Htû̌sò̌htò̌ 12 - Kawyaw RC

Kwihtò̌ ta̤ma̤jè dě Cǒmara tûjûpwa̤ aǒ

Khwǐdǎ̤wi̤ ata̤sò̌po̤ htû̌sò̌ǐ. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒdû̌ dě ta̤lṳhtò̌hokûnu tapwa̤ aya. Bǎ sò̌po̤ ta̤sò̌po̤ htǒoakha, bǎ dǒ yǎta ta̤ǔta̤po̤ htě apli̤ǒ abolǐ̤sǒnu toǒ. 1 Kǒ Cǒmara tûjûpwa̤ ma̤jè pa, kòyòcǒkòyòtè̤ ǒpe tò̤ hǒ.

¹ Kǒ Cǒmara tûjûpwa̤ ma̤jè pa, kòyòcǒkòyòtè̤ ǒpe tò̤ hǒ. Kòyò htě a cǒtè̤ ta Cǒmaranu ahǎmǎkèbò hǒ.

² Kò pṳ̂̌꤮ tapwa̤ lòho kè̌khîbò ahǐphòkòshî̌. Asî hî̌bǎhtû̌sò̌lòhobò kè̌khînû̌û.

³ Kǒ Cǒmara tûjûpwa̤, Asîkhû̌phě htě a hî̌bǎhtû̌sò̌lòho, asîplî̤ htě a hî̌bǎhtò̌yî̤nu toǒ ma̤ǒkǔsî̌tukǔkè asî.

⁴ Asî hî̌lǒkho, “Pa hî̌bǎ lòhǎlòhojò yo̤ akhû̌akhî, pa hî̌ hî̌tètè̌ dě pa nî̤bǎbò. “Pa sò̌yṳ hî̌ hî̌tètè̌nu anî̤, kò lo̤bǎ htû sara dě pakhû̌ dǐpwǎ̤꤮ tò̤.”

⁵ Cǒmara tûjûpwa̤ hî̌, “Pwa̤pè̤ǎpè̤o kòyòhǒwi̤shèwè, he gana̤de kòyò shodota̤ma̤jè ata̤kookasha akhû̌akhî, khònò̤ he glè ihtǒma̤ ta̤tacǎcǎ ta asîya hǒ. “He glè ma̤kwaǐ kòyò htě akè̌shunǎla̤ǐ he.”

⁶ Cǒmara tûjûpwa̤ ata̤olò̤mèlò̤ toǒnu asǔ ǒ dǐcǎ꤮ tò̤. Asǒsǒ꤮ ta wûyî̌ htě kò ǔbûhto nû̌û ta mî̌ susǒ taplǎ, dě khohǎkûnu.

⁷ Kǒ Cǒmara tûjûpwa̤, na ma̤lû̌htò̌genṳ pa, ma̤kwa kè̌ǐkhwè̌ǐ pa dě kòyòphû̌mò̤nu toǒ acǔdekû tûjûpwa̤ pě.

⁸ Kòyòphû̌mò̤ toǒnu, a cû̌ gûla̤ pṳ̂̌꤮ tò̤glò, kò htû̌sò̌ǐbò asî.