Htû̌sò̌htò̌ 115 - Kawyaw RC

Cǒmara ta pwa̤yo̤ toǒ awi̤akè̌

¹ Kǒ Cǒmara tûjûpwa̤, na cǒtè̤ ta yo̤, na mo̤ǐ pa ta ta̤mo̤ǐ htě ahǎbòjòtò̤ akhû̌akhî, pa bè̌dubè̌na̤ na, pa bè̌dubè̌na̤ tû̌꤮ na tapwǎ̤꤮ pa. Pa bǎ bè̌dubè̌na̤ ǐtû̌ pana̤ tò̤.

² Mî̌ma̤tè̤dě khlilèphû̌ toǒ cû̌hî̌tǒ̤ ta, “Asî acǒmaradû̌ ǒ dě bǎtè?”

³ Pacǒmaradû̌ mî̌ a ǒ dě mǒkhû̌. A sò̌yṳma̤ hî̌tè꤮ mî̌ a ma̤.

⁴ Pwǎ̤tadě asîcǒmara pwa̤yo̤ toǒnu, kòyòhǎkhû̌phû̌ bǒ nû̌û. Dě kò ma̤pwǎ nû̌û ta wûhta.

⁵ Pwa̤yo̤ toǒnu, akhû̌phě ǒ hǐnudě a hî̌bǎjò tò̤. Ami̤sǎphlǒ ǒ hǐnudě a kè̌shǐjò tò̤tò̤.

⁶ Anò̌ku ǒ hǐnudě a gana̤dejò tò̤. Anò̌khi ǒ hǐnudě a nṳsajò tò̤tò̤.

⁷ Acǔde ǒ hǐnudě aphî̌jò tò̤. Akhò̌lopo̤ ǒ hǐnudě a cû̌jò tò̤. Htohǒtò̤, ayo̤sǎ po̤htò̌jò dě agokû tò̤tò̤.

⁸ Lǒ̤꤮ bò kòyò htě a bǒ pwa̤yo̤nu toǒ bǎbǎ, a yṳnǎla̤ǐ pwa̤yo̤nu toǒ bǎbǎ, a glè sǒsǒkû̌ tû̌ta pwa̤yo̤.

⁹ Kǒ Israelkhlilèphû̌ sî꤮, yṳnǎla̤ǐ Cǒmara tûjûpwa̤. A mî̌ pwa̤ma̤jè sî, pwa̤ma̤kwaǐ sî.

¹⁰ Kǒ Aro akhlialè sî꤮, yṳnǎla̤ǐ Cǒmara tûjûpwa̤. A mî̌ pwa̤ma̤jè sî, pwa̤ma̤kwaǐ sî.

¹¹ Kǒ kòyò htě a ǐsha bè̌dubè̌na̤ Cǒmara tûjûpwa̤ toǒ꤮, yṳnǎla̤ǐ Cǒmara tûjûpwa̤. A mî̌ pwa̤ma̤jo sî, pwa̤ma̤kwaǐ sî.

¹² Cǒmara tûjûpwa̤ gènè̤htò̌nṳ pa, a glè howi̤ pa. A glè howi̤ Israelkhlilèphû̌. A glè howi̤ Aro akhlialè.

¹³ Kòyò htě a ǐsha bè̌dubè̌na̤ Cǒmara tûjûpwa̤ toǒnu, kòyò htě kò lo̤bǎdû̌ nû̌û bǎbǎ, kò lo̤bǎdû̌ nû̌û tò̤ bǎbǎ, a glè howi̤bò asî.

¹⁴ Cǒmara tûjûpwa̤ noǒwo̤ǒhtò̌ tû̌ta sî ta sîphû̌sîli̤ nî̌.

¹⁵ Cǒmara tûjûpwa̤ dě a bǒlò̤ mǒkhû̌ ta hǎkhû̌ htǒotapwa̤ howi̤tû̌ sî nî̌.

¹⁶ Mǒkhû̌ mî̌ pǒ̤꤮ Cǒmara tûjûpwa̤ ata. Hǎkhû̌ lè̌dě a ǐ nû̌ûta kòyòhǎkhû̌phû̌.

¹⁷ Kòyò htě a sihtohǒ toǒ bǎbǎ, a cû̌to̤kè dě lṳnǎkhwǎdo toǒ bǎbǎ, a htû̌sò̌ǐjò Cǒmara tûjûpwa̤ tò̤.

¹⁸ Pa htě ahtûpwa̤ htǒotoǒ lè̌dě pa glè htû̌sò̌ǐ Cǒmara tûjûpwa̤. Pa glè htû̌sò̌ǐ khònò̤ tǒ̤hè tûjûpwa̤talakhǎpwǎ. Htû̌sò̌ǐ Cǒmara tûjûpwa̤.