Htû̌sò̌htò̌ 138 - Kawyaw RC

Ta̤hî̌bwǐsîrî ata̤kwisaba

Khwǐdǎ̤wi̤ ata̤sò̌po̤ htû̌sò̌ǐ

¹ Kǒ Cǒmara tûjûpwa̤, he glè hî̌bwǐhî̌sîrîhtò̌ na ta hesò̌phlǒsamabò. He sò̌po̤ htû̌sò̌ǐ na dě Cǒmara ahǔwa̤ toǒ alo̤mo̤.

² Nami̤ ta nata̤olò̤ toǒnu na bè̌htò̌yî̤khlo yǎta ta̤lǒ̤꤮ bò akhû̌akhî, he glè û̌gene̤lò̤ to dě nata̤lṳta̤ho cahtǐ ǒnu tokho. Nata̤mo̤ǐnu ahǎbòjò tò̤, na cǒtè̤ ta nayo̤ akhû̌akhî, he htû̌sò̌ǐ na.

³ Bǎ he kwihtò̌ na ta̤ma̤jè akhanu, na ma̤jè he. Na ǐ he ta̤khuta̤ha, ta̤khû̌ta̤ǎ.

⁴ Kǒ Cǒmara tûjûpwa̤, hǎkhû̌ akhwǐdû̌ lǒ̤꤮ bò gana̤de nale̤nayo̤ htě na hî̌lò̤nu toǒ akhû̌akhî, asî hî̌bwǐhî̌sîrîhtò̌bò tû̌ta na.

⁵ Cǒmara tûjûpwa̤ ata̤sîrîpo̤phǎnu adû̌ayǒ mè̤mè̤̌ akhû̌akhî, asî glè sò̌po̤htò̌ lǒkho ta̤ htě Cǒmara tûjûpwa̤ ma̤htonu toǒ.

⁶ Cǒmara tûjûpwa̤nu asîrîpo̤phǎ mè̤mè̤̌ pwǎ̤tadě a ǒphǔ kè̌ǐkhwè̌ǐ kòyò htě a shò̌lò̤ asò̌phlǒ. A ǒ dě ayî̤ dě a sî̌ya kòyò htě aphî̌dû̌phî̌htû ana̤.

⁷ Ta̤pò̤ta̤sha ǒte̤we̤bò ta he pwǎ̤tadě na ǐ ǒhtûpwa̤po̤ he. Na yṳ̂hè nacǔde na ma̤kwaǐ he dě pwa̤sò̌khě he toǒ ata̤sò̌phlǒdû̌ akû. Na ma̤lû̌htò̌ he ta nasîrîpo̤phǎ.

⁸ Pwǐ Cǒmara tûjûpwa̤ olò̤htonu a ma̤lǒma̤be bǎ he pě. Kǒ Cǒmara tûjûpwa̤, nata̤mo̤ǐ htě ahǎbòjò tò̤nu a ǒměǒgle tûjûpwa̤. Wîkè pûma̤ ta̤ma̤ htě na ma̤ yǎta nacǔdenu toǒ ma̤.