Htû̌sò̌htò̌ 111 - Kawyaw RC

Htû̌sò̌ǐ Cǒmara tûjûpwa̤ ata̤ma̤wǒ

¹ Htû̌sò̌ǐ Cǒmara tûjûpwa̤. Bǎ kòyòcǒkòyòtè̤ ta kòyòprṳ̂ho subusabahtu nû̌û akhanu, he glè hî̌bwǐhî̌sîrîhtò̌ Cǒmara tûjûpwa̤ ta hesò̌phlǒ samabò.

² Cǒmara tûjûpwa̤ ma̤ta̤nu acǒklî̌kî̌ya mè̤mè̤̌. Kòyò htě asò̌phlǒǒ ta̤ma̤ cǒklî̌kî̌ya toǒnu, a kè̌lǎsî̌ya lǒkho.

³ Ata̤ma̤ toǒnu, a lǒbe ta ta̤sîrîdû̌sîrîhtû, ta̤sîrîpo̤phǎ. Ata̤cǒta̤tè̤ toǒnu a gutṳjòpe tò̤.

⁴ A noto̤ǐ kò ta ata̤ma̤cǒklî̌kî̌ya. Cǒmara tûjûpwa̤ mî̌ a ma̤bwǐma̤sîrî, gwèbǎǐ kòyò.

⁵ A ǐǎǐo kòyò htě a ǐsha bè̌dubè̌na̤ nû̌ûnu. A to̤ǐ ata̤wṳ̂dò pṳ̂̌꤮ taplǎ.

⁶ Dě a ǐkè khlilèphû̌hǔwa̤ toǒ hǎkhû̌ ta akòyò akhû̌akhî, a dǔlṳ akòyò sîtoǒ ta ata̤ma̤ htě asîrîpo̤phǎ dû̌꤮ mè̤mè̤̌nu hǒ.

⁷ Lǒ̤꤮ bò a ma̤ta̤ toǒnu acǒatè̤, atoabǎ. Lǒ̤꤮ bò ata̤mǎlò̤ toǒnu, a gwa yṳnǎla̤ǐ mè̤mè̤̌.

⁸ Ta̤mǎlò̤ htǒotoǒ mî̌ a ǒměǒgle tûjûpwa̤. Cǒmara ǐlò̤ ata̤mǎlò̤ ta acǒatè̤, atoabǎbònu.

⁹ Cǒmara ma̤lû̌htò̌ akòyò. A olò̤ ata̤wṳ̂dò tûjûpwa̤. A mî̌ Cǒmara htě acahtǐ, Cǒmara htě kò ǐsha bè̌dubè̌na̤ǐ nû̌ûmi̤nu tapwa̤.

¹⁰ Ta̤ǐsha bè̌dubè̌na̤ Cǒmara tûjûpwa̤ mî̌ ta̤sî̌ta̤jò akòshî̌kòtṳ. Lǒ̤꤮ bò kòyò htě a jûle̤phî̌yo̤ nû̌ûta̤mǎlò̤ toǒnu, a glè nî̤bǎ ta̤sî̌yaphlophǎ. Kò glè htû̌sò̌htò̌ǐ nû̌û tûjûpwa̤.