Htû̌sò̌htò̌ 119 - Kawyaw RC

Cǒmara tûjûpwa̤ ata̤sû̌ta̤tòwò

¹ Kòyò htě a ta̤sǔ ǒ dě Cǒmara tûjûpwa̤ alo̤mo̤ tò̤, a gana̤de Cǒmara tûjûpwa̤ ata̤sû̌ta̤tòwò toǒnu a nî̤bǎ ta̤howi̤.

² Kòyò htě a gûma̤kû̌ pwǐ Cǒmara ata̤sû̌ta̤tòwò, a kè̌lǎ nû̌û ta sò̌phlǒsamabò toǒnu a nî̤bǎ ta̤howi̤.

³ Asî ma̤ ta̤phû̌mò̤shî̌hto dǐkhò̌꤮ tò̤. A gûkû̌ pwǐ Cǒmara aklè̌aklònu.

⁴ Na hî̌bǎlò̤yo̤ ta pa tobǎ gana̤de te̤mǎ kû̌bò nata̤sû̌ǐtòwòǐ.

⁵ He sò̌꤮ phlǒsho mè̤mè̤̌ dě he glè gûma̤kû̌bò nata̤hî̌bǎlò̤yo̤.

⁶ He dè bè̌sû̌bè̌sǎ lǒ̤꤮ bò nata̤mǎlò̤yo̤ toǒ hî̌mî̌, he sòwò̤ nǒ dǐkhò̌꤮ tò̤.

⁷ Bǎ he sî̌yahè nata̤hî̌bǎlò̤yo̤ toǒ akhanu, he hî̌bwǐhî̌sîrîhtò̌ na ta ta̤sò̌phlǒcǒsò̌phlǒtè̤ pě.

⁸ He glè gana̤detû̌ nahî̌bǎlò̤yo̤. Khòsò̌do wîkè pûma̤ he dî̌kî̌꤮ ma̤.

Gana̤de Cǒmara tûjûpwa̤ ata̤sû̌ta̤tòwò

⁹ Pwa̤nějaphû̌nu, a glè ǒhtûpwa̤ mṳ̂plîjò hî̌tè? A bǎ gana̤de kû̌bò nale̤nayo̤.

¹⁰ He kè̌lǎ na ta hesò̌phlǒ samabò. No cû̌sǔ cû̌tepheyî̤kè pûma̤ he ta nata̤mǎlò̤ ma̤.

¹¹ Ma̤pûhǐ he ma̤sǔma̤plě na tò̤ ayanu, he bè̌nṳǒplǒ nale̤nayo̤ dě hesò̌phlǒkû.

¹² Kǒ Cǒmara tûjûpwa̤, he htû̌sò̌ǐ na. Sû̌ǐtòwòǐ he ta nata̤hî̌lò̤yo̤.

¹³ Hekhû̌phě dǒhtû̌ǐlṳ gegele̤le̤ lǒ̤꤮ bò ta̤hî̌bǎlò̤yo̤ htě na ǐlò̤nu toǒ.

¹⁴ He ǒhtûpwa̤ pwǐ nata̤sû̌ǐlò̤yo̤nu akhû̌akhî, he sò̌le̤sò̌lò̤khlope ta he ta̤dû̌yò̤htò̌sa lǒ̤꤮ bò.

¹⁵ He gènè̤te̤mǎǐ nata̤sû̌ǐtòwòǐ. He bè̌sû̌bè̌sǎǐ naklè̌naklò.

¹⁶ He sò̌phlǒǒ nata̤hî̌bǎlò̤yo̤. He shope̤nǎpè̤pe nale̤nayo̤ tò̤.

Ta̤sò̌le̤sò̌lò̤ dě Cǒmara ata̤sû̌ta̤tòwò akû

¹⁷ Ma̤mo̤ma̤wǒ ǐtû̌ najû mî̌ he htǒo. Pědě he ǒhtûpwa̤ jûle̤phî̌yo̤ tû̌ta nayo̤.

¹⁸ Ma̤pûhǐ he kè̌shǐ nata̤ma̤ cǒklî̌kî̌ya toǒ dě nata̤sû̌ta̤tòwòkû ayanu, bòmo mò̌ bǎ hemi̤sǎ.

¹⁹ Bǎ hǎkhû̌bǎo he htûpwǎ shǐtè̤mè̤. Ǐsî̌ya he ta nata̤mǎlò̤ toǒ nî̌.

²⁰ He sò̌yṳ sî̌꤮ ya mè̤mè̤̌ nata̤hî̌bǎlò̤yo̤ toǒ pṳ̂̌꤮ plǎ.

²¹ Na sǎhtǎ kòyò htě a phî̌dû̌phî̌htû ana̤nu toǒ. Na ǐsho kòyò htě a jûle̤phî̌yo̤ kû̌ nata̤mǎlò̤ tò̤nu toǒ.

²² He jûle̤phî̌yo̤ nata̤hî̌bǎlò̤yo̤ akhû̌akhî, ta̤pi̤jishǐcǒ he bǎbǎ, ta̤hî̌bǎ ma̤tukutakǎ he bǎbǎ, noshěto̤bǎ pûma̤ he ma̤.

²³ Pwa̤pǒta̤ toǒ hǎnòò̌plǒbò nû̌û dě a dǒbò heyo̤. He mî̌ najû lè̌dě he glè gènè̤te̤mǎ nòpe pwǎ nata̤mǎlò̤ toǒ.

²⁴ Nata̤sû̌ǐlò̤yo̤ toǒnu a ma̤mo̤ mè̤mè̤̌ hesò̌phlǒ. A ǐsî̌yajè he.

Bè̌lò̤ sò̌phlǒ ta la̤jûle̤phî̌yo̤ kû̌ Cǒmara ata̤sû̌ta̤tòwò

²⁵ He glè̌ phǔsi tînî̌ hǒ. Pwǐ nale̤nayo̤ hî̌nǎnu, ǐ htûpwa̤po̤ he.

²⁶ Heta̤ǒhtûpwa̤ awi̤akè̌nu he pwe̤ǐlṳ bǎ na dě na hî̌shǔhto he hǒ. Sû̌ǐtòwòǐ he ta nata̤hî̌bǎlò̤yo̤.

²⁷ Ma̤pûhǐ he sî̌yaphlophǎ nata̤sû̌ǐtòwòǐ toǒ amûasǎ ayanu, ma̤jèmò̌ he. Pědě he gènè̤te̤mǎjò nata̤ma̤ cǒklî̌kî̌ya toǒ.

²⁸ He sǎpla̤ mè̤mè̤̌ dě alòdǒlòde he. Ǐkhû̌ǎshû̌ khû̌ǎshohtò̌ gesǒmò̌ he pwǐ nata̤mǎlò̤ hî̌nǎnu.

²⁹ No cû̌tephekè he ta ta̤lòhǎlòho aklè̌. Sû̌ǐtòwòǐ wǒnṳ he ta nata̤sû̌ta̤tòwò htǒo.

³⁰ He wû̌lǎphî̌ ta̤cǒtè̤tayo̤ htǒo hǒ. He bè̌lò̤ sò̌phlǒ ta he glè gûkû̌ nata̤mǎlò̤.

³¹ Kǒ Cǒmara tûjûpwa̤, he pṳ̂gleměǐ nata̤hî̌bǎlò̤yo̤. No htûhtò̌ pûma̤ ta̤sòwò̤ ta heya ma̤.

³² Na ǐsî̌yaphlophǎ lǒbe he akhû̌akhî, he sò̌phlǒsho gana̤de nata̤mǎlò̤.

Ta̤kwisaba ta la̤sî̌yaphlophǎwǒ aya

³³ Kǒ Cǒmara tûjûpwa̤, sû̌ǐ he ta nata̤mǎlò̤ aklè̌aklò. Pě꤮ mî̌ he gûma̤ tû̌ pě.

³⁴ Ǐsî̌yaphlophǎ wǒnṳ he dě he gana̤detû̌ nata̤sû̌ta̤tòwò. He jûle̤phî̌yo̤ tû̌ta hesò̌phlǒsamabò.

³⁵ He kè̌lǎhtò̌ ǐtû̌ ta̤sò̌le̤sò̌lò̤ dě nata̤mǎlò̤ akûnu akhû̌akhî, yṳ̂klè̌nè̌klò he.

³⁶ Nata̤hî̌bǎlò̤yo̤nu, nomo̤ǐkhlo he ta he sò̌yṳbò wûhtanu.

³⁷ No kè̌khǒkè he ta ta̤ htě anòdû̌nu toǒ. Ǐ ǒhtûpwa̤ te̤mǎ he pwǐ nale̤nayo̤ ǒnu.

³⁸ Pwǐ na olò̤hto bǎ pwa̤ htě a ǐsha bè̌dubè̌na̤ na toǒ ayanu, ma̤lǒbemò̌ bǎ he a mî̌ napwa̤ma̤ta̤phû̌ htǒo.

³⁹ Ta̤ma̤sòwò̤ htě he ǐsha htǒonu ma̤tephekè bǎ he. Nata̤hî̌bǎlò̤yo̤ toǒnu awǒ mè̤mè̤̌.

⁴⁰ He sò̌phlǒsho jûle̤phî̌yo̤ mè̤mè̤̌ nata̤sû̌ǐtòwòǐ. Nacǒnatè̤ akhû̌akhî, ǐ he ta̤ǒhtûpwa̤ htě ate̤amǎ.

Ta̤nǎla̤ǐ Cǒmara ata̤sû̌ta̤tòwò

⁴¹ Kǒ Cǒmara tûjûpwa̤, pwǐ na olò̤ henu dǔlṳmò̌ he ta nata̤mo̤ǐ htě ahǎbòjòtò̤ ta nata̤ma̤lû̌htò̌genu.

⁴² He yṳnǎla̤ǐ nale̤nayo̤ akhû̌akhî, he glè hî̌geshǔjò gesǒ kòyò htě a pi̤jishǐcǒ he toǒ.

⁴³ He nǎla̤ǐ nata̤hî̌bǎlò̤yo̤ toǒ akhû̌akhî, ma̤jè he dě he glè hî̌bǎbò̌ yo̤sǎcǒtè̤ pṳ̂̌꤮ plǎ.

⁴⁴ He glè gana̤detû̌ nata̤sû̌ta̤tòwò tûjûpwa̤ talakhǎ.

⁴⁵ He jipwi̤ jûle̤phî̌yo̤ nata̤sû̌ǐtòwòǐ toǒ akhû̌akhî, he cû̌ bǎtè꤮ bǎbǎ, ta̤dǐkhǔdǐdò ǒtṳ nǒ he dǐcǎ꤮ tò̤.

⁴⁶ He glè pwe̤ǐlṳ nata̤hî̌bǎlò̤yo̤ toǒ dě Khwǐ toǒ alo̤mo̤. He lû̌kè tû̌ta ta̤sòwò̤.

⁴⁷ He mo̤ǐ nata̤mǎlò̤, a ma̤sò̌le̤sò̌lò̤ he.

⁴⁸ He bè̌dû̌ jûle̤phî̌yo̤ nata̤hî̌bǎlò̤yo̤ ta he ta̤mo̤ǐ. He gènè̤te̤mǎ ǐtû̌ nata̤mǎlò̤.

Ta̤yṳǎ Cǒmara ale̤ayo̤

⁴⁹ Gènè̤htò̌nṳ nayo̤ dě na hî̌kè napwa̤ma̤ta̤phû̌ amî̌ he htǒo. A ǐ heta̤kè̌shuǐ mî̌ pǒ̤꤮ nayo̤ htǒo pwǎ.

⁵⁰ Cǒmara ata̤olò̤ ǐ he ta̤ǒhtûpwa̤ te̤mǎ akhû̌akhî, bǎ he kè̌shǐbǎ ta ta̤pò̤ta̤sha akhanu, a ma̤mo̤ma̤wǒ hesò̌phlǒ.

⁵¹ Pwa̤ htě a phî̌dû̌phî̌htû ana̤nu toǒ pi̤jishǐcǒ mè̤mè̤̌ he pwǎ̤tadě he cû̌tephekè ta nata̤sû̌ta̤tòwò tò̤.

⁵² Kǒ Cǒmara tûjûpwa̤, bǎ he gènè̤htò̌to̤ nata̤hî̌bǎlò̤yo̤ dě꤮ awǐnu toǒ akhanu, a ma̤mo̤ma̤wǒ hesò̌phlǒ.

⁵³ Kòyòphû̌mò̤ toǒ wîkèbò nata̤sû̌ta̤tòwò akhû̌akhî, he sò̌phlǒdû̌ mè̤mè̤̌ asî.

⁵⁴ Bǎ he htû shǐtè̤mè̤ dě hǎkhû̌bǎo akhanu, he khwè̌ sò̌po̤htò̌ nata̤hî̌bǎlò̤ awi̤akè̌.

⁵⁵ Kǒ Cǒmara tûjûpwa̤, bǎ lṳmṳkhǐ akhanu, he gènè̤htò̌nṳ nami̤ akhû̌akhî, he jûle̤phî̌yo̤ nata̤sû̌ta̤tòwò.

⁵⁶ He gana̤de nata̤sû̌ǐtòwòǐ akhû̌akhî, he nî̤bǎ ta̤howi̤.

Ta̤ǐlò̤sò̌phlǒ dě Cǒmara ata̤sû̌ta̤tòwò akû

⁵⁷ Kǒ Cǒmara tûjûpwa̤, he nǎla̤ǐ pwǎ pǒ̤꤮ na. He olò̤ ta he glè gana̤de nale̤nayo̤.

⁵⁸ Dě na la̤kè̌dû̌ǐ he aya, he kè̌lǎsikè̌lǎǒ na. Pwǐ nata̤olò̤mèlò̤ ǒnu, gwèbǎǐ tû̌ he.

⁵⁹ He gènè̤te̤mǎ ǐtû̌ heta̤ǒhtûpwa̤, he htû̌tiwǐgesǒ dě nata̤hî̌bǎlò̤yo̤ aǒ.

⁶⁰ Ma̤pûhǐ he jûle̤phî̌yo̤ nata̤mǎlò̤ ayanu, he jîkhòjîyo tò̤, he ma̤phwèphwè.

⁶¹ Kòyòphû̌mò̤ toǒ cokloměbò he ta sǒpli̤ toǒ bǎbǎ, he shope̤ nǒ nata̤sû̌ta̤tòwò tò̤.

⁶² Nata̤hî̌bǎlò̤yo̤ toǒnu acǒatè̤ akhû̌akhî, he ihtǒ htû̌sò̌ǐ na bǎ lṳmṳna̤kha.

⁶³ He bǒsû̌khǎkho ta kòyò lǒ̤꤮ bò htě a ǐsha bè̌dubè̌na̤ na, a gûma̤kû̌ nata̤sû̌ǐtòwòǐnu toǒ.

⁶⁴ Kǒ Cǒmara tûjûpwa̤, nata̤mo̤ǐ htě ahǎbòjòtò̤ htǒo, aǒbe ta hǎkhû̌. Sû̌ǐtòwòǐ tû̌ he ta nata̤hî̌bǎlò̤yo̤.

Cǒmara ta̤sû̌ta̤tòwò htě ale̤dû̌pwî̤htû

⁶⁵ Kǒ Cǒmara tûjûpwa̤, pwǐ na olò̤htonu na ma̤mo̤ma̤wǒ ǐ napwa̤ma̤ta̤phû̌ amî̌ he htǒo.

⁶⁶ He yṳǎ nata̤mǎlò̤ akhû̌akhî, sû̌ǐtòwòǐ bǎ he ta̤sî̌ta̤jò ta ta̤sî̌khû̌sî̌ya htě awǒ.

⁶⁷ Bǎ na shò̌lò̤ hesò̌phlǒ hǒtò̤ akhanu, he cû̌sǔ sala̤ klè̌. Khònò̤ dě he jûle̤phî̌yo̤ nale̤nayo̤.

⁶⁸ Na wǒ mè̤mè̤̌, na ma̤ta̤ toǒ mî̌ awǒbòbò. Sû̌ǐtòwòǐ he ta nata̤hî̌bǎlò̤yo̤.

⁶⁹ Kòyò phî̌dû̌phî̌htû ana̤ toǒ dǒlòhǎlòhobò heyo̤. He dě he gana̤de tû̌꤮ nata̤sû̌ǐtòwòǐ toǒ ta hesò̌phlǒsamabò.

⁷⁰ Asî mî̌ kòyòǒò̌, a sî̌yaphlophǎbò̌ kû̌ nata̤sû̌ǐtòwòǐ tò̤. He lè̌dě he mo̤ǐ mè̤mè̤̌ nata̤sû̌ta̤tòwò.

⁷¹ Ma̤pûhǐ he phî̌nṳ ta̤sû̌ǐ dě nata̤hî̌bǎlò̤yo̤ akûnu, na shò̌lò̤ hesò̌phlǒ htǒo awǒ ta heya pwǎ.

⁷² Dě heya nata̤sû̌ta̤tòwò htǒomî̌ ale̤dû̌pwî̤htûkhlope ta wûhta lǒ̤꤮ bò.

Cǒmara ta̤sû̌ta̤tòwò dě atoabǎ

⁷³ Na bǒlò̤ he ta nacǔde. Ma̤pûhǐ he sû̌ǐ nata̤sû̌ta̤tòwò ayanu, ǐ he ta̤sî̌yaphlophǎ.

⁷⁴ Bǎ kòyò htě a ǐsha bè̌dubè̌na̤ na toǒ kè̌shǐ ta he kè̌shunǎla̤ǐ nale̤nayo̤ akhanu, asî sò̌le̤sò̌lò̤ lǒkho pě.

⁷⁵ Kǒ Cǒmara tûjûpwa̤, he sî̌ya ta na cèròcǒcèròtè̤. Na cǒtè̤ta nayo̤ akhû̌akhî, na shò̌lò̤ hesò̌phlǒ.

⁷⁶ Pwǐ na olò̤hto napwa̤ma̤ta̤phû̌ amî̌ he htǒo, ma̤mo̤ma̤wǒ he ta nata̤mo̤ǐ htě ahǎbòjòtò̤ htǒo.

⁷⁷ He mo̤ǐ nata̤sû̌ta̤tòwò akhû̌akhî, ma̤pûhǐ he ǒhtûpwa̤bò̌ ayanu, gwèbǎǐ he.

⁷⁸ Kòyò htě a phî̌dû̌phî̌htû ana̤nu toǒ ma̤jîma̤jûbò he akhû̌akhî, nosòwò̤bò asî. He lè̌dě he glè gènè̤te̤mǎǐ nata̤sû̌ǐtòwòǐ toǒ.

⁷⁹ Ma̤pûhǐ kòyò htě a ǐsha bè̌dubè̌na̤ na toǒ sî̌ya nata̤hî̌bǎlò̤yo̤ aya, nogetosǒ asî dě heǒ.

⁸⁰ Ma̤pûhǐ he lû̌kè ta ta̤sòwò̤ ayanu, he gana̤de te̤mǎbòtû̌ nata̤hî̌bǎlò̤yo̤ pě nî̌.

Ta̤kwisaba ta ta̤ma̤lû̌htò̌ge aya

⁸¹ He kè̌shuǐ nata̤ma̤lû̌htò̌ge, alòdǒlòde mè̤mè̤̌ he. He kè̌shu nǎla̤ǐ nale̤nayo̤.

⁸² He ǒpo̤kè̌shuǐ nata̤olò̤ lǒbehtò̌ aya, agaya̤bò hemi̤sǎphlǒ hǒ. He gwè ta, “Na ma̤mo̤ǐ hesò̌phlǒ bǎ titèkha pě?”

⁸³ He ǒlû̌ǒkhlo sǒsǒta shiophě htě kò wîkè nû̌ûnu pwǎ pwǎ̤tadě he shope̤kè nǒ nata̤hî̌bǎlò̤yo̤ tò̤.

⁸⁴ He mî̌ napwa̤ma̤ta̤phû̌ htǒo bǎ ǒpo̤yî̤po̤ pwî̌꤮ tè pě? Na glè cèròkè kòyò htě a ma̤jî henu toǒ bǎ titèkhatè?

⁸⁵ Kòyò htě a phî̌dû̌phî̌htû ana̤, a gana̤de kû̌ nata̤sû̌ta̤tòwò tò̤ toǒnu, a phoyo̤ lǒkho hǎkû ta he la̤lòte̤ aya.

⁸⁶ Lǒ̤꤮ bò nata̤mǎlò̤ toǒnu la̤yṳǎnǎla̤ǐbò. Ma̤jèmò̌ he nî̌, he ma̤sǔ nǒ dǐcǎ꤮ tò̤ pwǎ̤tadě asî ma̤꤮ jîma̤jûbò he.

⁸⁷ Asî glè̌ ma̤si cè̌cè̌ he. He lè̌dě he wîkè nònǒ nata̤sû̌ǐtòwòǐ tò̤.

⁸⁸ Ǐ htûpwa̤po̤ he ta nata̤mo̤ǐ htě ahǎbòjòtò̤ htǒonu. He gûma̤tû̌ pwǐ nata̤hî̌bǎlò̤yo̤nu pě.

Ta̤yṳnǎla̤ǐ Cǒmara ta̤hî̌bǎlò̤yo̤

⁸⁹ Kǒ Cǒmara tûjûpwa̤, nale̤nayo̤htǒo aǒměǒgle tûjûpwa̤, a ǒměǒgle tû̌ dě mǒkhû̌.

⁹⁰ Nata̤cǒtè̤yo̤sǎ htǒonu, a ǒměǒgle tuhtu hto tuhtu. Na noǒhtûhtò̌ hǎkhû̌ dě a ǒměǒgle pṳ̂̌꤮ plǎ.

⁹¹ Hǎkhû̌ gûma̤kû̌bò pwǐ na ta̤hî̌bǎlò̤yo̤nu. Nata̤hî̌bǎlò̤yo̤nu a ǒměǒglebò to̤꤮ khò̌ti̤ni̤.

⁹² Nata̤sû̌ta̤tòwò toǒ dè ma̤ sò̌le̤sò̌lò̤ he tò̤ hî̌mî̌, he glè sikè bǎ he kè̌shǐbǎ ta ta̤pò̤ta̤sha akha.

⁹³ He glè shope̤kè nǒ nata̤sû̌ǐtòwòǐnu toǒ dî̌kî̌꤮ tò̤. Nata̤sû̌ǐtòwòǐ akhû̌akhî, na ǐ he ta̤ǒhtûpwa̤ htě ate̤amǎ.

⁹⁴ He mî̌ napwa̤ma̤ta̤phû̌ tapwa̤. He jipwi̤ kè̌lǎ nata̤sû̌ǐtòwòǐ akhû̌akhî, ma̤lû̌htò̌ge mò̌ he.

⁹⁵ Kòyòphû̌mò̤ ǒpo̤ ma̤si he. He lè̌dě he gènè̤te̤mǎ nata̤hî̌bǎlò̤yo̤ toǒ.

⁹⁶ He kè̌shî̌sî̌ya ta ta̤pṳ̂̌꤮ tacǎ mî̌ a gutṳjòkèbò, pwǎ̤tadě nata̤mǎlò̤nu a gutṳjò tò̤.

Mo̤ǐ Cǒmara ata̤sû̌ta̤tòwò

⁹⁷ He mo̤ǐ mè̤mè̤̌ nata̤sû̌ta̤tòwò toǒ. He gènè̤te̤mǎ ǐtû̌ yǎ ti̤nǐ̤ mṳhǎ.

⁹⁸ He sî̌yaphlo nata̤mǎlò̤ pṳ̂̌꤮ taplǎ akhû̌akhî, he sî̌jòkhlo ta pwa̤sò̌khě henu.

⁹⁹ He gènè̤te̤mǎǐ nata̤hî̌bǎlò̤yo̤ htǒo akhû̌akhî, he gènè̤phlo gènè̤phǎkhlo ta hesara lǒ̤꤮ bò toǒ.

¹⁰⁰ He jûle̤phî̌yo̤ nata̤sû̌ǐtòwòǐ akhû̌akhî, he sî̌yaphlophǎkhlope ta̤ ta wè̤khǔwè̤pwa̤ toǒ.

¹⁰¹ Ma̤pûhǐ he jûle̤phî̌yo̤ nale̤nayo̤ toǒ ayanu, ta̤phû̌mò̤shî̌hto lǒ̤꤮ bò toǒnu he cû̌ tephekèbò.

¹⁰² Na sû̌ǐtòwòǐ te̤mǎ wǒ꤮ mè̤mè̤̌ he akhû̌akhî, he cû̌pa̤kè nǒ nata̤mǎlò̤ tò̤.

¹⁰³ Nale̤nayo̤nu ashukuu꤮. Ashukhlope ta wè̌khû̌shi.

¹⁰⁴ Nata̤sû̌ǐtòwòǐ ma̤jè he dě he mèpa̤jòta̤ akhû̌akhî, he sò̌khěkhû̌khwèkè klè̌sǔnu toǒ.

Ta̤lî ǒ dě Cǒmara ta̤sû̌ta̤tòwò ǒ hè

¹⁰⁵ Nale̤nayo̤ mî̌ asǒsǒta mî̌ko tama dě a shělîcû̌ bǎ hekhǎla̤kha. Asǒsǒta ta̤lî tacǎ dě a glè ma̤lî bǎ heklè̌.

¹⁰⁶ Pwǐ he bèlò̤hto heyo̤nu he gana̤de te̤mǎ nata̤mǎlò̤ htě acǒatè̤ pě.

¹⁰⁷ Kǒ Cǒmara tûjûpwa̤, he khòbǎjîkhòbǎjû mè̤mè̤̌ ta̤pò̤ta̤sha. Pwǐ na olò̤hto nayo̤nu ma̤lû̌htò̌gemò̌ he.

¹⁰⁸ Kǒ Cǒmara tûjûpwa̤, phî̌shǔkû̌ heta̤htû̌sò̌ǐ na ta hesò̌phlǒsamabò htǒo. Sû̌ǐtòwòǐ he ta nata̤mǎlò̤.

¹⁰⁹ He kè̌shǐshěto̤bǎ ta ta̤sita̤hǎmǎ pṳ̂̌꤮ taplǎ pwǎ̤tadě he shope̤kè nǒ nata̤sû̌ta̤tòwò tò̤.

¹¹⁰ Kòyòphû̌mò̤ dò̌nǎ he sumṳ pwǎ̤tadě he cû̌tûlû̌ khatî̤lî̤ nǒ nata̤sû̌ǐtòwòǐ tò̤.

¹¹¹ Nata̤hî̌bǎlò̤yo̤ toǒnu, a ma̤ sò̌le̤sò̌lò̤ hesò̌phlǒ. A htû heû̌cata̤bî̌ tûjûpwa̤.

¹¹² He bè̌lò̤ hesò̌phlǒ ta he glè jûle̤phî̌yo̤ nata̤hî̌bǎlò̤yo̤ to̤꤮ htû̌ he si.

¹¹³ He sò̌khě kòyò htě asò̌phlǒ wò̌wè̌ nûhtonûlò̤. He mo̤ǐ nata̤sû̌ta̤tòwò.

¹¹⁴ Na mî̌ hela̤ǒhǔ agûla̤, hegòtò̤. He kè̌shuǐ pwǎ pǒ̤꤮ nale̤nayo̤.

¹¹⁵ Kǒ kòyòphû̌mò̤ sî꤮, cû̌tepheyî̤kè ta he. He glè gana̤de hecǒmaradû̌ ata̤mǎlò̤.

¹¹⁶ Pwǐ nata̤olò̤ ǒnu, ǐ he ta̤khû̌ta̤ǎ pě꤮ mî̌ he glè ǒhtûpwa̤. Heta̤kè̌shuǐ htǒo akhû̌akhî, nohtûhtò̌ pûma̤ ta̤sòwò̤ ta heya ma̤.

¹¹⁷ Ma̤pûhǐ he lû̌htò̌ ayanu, ma̤jè he. He glè bè̌dubè̌na̤ nata̤hî̌bǎlò̤yo̤ pṳ̂̌꤮ taplǎ.

¹¹⁸ Na wîkè kòyò lǒ̤꤮ bò htě a cû̌tûlû̌ khatî̤lî̤ nata̤hî̌bǎlò̤yo̤. Asî telelòho toǒnu, la̤nala̤ǐ dǐcǎ꤮ tò̤.

¹¹⁹ Na wîkè kòyòphû̌mò̤ lǒ̤꤮ bò lò̤kèta kò wîkè ta̤wè̤ta̤sǒ. He glè mo̤ǐ nata̤hî̌bǎlò̤yo̤.

¹²⁰ He ǐsha mè̤mè̤̌ nala̤ dě he gònò̤gèglè. He ǐsha na̤cè̌ nata̤cèrò.

Ta̤gana̤de jûle̤phî̌yo̤ Cǒmara ale̤ayo̤

¹²¹ He ma̤pwǎ ta̤ htě atoabǎ, acǒatè̤. Wîkè pûma̤ he dě pwa̤ma̤jîma̤jû acǔdekû ma̤.

¹²² Olò̤mò̌ he a mî̌ napwa̤ma̤ta̤phû̌ htǒo ta na glè ma̤kwaǐ ma̤jè he. No ma̤jîma̤jû pûma̤ he ta kòyò phî̌dû̌phî̌htû ana̤nu toǒ ma̤ nî̌.

¹²³ He ǒpo̤kè̌shuǐ mè̤mè̤̌ nata̤ma̤lû̌htò̌ge, nata̤olò̤ cǒtè̤nu dě a gaya̤bò hegobo.

¹²⁴ Ma̤mo̤ma̤wǒ napwa̤ma̤ta̤phû̌ ta nata̤mo̤ǐ htě ahǎbòjò tò̤. Sû̌ǐtòwòǐ he ta nata̤hî̌bǎlò̤yo̤.

¹²⁵ He mî̌ napwa̤ma̤ta̤phû̌ tapwa̤. Ma̤pûhǐ he sî̌ya nata̤hî̌bǎlò̤yo̤ ayanu, ǐ he ta̤gènè̤phlophǎ.

¹²⁶ Kǒ Cǒmara tûjûpwa̤, kòyòhǎkhû̌phû̌ gana̤depe nata̤sû̌ta̤tòwò tò̤ akhû̌akhî, akhîakha to ta na to ma̤ ta̤ tacǎcǎ.

¹²⁷ Nata̤mǎlò̤ htǒonu, he mo̤ǐ mè̤mè̤̌khlope yǎta htaacè̌.

¹²⁸ He gû te̤mǎbò nata̤sû̌ǐtòwòǐ. He sò̌khěbò ta̤lòhǎlòho aklè̌aklò.

Sò̌yṳgana̤de Cǒmara ta̤sû̌ta̤tòwò

¹²⁹ Nata̤hî̌bǎlò̤yo̤nu acǒklî̌kî̌ya na̤cè̌, he gana̤de jûle̤phî̌yo̤bò.

¹³⁰ Nale̤nayo̤ ata̤sû̌ta̤tòwòǐ kòyò ta̤lî. A ǐphloǐphǎ kòyòǒò̌ toǒ.

¹³¹ He kè̌shuǐ mè̤mè̤̌ nata̤mǎlò̤ dě he lòdǒlòde.

¹³² Pwǐ na la̤klo ma̤jè kòyò htě a mo̤ǐ nami̤nu, htû̌tiwǐ kè̌to he, ma̤bwǐma̤sîrî he.

¹³³ Pwǐ nale̤nayo̤ ǒnu, yṳ̂klè̌nè̌klò bǎ hekhǎla̤kha. No to̤ pûma̤ he dě ta̤sǔta̤plě akû ma̤.

¹³⁴ Ma̤pûhǐ he jûle̤phî̌yo̤bò̌ nata̤sû̌ǐtòwòǐ ayanu, htè̌gemò̌ he dě pwa̤ma̤jîma̤jû acǔdekû.

¹³⁵ Kè̌mo̤kè̌wǒ napwa̤ma̤ta̤phû̌ a mî̌ he htǒo. Sû̌ǐtòwòǐ he ta nata̤hî̌bǎlò̤yo̤.

¹³⁶ Kò gana̤de nata̤sû̌ta̤tòwò tò̤ akhû̌akhî, he hǎ mi̤sǎshilò̤ lò̤kèta shilo̤mo̤ dû̌hè.

Cǒmara ale̤ayo̤ ata̤cǒta̤tè̤

¹³⁷ Kǒ Cǒmara tûjûpwa̤, na mî̌ pwa̤cǒpwa̤tè̤. Nata̤hî̌bǎlò̤yo̤ mî̌ atoabǎbò.

¹³⁸ Nata̤mǎlò̤nu, atoabǎ, agwa yṳnǎla̤ǐ.

¹³⁹ Pwa̤sò̌khě he toǒ shope̤nǎkèbò nale̤nayo̤ akhû̌akhî, he sò̌phlǒdû̌ gugè na̤cè̌.

¹⁴⁰ Nale̤nayo̤nu kò sèlèkè̌ dě acǒatè̤ mè̤mè̤̌ akhû̌akhî, napwa̤ma̤ta̤phû̌ mî̌ he htǒo mo̤ǐ mè̤mè̤̌ yǎ.

¹⁴¹ Kò kè̌to̤kû̌ he tò̤, kò gènè̤pî̌tî̌ he. Pwǎ̤tadě he shope̤ǐ nǒ nata̤sû̌ǐtòwòǐ tò̤.

¹⁴² Nata̤cǒta̤tè̤nu acǒatè̤ tûjûpwa̤. Nata̤sû̌ta̤tòwònu ate̤amǎ.

¹⁴³ Ta̤pò̤ta̤sha, ta̤guta̤gè hèbǎ he pwǎ̤ta nata̤mǎlò̤nu ama̤ sò̌le̤sò̌lò̤ he.

¹⁴⁴ Nata̤hî̌bǎlò̤yo̤nu acǒatè̤ tûjûpwa̤. Ǐ he ta̤gènè̤phlophǎ pěmî̌ he glè ǒhtûpwa̤ te̤mǎ.

Ta̤kwisaba ta ta̤lû̌htò̌ aya

¹⁴⁵ Kǒ Cǒmara tûjûpwa̤, he kwigwèbǎǐ na ta hesò̌phlǒ samabò, kǒshǔmò̌ he. He gana̤de tû̌ta nata̤hî̌bǎlò̤yo̤.

¹⁴⁶ Ma̤pûhǐ he gana̤de gûma̤ nata̤hî̌bǎlò̤yo̤ ayanu, he kwigwèbǎǐ na dě na glè ma̤lû̌htò̌ge he.

¹⁴⁷ Bǎ lṳmṳlîbû hǒtò̤ akhanu, he ihtǒ kwihtò̌ na ta̤ma̤jè. He nǎla̤ǐ pǒ̤꤮ pwǎ nale̤nayo̤.

¹⁴⁸ He sòklò tana̤꤮ mṳshě, he gènè̤te̤mǎǐ nale̤nayo̤ awi̤akè̌.

¹⁴⁹ Kǒ Cǒmara tûjûpwa̤, nata̤mo̤ǐnu ahǎbòjò tò̤ akhû̌akhî, gana̤de he ta̤kwigwèbǎǐhtò̌. Na ma̤toma̤bǎ ma̤cǒma̤tè̤ akhû̌akhî, ǐ ǒhtûpwa̤po̤ he.

¹⁵⁰ Kòyò htě a sò̌yṳma̤ ta̤phû̌mò̤ toǒ glè̌ hèshě he. Kòyònu toǒ ǒ tepheyî̤tû̌ aya ta nata̤sû̌ta̤tòwò.

¹⁵¹ Kǒ Cǒmara tûjûpwa̤, na ǒphǔ ta he. Lǒ̤꤮ bò nata̤mǎlò̤nu, atoabǎbò.

¹⁵² Nata̤hî̌bǎlò̤yo̤ ǒměǒgle tûjûpwa̤nu, he sî̌ya děwǐkhape.

Ta̤kwigwèbǎhtò̌ ta̤ma̤jè aya

¹⁵³ He shope̤ǐkè nǒ nata̤sû̌ta̤tòwò tò̤ akhû̌akhî, kè̌mò̌ heta̤pò̤ta̤sha dě ma̤lû̌htò̌kèmò̌ he.

¹⁵⁴ Ma̤kwaǐ he dě ǒkû̌ he tokho. Pwǐ na olò̤hto nayo̤nu ma̤lû̌htò̌kèmò̌ he.

¹⁵⁵ Kòyòphû̌mò̤ gana̤de jûle̤phî̌yo̤ kû̌ Cǒmara ata̤hî̌bǎlò̤yo̤ tò̤ akhû̌akhî, a ma̤lû̌htò̌gedǒ asî tò̤.

¹⁵⁶ Kǒ Cǒmara tûjûpwa̤, na gwèbǎǐ mè̤mè̤̌ kòyò. Pwǐ nata̤hî̌bǎlò̤yo̤ ǒnu ma̤lû̌htò̌ge heta̤htûpwa̤.

¹⁵⁷ Pwa̤ma̤jîma̤jû he toǒ bǎbǎ, pwa̤sò̌khě he toǒ bǎbǎ, a ǒplṳ̂ mè̤mè̤̌. He htû̌tiwǐkhǒkè nǒ nata̤hî̌bǎlò̤yo̤ tò̤.

¹⁵⁸ Kòyò htě a cǒtè̤ ta ayo̤ tò̤ toǒ jûle̤phî̌yo̤ nale̤nayo̤ tò̤ akhû̌akhî, he kè̌ dě he wi̤ja asî.

¹⁵⁹ Kǒ Cǒmara tûjûpwa̤, kè̌mò̌ lè, he mo̤ǐ mè̤mè̤̌ nata̤sû̌ǐtòwòǐ. Nata̤mo̤ǐnu a hǎbòjò tò̤ akhû̌akhî, ǐ ǒhtûpwa̤po̤ he.

¹⁶⁰ Nale̤nayo̤ lǒ̤꤮ bò mî̌ ate̤amǎ. Lǒ̤꤮ bò nata̤hî̌bǎlò̤yo̤ acǒatè̤nu, a ǒměǒgle tûjûpwa̤ talakhǎ.

Ta̤bè̌cahtǐ ta Cǒmara ta̤sû̌ta̤tòwò aya

¹⁶¹ He ma̤sǔma̤bò̌ pwa̤pǒta̤ dǐcǎ꤮ tò̤ pwǎ̤tadě asî ma̤jîma̤jû he. He ǐsha bè̌dubè̌na̤ pǒ̤꤮ pwǎ nale̤nayo̤ pwǎ.

¹⁶² Nale̤nayo̤ akhû̌akhî, he sò̌le̤sò̌lò̤ mè̤mè̤̌, asǒsǒta kòyò kè̌shǐ ta̤pwî̤dû̌le̤htû.

¹⁶³ He mo̤ǐ nata̤sû̌ta̤tòwò akhû̌akhî, he sò̌khěkhû̌khwè mè̤mè̤̌ ta̤hî̌bǎ lòhǎlòho.

¹⁶⁴ Nata̤hî̌bǎlò̤yo̤nu acǒatè̤ akhû̌akhî, he htû̌sò̌ǐ na ti̤ni̤ mî̌ susǒtaplǎ.

¹⁶⁵ Kòyò htě a mo̤ǐ nata̤sû̌ta̤tòwònu, a glè nî̤bǎ mè̤mè̤̌ ta̤ǒmo̤ǒkwǐ. Tacǎ꤮ sûcû̌jò asî dě klè̌sǔklè̌bǎ akû tò̤.

¹⁶⁶ Kǒ Cǒmara tûjûpwa̤, he ǒpo̤kè̌shuǐ nata̤ma̤lû̌htò̌ge. He gana̤de nata̤mǎlò̤.

¹⁶⁷ He jûle̤phî̌yo̤ mo̤ǐ mè̤mè̤̌ nata̤hî̌bǎlò̤yo̤.

¹⁶⁸ He jûle̤phî̌yo̤ nata̤sû̌ta̤tòwò ta nata̤hî̌bǎlò̤yo̤. He ma̤kwè̌꤮ titènu na sî̌yabò.

Ta̤kwisaba ta ta̤ma̤jè aya

¹⁶⁹ Kǒ Cǒmara tûjûpwa̤, heta̤kwigwèbǎǐhtò̌ nahtǒo a glè htò̌to̤tû̌ dě naǒ. Pwǐ nata̤olò̤ ǒ htonu, ǐ he ta̤gènè̤phlophǎ.

¹⁷⁰ Gana̤de he ta̤kwisabahtò̌ na. Pwǐ na olò̤htonu, ma̤lû̌htò̌gemò̌ he.

¹⁷¹ Na sû̌ǐtòwòǐ he ta nata̤hî̌bǎlò̤yo̤ akhû̌akhî, he glè htû̌sò̌ǐ na pṳ̂̌꤮ plǎ.

¹⁷² Nata̤mǎlò̤nu atoabǎbò akhû̌akhî, he glè sò̌po̤htû̌sò̌ǐ nale̤nayo̤.

¹⁷³ He gûma̤kû̌ nata̤sû̌ǐtòwòǐ akhû̌akhî, tîwî̌tòwònǎmò̌ ta na glè ma̤jè he.

¹⁷⁴ Kǒ Cǒmara tûjûpwa̤, he kè̌shunǎla̤ǐ nata̤ma̤lû̌htò̌ge. Nata̤sû̌ta̤tòwò ma̤ sò̌le̤sò̌lò̤ he.

¹⁷⁵ Ma̤pûhǐ he htû̌sò̌ǐbò̌ na ayanu, ǐ ǒhtûpwa̤po̤ he. Nata̤hî̌bǎlò̤yo̤ ma̤jè tû̌ta he nî̌.

¹⁷⁶ He sǒsǒta sophû̌ htě ate̤pe̤ nû̌û dě a cû̌sǔklè̌nu. He shope̤ǐkè nǒ nata̤mǎlò̤ dǐkhò̌꤮ tò̤ akhû̌akhî, cû̌ kè̌lǎgemò̌ napwa̤ma̤ta̤phû̌ mî̌ he htǒo.