Htû̌sò̌htò̌ 107 - Kawyaw RC

Ta̤htû̌sò̌ǐalî̤ yè̤̌bǎ tabǎ Cǒmara tûjûpwa̤ ata̤mo̤ǐ htě ahǎbòjò tò̤

¹ Nohî̌bò kò ta, Cǒmara tûjûpwa̤ wǒ mè̤mè̤̌, hî̌bwǐhî̌sîrîhtò̌ lǒkho yǎ. Ata̤mo̤ǐ htě ahǎbòjò tò̤nu, a ǒměǒgle tûjûpwa̤.

² Kòyò htě Cǒmara tûjûpwa̤ ma̤lû̌htò̌ge nû̌ûnu toǒ, kòyò htě a htè̌genṳ nû̌û dě pwa̤sò̌khě asî toǒ cǔdekûnu toǒ bǎbǎ,

³ Kòyò htě a kaǎgeplǒbò dě shihǔwa̤gakhlo dě mṳhtò̌ tokho, mṳlò̤ tokho, cǔmû ta cǔcî̌ tokhonu toǒ bǎbǎ, hî̌bwǐhî̌sîrîhtò̌ lǒkho nû̌û.

⁴ Kòyò toǒǒ lète̤we̤bò nòdû̌ khîkha bǎ lo̤mî̌shǒklakhû̌. Asî kè̌shǐ klè̌ la̤cû̌ dě asî la̤ǒǐ wî̤nu tî̤wî̤ tò̤.

⁵ Asî sǎǎsò̌o mè̤mè̤̌ shǎǎshǎo, a glè̌ phǔsibò.

⁶ Asî ǒ dě ta̤pò̤ta̤sha akû dě a kwigwèbǎǐ Cǒmara tûjûpwa̤. A ma̤lû̌htò̌ge asî dě ta̤khòbǎyò̤bǎ akû.

⁷ Ma̤pûhǐ asî cû̌to̤ dě asî la̤ǒ wî̤nu tî̤wî̤ ayanu, a sûcû̌ asî ta klè̌toklè̌bǎnu tobo.

⁸ Cǒmara tûjûpwa̤ mo̤ǐ kòyòhǎkhû̌phû̌ ta ata̤mo̤ǐ htě ahǎbòjò tò̤nu dě a ma̤ bǎ kò ta̤cǒklî̌kî̌ya htǒo akhû̌akhî, nohî̌bwǐhî̌sîrîhtò̌ mò̌ asî.

⁹ A ǐokǒobe kòyò htě a hǒwi̤sò̌o shinu. A ǐǎkǒobe kòyò htě a hǒwi̤sǎǎ shǎǎshǎonu.

¹⁰ Kòyò toǒǒ ǒ lǒkho bǎ gûla̤ htě akhǐsuwu mè̤mè̤̌ akû. Asî lòte̤bò dě apo̤kû, kò coklomě asî ta sǒpli̤ te̤htò̌.

¹¹ Asî ma̤tukutakǎshǔ Cǒmaradû̌ hî̌lò̤ yo̤, a jûle̤phî̌yo̤ kû̌ Cǒmara htě adû̌ahtûkhlo kò htǒotapwa̤ ata̤sû̌ǐtòwòǐ tò̤ akhû̌akhî, asî khòbǎ lǒkho hǐnu.

¹² Ma̤pûhǐ asî yò̤ lǒkho asò̌phlǒnu, Cǒmara nophî̌noma̤ asî ta̤ma̤ ta ajîajûnu. Asî shěto̤bǎbò ta ta̤pò̤ta̤sha dě pwa̤ ma̤jè asî ǒ dǐpwǎ̤꤮ tò̤.

¹³ Ashuphǔshèwè mè̤mè̤̌ asî dě kwigwèbǎǐhtò̌ Cǒmara tûjûpwa̤. A ma̤lû̌htò̌ge asî dě ta̤khòbǎyò̤bǎ akû.

¹⁴ A kaǎhǎhtò̌ asî dě gûla̤ akhǐsuwu mè̤mè̤̌nu tò̤glò akû. A ma̤tṳkèbò bǎ asî sǒpli̤ te̤htò̌.

¹⁵ Cǒmara tûjûpwa̤ mo̤ǐ kòyòhǎkhû̌phû̌ ta ata̤mo̤ǐ htě ahǎbòjò tò̤nu dě a ma̤ bǎ kò ta̤cǒklî̌kî̌ya htǒo akhû̌akhî, nohî̌bwǐhî̌sîrîhtò̌ mò̌ asî.

¹⁶ A ma̤pò̌bò apo̤kû takhadû̌ toǒ htě kò ma̤ yǎta tîlîbò. A ma̤gabò te̤htò̌bo htě kò wo̤dǐdònu.

¹⁷ Kòyònòdû̌ hǐkǒshò̌, ma̤toma̤bǎ ta̤ tò̤. Asî ma̤sǔma̤plě hǐnuakhû̌akhî, ashǐashabò.

¹⁸ Asî wi̤jabò shǎǎshǎo pṳ̂̌꤮ tacǎ. Asî glè̌ phǔsi tînî̌ bò.

¹⁹ Asî ǒ dě ta̤pò̤ta̤sha akû dě a kwigwèbǎǐ Cǒmara tûjûpwa̤. A ma̤lû̌htò̌ge asî dě ta̤sò̌phlǒgusò̌phlǒgè akû.

²⁰ A hî̌lò̤ ayo̤ dě a ma̤hǎmǎ bǎ asî ta̤sha. A ma̤lû̌htò̌ge asî dě ta̤si akla.

²¹ Cǒmara tûjûpwa̤ mo̤ǐ kòyòhǎkhû̌phû̌ ta ata̤mo̤ǐ htě ahǎbòjò tò̤nu dě a ma̤ bǎ kò ta̤cǒklî̌kî̌ya htǒo akhû̌akhî, nohî̌bwǐhî̌sîrîhtò̌ mò̌ asî.

²² Nolṳhtò̌ asî ta̤hî̌bwǐsîrî ata̤lṳta̤tò̌nu. Nosò̌le̤sò̌lò̤ sò̌po̤ hî̌lṳ asî ta ta̤ htě a ma̤hto bǎ asînu.

²³ Kòyò toǒǒ cû̌ge ta sǒkhlidû̌ dě shidû̌shite̤we̤kû, asî ma̤guma̤khè̌ ta̤ bǎnu.

²⁴ Asî kè̌shǐ Cǒmara tûjûpwa̤ ata̤phî̌ta̤ma̤. Asî kè̌shǐ ata̤ma̤ cǒklî̌kî̌ya dě shidû̌shite̤we̤yo̤ akû.

²⁵ A hî̌lò̤pwǎ ayo̤ dě gili̤sǎplǎwi̤, shi pěpǒdû̌ hè.

²⁶ Asîsǒkhlidû̌ khlěkhlǒ nûhtò̌to̤ dě gili̤sǎkla, nûlò̤to̤ dě shipěpǒyo̤ aplǎkû. Asî ǐsha gònò̤gèglèbò.

²⁷ Asî cû̌ nûhtonûlò̤ sǒsǒta pwa̤omṳshi. Asî la̤klo sî̌ya khlòsî̌khlòjò sǒkhli toǒnu, a nòdû̌bò pwǎ.

²⁸ Asî ǒ dě ta̤pò̤ta̤sha akû dě a kwigwèbǎǐ Cǒmara tûjûpwa̤. A ma̤lû̌htò̌ge asî dě ta̤jîta̤jû akû.

²⁹ A noǒkǔkèbò gili̤sǎplǎwi̤ dě shipěpǒ ǒkǔkèbò.

³⁰ Shipěpǒ ǒkǔkèbò akhû̌akhî, asî sò̌le̤sò̌lò̤. Cǒmara sûcû̌to̤ asî dě asî la̤cû̌bè̌ǒkǔ sǒkhlidû̌ gûla̤nu tò̤glò.

³¹ Cǒmara tûjûpwa̤ mo̤ǐ kòyòhǎkhû̌phû̌ ta ata̤mo̤ǐ htě ahǎbòjò tò̤nu dě a ma̤ bǎ kò ta̤cǒklî̌kî̌ya htǒo akhû̌akhî, nohî̌bwǐhî̌sîrîhtò̌ mò̌ asî.

³² No bè̌dubè̌na̤mò̌ asî ta Cǒmara tûjûpwa̤ dě kòyòprṳ̂ho akla. No htû̌sò̌ǐ mò̌ asî ta Cǒmara dě khlilèphû̌ ahǐkǒlǒkòdû̌ toǒ ta̤ǒhtuhî̌bǎplǒ akû.

³³ Cǒmara nohtûhtò̌ shikhî̌ toǒ ta lo̤mî̌shǒkla. A nohtûhtò̌ shipo̤htǎ gûla̤ toǒ ta hǎkhû̌khwe.

³⁴ Kòyò htě aǒ bǎnu toǒ ma̤ ta̤phû̌mò̤shî̌hto akhû̌akhî, a nohtûhtò̌kèbò hǎplǒhǎyî̌khû̌ htǒonu ta hǎkhû̌cakwǎ.

³⁵ A nohtûhtò̌ lo̤mî̌shǒkla ta shikoǒ. A nohtûhtò̌ hǎkhû̌khwe ta shipo̤htǎ.

³⁶ A noǒ kòyòhǒwi̤sǎǎ bǎ gûla̤nu tò̤glò. Asî ma̤htò̌ lǒkho awî̤phû̌.

³⁷ Asî ma̤ǎ lǒkho hǔkla, a shǒǐtû̌ lǒkho sobîmṳ. Asî nî̤bǎ plṳ̂꤮ mè̤mè̤̌ sobîsǎ.

³⁸ Cǒmara howi̤homò̤ asî akhû̌akhî, asî hǐphû̌phòphû̌ ǒwo̤ǒhtò̌. A noyû̌ gilò̤kè nǒ asîta̤phû̌ta̤li̤ tò̤.

³⁹ Bǎ asî kòyò ǒpî̌tî̌ gilò̤kè akha, asî khuwè̤ toǒ glè pè̤ǎpè̤o asî, ma̤jîma̤jû asî dě a sǎpla̤sǎyṳbò.

⁴⁰ Cǒmara ma̤sòwò̤kèbò pwa̤pǒta̤nu toǒ. A nolète̤we̤ hǎbò nòdû̌ asî khîkha bǎ lo̤mî̌shǒklakhû̌nu.

⁴¹ Pwǎ̤tadě a bè̌htò̌yî̤ lè̌ kòyò shodo pwa̤ma̤jè dě ta̤ma̤jîma̤jû akû. A noǒwo̤ǒphǎ꤮ htò̌ asîhǐphû̌phòphû̌ lò̤kèta sophû̌mṳ.

⁴² Kòyòcǒkòyòtè̤ kè̌shǐ dě a mo̤sû̌mo̤sò̌. Kòyòphû̌mò̤ lǒ̤꤮ bò lè̌dě aǒ sî̌tukǔ꤮ kèbò.

⁴³ No gènè̤te̤mǎbò ta̤ htǒotoǒ ta kòyò htě ata̤sî̌ta̤jò ǒnu. No sî̌ya te̤mǎbò asî ta Cǒmara tûjûpwa̤ ata̤mo̤ǐ htě ahǎbòjò tò̤nu nî̌.