Htû̌sò̌htò̌ 118 - Kawyaw RC

Ta̤hî̌bwǐhî̌sîrî ata̤kwisaba ta ta̤ma̤pè̤ aya

¹ Cǒmara tûjûpwa̤ wǒ mè̤mè̤̌, hî̌bwǐhî̌sîrîhtò̌ lǒkho yǎ. Ata̤mo̤ǐ htě ahǎbòjò tò̤nu, a ǒměǒgle tûjûpwa̤.

² No hî̌mò̌ Israelkhlilèphû̌ sîtoǒ ta, “Ata̤mo̤ǐ htě ahǎbòjò tò̤nu, a ǒměǒgle tûjûpwa̤.”

³ No hî̌mò̌ Aro akhlialè a mî̌ pwa̤lṳhtò̌ta̤ toǒ ta, “Ata̤mo̤ǐ htě ahǎbòjò tò̤nu, a ǒměǒgle tûjûpwa̤.”

⁴ No hî̌mò̌ kòyò htě a ǐsha bè̌dubè̌na̤ Cǒmara tûjûpwa̤nu toǒ ta, “Ata̤mo̤ǐ htě ahǎbòjò tò̤nu, a ǒměǒgle tûjûpwa̤.”

⁵ He shěto̤bǎ ta ta̤pò̤ta̤sha dě he kwigwèbǎǐ Cǒmara tûjûpwa̤. A gana̤de he ta̤kwihtò̌, a ma̤lû̌htò̌ he.

⁶ Cǒmara tûjûpwa̤ mî̌ pwa̤ htě a ma̤jè he. Kò ma̤ he hî̌tètè bǎbǎ, he ǐsha tò̤.

⁷ Cǒmara tûjûpwa̤ ǒkû̌ hetokho dě a ma̤jè he akhû̌akhî, a nokè̌shǐ he ta pwa̤sò̌khě he toǒ lò̤jûkè.

⁸ Nǎla̤ǐ Cǒmara tûjûpwa̤nu, awǒ꤮ khlo ta nǎla̤ǐ kòyòhǎkhû̌phû̌.

⁹ Nǎla̤ǐ Cǒmara tûjûpwa̤nu awǒ꤮ khlo ta nǎla̤ǐ pwa̤htûdû̌htûpwa̤ pě.

¹⁰ Lǒ̤꤮ bò khlilèphû̌ toǒ ǒte̤we̤bò he pwǎ̤tadě Cǒmara tûjûpwa̤ ma̤jè he akhû̌akhî, he ma̤pè̤kèbò asî.

¹¹ Asî ǒte̤we̤ he, aǒte̤we̤bò he pwǎ̤tadě Cǒmara tûjûpwa̤ ma̤jè he akhû̌akhî, he ma̤pè̤kèbò asî.

¹² Asî ǒte̤we̤bò he lò̤kèta wè̌ jolě̤lṳbǐ abǔnu. Pwǎ̤tadě asî siphwèkè lò̤ta mî̌gè sǒkhwenu. Cǒmara tûjûpwa̤ ma̤jè he akhû̌akhî, he ma̤pè̤kèbò asî.

¹³ Pwa̤sò̌khě he toǒ jipwi̤ shěshǔ he dě he glè̌ lò̤jû phǔtînî̌ pwǎ̤tadě Cǒmara tûjûpwa̤ ma̤jè he.

¹⁴ Cǒmara tûjûpwa̤ mî̌ heta̤khû̌ta̤ǎ, pwa̤ma̤kwaǐ he. A mî̌ pwa̤ htě a ma̤lû̌htò̌ge he.

¹⁵ Kòyòcǒkòyòtè̤ ma̤pè̤ pwa̤sò̌khě asînu akhû̌akhî, gana̤demò̌ lè. Asî kaǎgusò̌po̤ lǒkho dě ahǐphû̌kû ta, “Cǒmara tûjûpwa̤ mî̌ apo̤phǎshû̌sho mè̤mè̤̌.

¹⁶ “A ma̤jè pa ta ata̤po̤ta̤phǎ akhû̌akhî, pa ma̤pè̤ ta̤. “Cǒmara tûjûpwa̤ mî̌ apo̤phǎshû̌sho mè̤mè̤̌.”

¹⁷ He si hǒtò̤, he ǒhtûpwa̤pe pwǎ. He glè pwe̤ǐlṳ ta̤ htě Cǒmara tûjûpwa̤ ma̤htonu.

¹⁸ Cǒmara tûjûpwa̤ sû̌ǐwǒge shosho he hǐnudě a nosi he hǒtò̤.

¹⁹ Bòmo bǎ he ta̤lṳhtò̌ho atakhadû̌ htǒo. He glè nṳ hî̌bwǐhî̌sîrîhtò̌ Cǒmara tûjûpwa̤.

²⁰ Takhahtǒomî̌ Cǒmara tûjûpwa̤ atakhakû. Pǒ̤꤮ kòyòcǒkòyòtè̤ toǒ bǎ nṳbò bǎo.

²¹ Kǒ Cǒmara tûjûpwa̤, na gana̤de heta̤kwisaba, na ma̤lû̌htò̌ge he akhû̌akhî, he hî̌bwǐhî̌sîrîhtò̌ na.

²² Lo̤ htě kòyò ma̤htò̌ hǐ dě kò wîkè yǎ tamanu, a htûhtò̌ lo̤ htě alo̤bǎgutṳ̌ dě a tûhtû̌měbò hǐtama.

²³ Htǒonumî̌ Cǒmara tûjûpwa̤ ma̤ta̤ pwǎ. Ama̤ta̤ htǒonu mî̌ a cǒklî̌kî̌ya mè̤mè̤̌.

²⁴ Mṳni̤ khò̌ti̤ni̤ mî̌ mṳni̤ htě Cǒmara tûjûpwa̤ bè̌lò̤nǎ hǒ. Sò̌le̤sò̌lò̤ mo̤sû̌mo̤sò̌ plǒnû̌û.

²⁵ Kǒ Cǒmara tûjûpwa̤, ma̤lû̌htò̌kèmò̌ pa. Kǒ Cǒmara tûjûpwa̤, ǐ pa ta̤ma̤pè̤.

²⁶ Kòyò htě a hè ta Cǒmara tûjûpwa̤ ami̤ htǒotapwa̤nu, Cǒmara tûjûpwa̤ howi̤ tû̌ta a nî̌. Pa ǒ dě Cǒmara tûjûpwa̤ ahǐkû dě pa howi̤ sî lǒ̤꤮ bò.

²⁷ Cǒmara tûjûpwa̤ mî̌ pacǒmaradû̌, a ma̤mo̤ma̤wǒ pa. Cǐhè ta̤phû̌ta̤li̤ la̤lṳtòhtò̌nu dě comě nû̌û ta sǒpli̤ bǎ ta̤lṳwa̤ ane̤lo̤.

²⁸ Na mî̌ hecǒmaradû̌, he glè hî̌bwǐhî̌sîrîhtò̌ na. Na mî̌ hecǒmaradû̌, he glè htû̌sò̌ǐ na.

²⁹ Cǒmara tûjûpwa̤ wǒ mè̤mè̤̌, hî̌bwǐhî̌sîrîhtò̌ lǒkho yǎ. Ata̤mo̤ǐ htě ahǎbòjò tò̤nu, a ǒměǒgle tûjûpwa̤.