Htû̌sò̌htò̌ 132 - Kawyaw RC

Ta̤htû̌sò̌ǐhtò̌ ta ta̤lṳhtò̌ho aya

Bǎ kòyò toǒ kihtò̌ lǒkho dě Ye̤rǔshèlèwî̤ ta̤lṳhtò̌hokû akhanu, a sò̌po̤ lǒkho ta̤sò̌po̤ htǒoto̤to̤.

¹ Kǒ Cǒmara tûjûpwa̤, shope̤ǐkè pûma̤ Khwǐdǎ̤wi̤ ta ata̤khòjîkhòjû toǒ lǒ̤꤮ bò ma̤ nî̌.

² A bèlò̤ ayo̤ ta Cǒmara tûjûpwa̤, a olò̤ ta Yǎ̤kò acǒmaradû̌ htě apo̤aphǎ.

^3-5 “He dè kè̌shǐ Cǒmara tûjûpwa̤ ahǐ hǒtò̤, htodě he dè ma̤htò̌nu bǎ Yǎ̤kò acǒmaradû̌ htě apo̤aphǎ htǒotapwa̤ ahǐ hǒtò̤ hî̌mî̌, he ge꤮ nṳ penǒ dě hehǐdǒkû tò̤. “He cû̌hǎmoǒpe dě hela̤mi̤khû̌ tò̤, he hǎmoǒnòpe tò̤tò̤.”

⁶ Kǒ Cǒmara tûjûpwa̤, pa gana̤de ta̤wṳ̂dò atǒcahtǐ awi̤akè̌ dě Ephratawî̤kû. Pa kè̌shǐ tǒcahtǐnu tama bǎ Jariwî̤ hǔklakhû̌.

⁷ Pa cû̌ plǒnû̌û dě Cǒmara tûjûpwa̤ ahǐ hò̌. Pa cû̌ sabahtò̌ yǎ dě agògohtahtò̌yî̤ alo̤mo̤ hò̌.

⁸ Kǒ Cǒmara tûjûpwa̤, ma̤mò̌, hè dě nala̤ǒ agûla̤. Hèhtu ta nata̤wṳ̂dò tǒcahtǐ htě a shû̌sho.

⁹ Napwa̤lṳhtò̌ta̤ toǒ ma̤ tû̌ta ta̤cǒta̤tè̤ nî̌. Nakòyò htě a cǒtè̤tayo̤ toǒ sò̌le̤sò̌lò̤ sò̌po̤mo̤mè̤htò̌ lǒkho tû̌ta nî̌.

¹⁰ Pwǐ na olò̤hto napwa̤ma̤ta̤phû̌ Khwǐdǎ̤wi̤nu dě wîkèpûma̤ Khwǐ htě na wû̌htò̌hto htǒotapwa̤ ma̤.

¹¹ Cǒmara tûjûpwa̤ bèlò̤ ayo̤ ta Khwǐdǎ̤wi̤. A ma̤pî̌pe nǒ dǐkhò̌꤮ tò̤. A hî̌ ta, “He nohtò̌htû nakhlinalè tapwa̤pwa̤ ta Khwǐ dě a glè htò̌ pǒǐ nagûla̤.

¹² “Naphû̌makhû toǒ dè cǒtè̤ ta heta̤wṳ̂dò, heta̤mǎlò̤ htě he sû̌ǐlò̤ asînu hî̌mî̌, asî phû̌makhû hǎte̤gilò̤ tṳtṳ toǒ glè htò̌ hǎnòò̌ nǒ dě nagûla̤ tûjûpwa̤.”

¹³ Cǒmara tûjûpwa̤ sò̌yṳ ma̤htò̌ ahǐ bǎ Sǐowî̤ akûnu akhû̌akhî, a wû̌lǎhto wî̤nutî̤wî̤.

¹⁴ A hî̌ ta, “Htǒomî̌ he la̤ǒ agûla̤ tûjûpwa̤. “He sò̌yṳ gûla̤ htǒotò̤glò akhû̌akhî, he glè ǒ bǎo.

¹⁵ “He howi̤ wî̤ htǒotî̤wî̤ dě a glè ǎbǎobǎ. “He glè ǐǎkǒobe kòyòshuphǔshèwè ǒ bǎ wî̤kûnu toǒ.

¹⁶ “He glè ma̤kwaǐ apwa̤lṳhtò̌ta̤. “Akòyò htě a cǒtè̤ ta ayo̤ toǒ glè sò̌le̤sò̌lò̤ sò̌po̤mo̤mè̤.

¹⁷ “He glè nohtûhtò̌ Khwǐdû̌ ta Khwǐdǎ̤wi̤ akhlialè akla tapwa̤ pě. “He glè tîwî̌tòwò bǎ Khwǐ htě he wû̌lǎ yǎnu tapwa̤ dě nolîrakhahtò̌ sǒsǒ yǎta mî̌konu nî̌.”

¹⁸ A hî̌lò̤ ta, “He glè ma̤sòwò̤kè pwa̤sò̌khě a toǒ. “Ashiaga lè̌dě a sîrîshû̌sho lîrakha lò̤kèta khû̌glûhtanu.” hǐnu.