Bìoball air-loidhne

Htû̌sò̌htò̌ 135 - Kawyaw RC

Lî̤sò̌po̤ htû̌sò̌htò̌

^1-2 Kǒ pwa̤ ǒ dě Cǒmara tûjûpwa̤ ahǐ, pacǒmaradû̌ ata̤lṳhtò̌hokû toǒ sî꤮, htû̌sò̌ǐ Cǒmara tûjûpwa̤, htû̌sò̌ǐ mò̌ ami̤. Cǒmara tûjûpwa̤ apwa̤ma̤ta̤phû̌ sî꤮, htû̌sò̌ǐ mò̌ lǒkho.

³ Cǒmara tûjûpwa̤ mî̌ awǒ mè̤mè̤̌ akhû̌akhî, htû̌sò̌ǐ mò̌ yǎ. A sò̌phlǒwǒ꤮ mè̤mè̤̌ akhû̌akhî, sò̌po̤htû̌sò̌htò̌ mò̌ ami̤.

⁴ Cǒmara tûjûpwa̤ wû̌lǎ Yǎ̤kò akhlialè toǒ ta aya tû̌. A wû̌lǎ Israelkhlilèphû̌ htǒonu ta akhlilèphû̌ htě ale̤dû̌pwî̤htû.

⁵ He sî̌ya ta Cǒmara tûjûpwa̤ mî̌ asîrîpo̤phǎ. Pa Běcǎ ta̤adû̌ mî̌ adû̌ahtûkhlo ta Cǒmara ahǔwa̤ toǒ lǒ̤꤮ bò.

⁶ Dě mǒkhû̌nu bǎbǎ, bǎ hǎkhû̌ bǎbǎ, dě shidû̌shite̤we̤kû bǎbǎ, shidû̌shite̤we̤ kòdanu bǎbǎ, Cǒmara tûjûpwa̤ ma̤bò pwǐ a sò̌yṳma̤nu.

⁷ A nohtò̌ poǒlṳ dě mǒkòtṳkòshî̌, a nohtûhtò̌ tî̌lî̌bobo, khwè̌juju. Gili̤ ǒ dě Cǒmara la̤bè̌ǒplǒ nû̌û gûla̤nu toǒ dě a nohtû̌hè.

⁸ Cǒmara tûjûpwa̤ ma̤sikèbò Egyptga phû̌wè̤pwa̤ ta ta̤phû̌ta̤li̤ phû̌wè̤pwa̤ lǒ̤꤮ bò.

⁹ Cǒmaradû̌ dǔlṳ ata̤cǒklî̌kî̌ya ta ta̤sû̌pi̤sò̌pi̤ toǒ dě a shě Egyptgaphû̌ ta apwa̤ma̤ta̤phû̌ toǒ lǒ̤꤮ bò.

¹⁰ A ma̤pî̌kè plṳ̂꤮ mè̤mè̤̌ khlilèphû̌ toǒ, htohǒtò̤ a ma̤sikè Khwǐ htě a sîrîshû̌sho toǒ.

¹¹ A ma̤sikèbò Amò̌rî̌khlilèphû̌khwǐ Khwǐsǐho, Bashagakhwǐ Khwǐokǎ ta lǒ̤꤮ bò Khanaga akhwǐ toǒ.

¹² Asîhǎkhû̌ toǒnu, a ǐkè nû̌ûta akòyò Israelkhlilèphû̌ toǒ ta û̌cata̤bî̌.

¹³ Kǒ Cǒmara tûjûpwa̤, nami̤ mî̌ a ǒměǒgle tûjû꤮ pwa̤. Kǒ Cǒmara tûjûpwa̤, nami̤ lṳshilṳga tû̌ta tûjû꤮ pwa̤.

¹⁴ Cǒmara tûjûpwa̤ glè ǒkû̌ ta akòyò tokho. A gwèbǎǐ apwa̤ma̤ta̤phû̌ toǒ.

¹⁵ Khlilèphû̌hǔwa̤ toǒ acǒmara ta̤yo̤ta̤gî mî̌ kòyòhǎkhû̌phû̌ bǒ nû̌û dě kò ma̤pwǎ yǎta wûhta.

¹⁶ Akhû̌phě ǒ pwǎ̤tadě a hî̌bǎjò tò̤. Ami̤sǎphlǒ ǒ pwǎ̤tadě a kè̌shǐjò tò̤tò̤.

¹⁷ Anò̌ku ǒ pwǎ̤tadě a gana̤dejò tò̤. Anò̌khi ǒ pwǎ̤tadě a sǎnṳsǎhtò̌jò tò̤tò̤.

¹⁸ Lǒ̤꤮ bò kòyò htě a bǒ pwa̤yo̤nu toǒ bǎbǎ, a nǎla̤ǐ pwa̤yo̤nu toǒ bǎbǎ, a glè sǒsǒtû̌ta pwa̤yo̤.

¹⁹ Kǒ Israel akhlialè toǒ, htû̌sò̌ǐ Cǒmara tûjûpwa̤. Kǒ Aro akhlialè pwa̤lṳhtò̌ta̤ toǒ, htû̌sò̌ǐ Cǒmara tûjûpwa̤.

²⁰ Kǒ Lě̤wǐ akhlialè toǒ, htû̌sò̌ǐ Cǒmara tûjûpwa̤. Kǒ kòyò htě a ǐsha bè̌dubè̌na̤ Cǒmara tûjûpwa̤ toǒ, htû̌sò̌ǐ Cǒmara tûjûpwa̤.

²¹ Kò htû̌sò̌ǐ tû̌ta Cǒmara tûjûpwa̤ ǒ dě Sǐokholo Ye̤rǔshèlèwî̤kûnu tapwa̤. Htû̌sò̌ǐ Cǒmara tûjûpwa̤ nî̌.

« Roimhe

Air adhart »

Wycliffe USA

The Seed Company

Lean sinn:

Ceanglaichean taic

Sanasan