Htû̌sò̌htò̌ 112 - Kawyaw RC

Kòyòcǒkòyòtè̤ ata̤howi̤ toǒ

¹ Htû̌sò̌ǐ Cǒmara tûjûpwa̤. Kòyò htě a ǐsha bè̌dubè̌na̤ Cǒmara tûjûpwa̤ dě a sò̌phlǒǒ ta jûle̤phî̌yo̤ kû̌ nû̌û ta̤mǎlò̤nu a nî̤bǎ ta̤howi̤.

² Bǎ hǎkhû̌bǎo, aphû̌ali̤ shû̌sho pě. Kòyòcǒkòyòtè̤ akhlialè nî̤bǎ ta̤howi̤ pě.

³ Ta̤pwî̤dû̌le̤htû, ta̤dû̌yò̤htò̌sa sîtoǒ ǒ dě ahǐphòdǒkû. Ata̤cǒta̤tè̤ glè ǒměǒgle tûjûpwa̤.

⁴ Asî ma̤bwǐma̤sîrî kò, gwèbǎǐ kò, acǒatè̤ akhû̌akhî, a lò̤kèta ta̤lî tama dě a lîrakhalṳ bǎ kòyòsò̌phlǒwǒ.

⁵ Kòyò htě a sò̌leǐ ata tò̤, a ǐbǒǐlo̤ kò, a pṳ̂cǒpṳ̂tè̤ wûhtanu, a ǎbǎobǎ pě.

⁶ Kòyòsò̌phlǒwǒnu, a lò̤jûlò̤po̤ dǐkhò̌꤮ tò̤. Kò shope̤nǎjò nû̌û dǐkhò̌꤮ tò̤tò̤.

⁷ A gana̤de ta̤wi̤ta̤kè̌ htě awǒtò̤ toǒ bǎbǎ a ǐsha tò̤. A yṳnǎla̤ǐ Cǒmara tûjûpwa̤ akhû̌akhî, a sò̌phlǒshû̌ sò̌phlǒsho mè̤mè̤̌.

⁸ A sò̌phlǒshû̌ sò̌phlǒsho mè̤mè̤̌ dě a ǐsha dǐcǎ꤮ tò̤. Dě anǒkò pě dě, a kè̌shǐ Cǒmara ma̤pè̤kè bǎ nû̌û pwa̤sò̌khě nû̌û toǒ pě.

⁹ Pwa̤cǒpwa̤tè̤ tapwa̤ sò̌phlǒsho ma̤jè kòyò shèwèphû̌. Ata̤cǒta̤tè̤ htǒonu, a ǒměǒgle tûjûpwa̤ hǒ. A nî̤bǎ ta̤sîrîdû̌sîrîhtû, kò bè̌dubè̌na̤ nû̌û pě.

¹⁰ Kòyòphû̌mò̤ kè̌shǐ ata̤ma̤ dě a sò̌phlǒgu sò̌phlǒgè mè̤mè̤̌ pě. Asî sò̌phlǒdû̌ kwîbò akhû̌khi dě a hǎmǎkèbò pě. Ata̤sò̌yṳ toǒnu, a nî̤bǎpe dǐcǎ꤮ tò̤.