara ǒtò̤.” Asî ta̤bè̌sò̌phlǒsǔshi mî̌ aphû̌mò̤shî̌hto, ata̤phî̌ta̤ma̤ mî̌ aphû̌mò̤shî̌hto. Dě asî klanu, a ma̤ ta̤wǒ ǒpe dǐpwǎ̤꤮ tò̤.

² Ma̤pûhǐ Cǒmara tûjûpwa̤ sî̌ya ta kòyò htě a ǒhtûpwa̤ te̤mǎ, kòyò htě a kè̌lǎ nû̌û ǒ ya mî̌ ǒtò̤ya ayanu, aǒ dě mǒkhû̌ kè̌lò̤ kòyòhǎkhû̌phû̌.

³ Pwǎta kòyò pṳ̂̌꤮ tapwa̤ cû̌pa̤bò ta Cǒmaradû̌. Asî htûkèbò kòyòphû̌mò̤ hǒ. Kòyò htě a ma̤ ta̤wǒnu a ǒpe dǐpwǎ̤꤮ tò̤, toǒtapwa̤ pwǎnu, aǒ tò̤.

⁴ Cǒmara tûjûpwa̤ gwè, “Lǒ̤꤮ bò kòyòphû̌mò̤ toǒ, a kè̌lǎsî̌ya kû̌nò kò dǐkhò̌꤮ tò̤ ya? “Asî ěǎbò hekòyò dě a gana̤de heyo̤nu toǒ sǒsǒta ta ǎ mû̌. “Asî kwisabahtò̌ kû̌ he dǐkhò̌꤮ tò̤.”

⁵ Hǐnudě asî bǎ kè̌shǐshěto̤bǎ ta ta̤sò̌gònò̤ ǐsha dû̌꤮ pě. Pwǎtadě Cǒmara ǒkû̌ ta kòyòcǒkòyòtè̤.

⁶ Kòyòphû̌mò̤nu toǒ ma̤pî̌ma̤lṳ̂kèbò kòyòshuphǔshèwèphû̌ ata̤yè̤lò̤nǎ. Cǒmara tûjûpwa̤ mî̌ kòyòshuphǔshèwèphû̌ ala̤ǒtûdûbǐ agûla̤.

⁷ He kwisaba lǒ̤sû̌lǒ̤sò̌ ta ta̤ma̤lû̌htò̌ge Israelphû̌ ayanu, a ǒ dě Sǐokholokhû̌ hèlò̤ tû̌ta pě nî̌. Htû̌꤮ Cǒmara tûjûpwa̤ kaǎgeplǒbòsǒ akòyò htě kò pṳ̂cû̌kè nû̌ûnu toǒ akhapěnu, Yǎ̤kò akhlialè glè sò̌le̤sò̌lò̤, Israelphû̌ glè mo̤sû̌mo̤sò̌ pě.