Htû̌sò̌htò̌ 116 - Kawyaw RC

Ta̤sî̌ya bwǐsîrî ata̤kwisabahtò̌

¹ Cǒmara tûjûpwa̤ gana̤de heta̤kwisaba ta heta̤kwigwèbǎǐhtò̌ akhû̌akhî, he mo̤ǐ yǎ.

² A dò̌wǒ anò̌ku dě heǒ akhû̌akhî, he dè ǒhtûpwa̤ nòpe hî̌mî̌, he glè kwisabahtò̌nò yǎ.

³ Ta̤si ǒte̤we̤ he lò̤ta kò dò̌ sumṳnu hǒ. He ǒphǔ꤮ ta lṳnǎkhwǎdo htǒonu. He kè̌shǐshěto̤bǎ ta ta̤pò̤ta̤shadû̌, ta̤sǎpla̤sǎyṳ.

⁴ Bǎnukha, he kwigwèbǎǐ Cǒmara tûjûpwa̤ ta, “Kǒ Cǒmara tûjûpwa̤, khòsò̌do ma̤lû̌htò̌ he.”

⁵ Cǒmara tûjûpwa̤ mî̌ a ma̤bwǐma̤sîrî kò, a ma̤toma̤bǎ. Pacǒmaradû̌ mî̌ a gwèbǎǐ mè̤mè̤̌ kòyò.

⁶ Cǒmara tûjûpwa̤ ma̤kwaǐ kòyò htě a shodo ta̤ma̤jènu toǒ. Bǎ he shěto̤bǎ ta ta̤pò̤ta̤sha adû̌ayǒ akhanu, a ma̤lû̌htò̌ he.

⁷ Cǒmara tûjûpwa̤ ma̤wǒmè̤mè̤̌ heya akhû̌akhî, “Ǒkǔ gesǒ mò̌,” he hî̌ hena̤ hǐnu.

⁸ Na ma̤lû̌htò̌ge he dě ta̤si akla. He mi̤sǎshilò̤ nǒpe tò̤, he htò̌tukhu nǒpe tò̤.

⁹ He ǒhtûpwa̤ dě Cǒmara tûjûpwa̤ ata̤kè̌ǐkhwè̌ǐ ala̤, bǎ kòyòhǎkhû̌phû̌ ǒǐ hǎkhû̌ htǒonu pě.

¹⁰ “Kǒ Cǒmara tûjûpwa̤, he shěto̤bǎ mè̤mè̤̌ ta ta̤jîta̤jû,” he hî̌ hǐnu bǎbǎ, he yṳǎpe pwǎ na.

¹¹ He sò̌gònò̤ dě he hî̌ ta, “Kòyò lǒ̤꤮ bò mî̌ kòyò lòhǎlòho pwǎ.”

¹² Ta̤ lǒ̤꤮ bò htě Cǒmara tûjûpwa̤ ma̤bwǐma̤sîrî he toǒnu, he cû̌ plěgeshǔjò yǎ hî̌tè?

¹³ He hèlṳtòhtò̌ sobîshisî̌yo̤ htǒo ta Cǒmara tûjûpwa̤ pě. A ma̤lû̌htò̌ge he akhû̌akhî, he glè htû̌sò̌ǐ Cǒmara tûjûpwa̤ ami̤.

¹⁴ He ma̤lǒma̤be tû̌ heta̤olò̤ heyo̤ ta Cǒmara tûjûpwa̤nu toǒ dě akòyò lǒ̤꤮ bò alo̤mo̤ pě.

¹⁵ Bǎ Cǒmara tûjûpwa̤ akòyò htě acǒtè̤ta ayo̤ toǒ si akhanu, a le̤dû̌pwî̤htû mè̤mè̤̌ nû̌ûya.

¹⁶ Kǒ Cǒmara tûjûpwa̤, he mî̌ napwa̤ma̤ta̤phû̌ tapwa̤. He mî̌ napwa̤ma̤ta̤phû̌ sǒsǒpwǐ hemo̤nu. Na ma̤lû̌htò̌ge he dě ta̤si akla.

¹⁷ He ma̤si lṳtòhtò̌ ta̤phû̌ta̤li̤ ta ta̤hî̌bwǐhî̌sîrî ata̤lṳta̤tò̌ ta na pě. He glè htû̌sò̌ǐ Cǒmara tûjûpwa̤ ami̤.

¹⁸ He ma̤lǒma̤be tû̌ heta̤olò̤ heyo̤ ta Cǒmara tûjûpwa̤nu toǒ dě akòyò lǒ̤꤮ bò alo̤mo̤ pě.

¹⁹ Kǒ Yerǔshèlèwî̤ phû̌ toǒ, he ma̤lǒma̤be tû̌ heta̤bèlò̤ heyo̤ htǒo dě Cǒmara tûjûpwa̤ ata̤lṳhtò̌ho ǒǐ wî̤sò̌go htǒonu pě. Htû̌sò̌ǐ Cǒmara tûjûpwa̤.