Htû̌sò̌htò̌ 109 - Kawyaw RC

Kwihtò̌ ta̤ma̤jè dě Cǒmara tûjûpwa̤ aǒ

Khwǐdǎ̤wi̤ ata̤sò̌po̤ htû̌sò̌ǐ. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒlǒkòdû̌ dě ta̤lṳhtò̌hokûnu tapwa̤ aya.

¹ Kǒ Cǒmaradû̌, he htû̌sò̌ǐ na. Jîkoo pûma̤ nî̌.

² Kòyòphû̌mò̤, kòyòcè̌klè lòhoǎ kò toǒnu, a hî̌ tukutakǎbò he. Asî dǒ lòhǎlòhobò heyo̤.

³ Asî ǒte̤we̤, hî̌bǎ sò̌khěkhû̌khwèbò he. He ma̤sǔma̤plě asî dǐcǎ꤮ tò̤ pwǎ̤ta asî hèshěbò he.

⁴ He mo̤ǐ asî pwǎ̤ta asî bè̌ lǒkhope he ta̤sǔpe. He saba sadape pwǎ asîya.

⁵ He ma̤wǒpwǎ asî pwǎ̤tadě asî ma̤phû̌mò̤ còcè̌꤮ he. He mo̤ǐ asî pwǎ̤tadě asî sò̌khěkhû̌khwè lǒkho he.

⁶ Wû̌lǎ kòyòphû̌mò̤ tapwa̤ dě noma̤shǔkè yǎta anu. No ihtǒǒ pwa̤cèkwè̌ nû̌û ta̤sǔ dě akòshî̌ tapwa̤nu.

⁷ Bǎ kò sèlèkè̌ nû̌û akhanu, kò bè̌ nû̌û ta̤sǔ pě nî̌. Ata̤kwisabanu, nohtûhtò̌kè yǎ pwǐ ta̤sǔnu nî̌.

⁸ Amṳni̤mṳsa phǔtǔkè tû̌ta pě nî̌. Kò nṳma̤ tû̌ta agûla̤ tapwa̤pwa̤ pě nî̌.

⁹ Aphû̌ toǒ shodophakè tû̌ta pě nî̌. Ama ǒkhwè̌kè tû̌ta pě nî̌.

¹⁰ Aphû̌ toǒ htûkèbò tû̌ta pwa̤kwiǎta̤ pě nî̌. Asî ǒ dě ahǐphòyò̤kû dě bǎ hǎhtò̌cû̌ kè̌lǎǎtû̌ ala̤ǎla̤o pě nî̌.

¹¹ Kòyò htě ashû̌ ǒ kònu toǒ phî̌kèbò tû̌ta nû̌ûta̤kî̌ta̤kû̌ pě nî̌. Shihǔwa̤gakhlophû̌ toǒ phî̌sigwikèbò tû̌ta nû̌ûta̤kî̌ta̤kû̌ htě a ǎwè̤ǐnu toǒ pě nî̌.

¹² No ǒpûma̤ kòyò htě a ma̤mo̤ma̤wǒ nû̌û tapwǎ̤꤮ ma̤. No ǒpûma̤ kòyò htě a gwèbǎǐ nû̌ûphû̌ dě a shodophanu toǒ dǐpwǎ̤꤮ ma̤ma̤.

¹³ Akhlialè toǒ tṳkè tû̌ta pě nî̌. Kòyò nǒkò tuhtu pě toǒ shope̤nǎ phlǔkèbò tû̌ta nû̌ûmi̤ pě nî̌.

¹⁴ Cǒmara tûjûpwa̤ to̤mǎǐ tû̌ta aphiaphu sîtoǒ ata̤sǔta̤plě nî̌. Bòlû̌ pûma̤ bǎ amo̤ ta̤sǔnu ma̤ nî̌.

^15-16 A ma̤mo̤ma̤wǒ kû̌kò tò̤, a ma̤jîma̤jû, ma̤sima̤hǎmǎ kòyò htě kò pè̤ǎpè̤o nû̌û, kòyò htě a shodo pwa̤ma̤jè ta kòyòsò̌phlǒpî̌nu toǒ akhû̌akhî, Cǒmara tûjûpwa̤ to̤mǎǐ tû̌ta asî ta̤ma̤sǔ htǒo pṳ̂̌꤮ taplǎ nî̌. Bǎ hǎkhû̌bǎo nogènè̤to̤pe pûma̤ kò ta ami̤ htǒo ma̤.

¹⁷ A sò̌yṳ ǐsho còcè̌꤮ kò akhû̌akhî, nolò̤bǎ gesǒtû̌ yǎta ta̤ǐsho nî̌. A sò̌yṳ howi̤homò̤ kû̌kò dǐkhò̌꤮ tò̤ akhû̌akhî, nonî̤bǎ pûma̤ a ta̤howi̤homò̤ dî̌kî̌꤮ ma̤.

¹⁸ No bote̤we̤bǐtû̌ yǎta ta̤ǐsho pwǐ a sǒ hǐdonu. No sǐcǒnṳtû̌ ta̤ǐsho sǒsǒta hǐdopo̤to̤shi sǐcǒnṳ dě aphěyî̌kûnu. No sǐcǒnṳtû̌ ta̤ǐsho sǒsǒta htǒshi sǐcǒnṳ dě khwǐgîkûnu.

¹⁹ Ta̤ǐsho htǒonu noǒte̤we̤bǐbòtû̌ yǎ pwǐ a sǒte̤we̤bǐbò hǐdonu. Ta̤ǐsho htǒonu note̤we̤bǐbòtû̌ yǎ pwǐ kò wò̤te̤we̤ sò̌to̤ pṳ̂̌ni̤ni̤nu.

²⁰ Cǒmara tûjûpwa̤ ma̤ geshǔsǒtû̌ kòyò htě a bè̌ he ta̤sǔ, a hî̌ phû̌mò̤ henu nî̌.

²¹ Kǒ Cǒmara tûjûpwa̤, heběcǎ ta̤adû̌, la̤bè̌dubè̌na̤ nami̤wî̤mi̤wǒ htǒoaya, ma̤jè mò̌ he. Nata̤mo̤ǐ htě ahǎbòjò tò̤ htǒonu awǒ꤮ mè̤mè̤̌ akhû̌akhî, ma̤lû̌htò̌kèmò̌ he.

²² Kò pè̤ǎpè̤o he, he shodo pwa̤ma̤jè. Asha꤮ mè̤mè̤̌ hesò̌phlǒ.

²³ He glè̌ hǎmǎphwèkè lò̤kèta heyo̤ǔ hǎmǎkè bǎ lṳmṳlò̤ akha. He sǒsǒta dèpo̤ dě gili̤sǎ lûcû̌hǎmǎkè nû̌ûnu.

²⁴ He dǔǎ shǎ akhû̌akhî, hekhò̌dela̤ jabò hǒ. A ǒkè pwǎ pǒ̤꤮ hekhwǐ ta hephě pwǎ.

²⁵ Pwa̤sò̌khě he toǒ kè̌shǐ he bǎtè tò̤glò tè꤮ bǎbǎ, a pi̤jishǐcǒbò he. A nǒ lǒkho ahǐkǒ dě a luya̤bò he.

²⁶ Kǒ Cǒmara tûjûpwa̤, hecǒmaradû̌, ma̤jèmò̌ he. Nata̤mo̤ǐ hǎbòjò tò̤ akhû̌akhî, ma̤lû̌htò̌ge he.

²⁷ Kǒ Cǒmara tûjûpwa̤, nosî̌yate̤mǎ asî ta na ma̤ta̤ lǒ̤bò, na ma̤htûhtò̌bò yǎta nana̤.

²⁸ Asî dě a ǐsho he, na dě na howi̤homò̤ he. Bǎ asî hèshě he akhanu, nolò̤jûkèbòtû̌ asî, pwǎ̤tadě nosò̌le̤sò̌lò̤tû̌ napwa̤ma̤ta̤phû̌ mî̌ hehtǒo nî̌.

²⁹ Pwa̤sò̌khě he toǒ sòwò̤ mi̤sǎpî̌bò tû̌ta nî̌. No kûsǒhtò̌bò asî ta̤sòwò̤ pwǐ kò kûsǒhtò̌bǐ kòna̤ ta hǐdopo̤to̤nu.

³⁰ He glè hî̌bwǐsîrî mè̤mè̤̌ Cǒmara tûjûpwa̤. He glè htû̌sò̌ǐ yǎ dě kòyòprṳ̂ho akla.

³¹ Cǒmara tûjûpwa̤ ma̤kwa dǐdòshǔ, ma̤lû̌htò̌ge kòyò htě a shodo pwa̤ma̤jè dě kò cèròsi nû̌ûnu.