Htû̌sò̌htò̌ 106 - Kawyaw RC

Cǒmara wǒ ta akòyò toǒ aya

¹ Htû̌sò̌ǐ Cǒmara tûjûpwa̤. Cǒmara tûjûpwa̤ wǒ mè̤mè̤̌, hî̌bwǐhî̌sîrîhtò̌ yǎ. Ata̤mo̤ǐ htě ahǎbòjò tò̤nu, a ǒměǒgle tûjûpwa̤.

² Ûpè tapwa̤ cû̌pwe̤ǐlṳ bòpè̤jò Cǒmara tûjûpwa̤ ma̤hto lǒ̤꤮ bò ta̤cǒklî̌kî̌ya htě adû̌ayǒnu toǒ pè? Ûpè tapwa̤ htû̌sò̌ǐ lǒbepè̤jò nû̌û pè?

³ Cǒmara howi̤ kòyò htě a ma̤toma̤bǎ ta̤nu toǒ ta kòyò htě pṳ̂̌plǎplǎ a ma̤cǒma̤tè̤ ta̤nu toǒ.

⁴ Kǒ Cǒmara tûjûpwa̤, bǎ na kè̌dû̌ ma̤mo̤ma̤wǒ nakòyò toǒ akhanu, gènè̤htò̌nṳ he. Bǎ na ma̤lû̌htò̌ge asî akhanu, ma̤jè dǒ he.

⁵ Nakòyò htě na wû̌lǎ htǒotoǒ ata̤ǎbǎohtû htǒo, nokè̌shǐ yǎta he. Nakhlilèphû̌ ata̤sò̌le̤sò̌lò̤ htǒo, nosò̌le̤sò̌lò̤ htukû̌ yǎta he bǎnu. Nohtû̌sò̌ǐ htukû̌ he ta nakòyò toǒ.

⁶ Pwǐ paphipaphu toǒ ma̤sǔhtonu, pa ma̤sǔma̤plě kû̌bò. Pa ma̤sǔbò hǒ, pa ma̤bò ta̤phû̌mò̤shî̌hto.

⁷ Bǎ paphipaphu toǒ ǒpe dě Egyptgakû akhanu, asî bè̌sû̌bè̌sǎ to̤kû̌ na ma̤hto ta̤ma̤cǒklî̌kî̌ya toǒ dǐcǎ꤮ tò̤. Asî shope̤kèbò ta̤ htě na ma̤ bǎ asî ta na ta̤mo̤ǐ adû̌ayǒ htě ahǎbòjò tò̤nu. Asî ma̤tukutakǎpwǎ na dě shidû̌shite̤we̤ kòshî̌, a mî̌ shidû̌shite̤we̤lî̤htu.

⁸ Pwǎ̤tadě ma̤pûhǐ na dǔlṳ nasîrîpo̤phǎ shû̌sho ta la̤bè̌dubè̌na̤ nami̤wî̤mi̤wǒ ayanu, na ma̤lû̌htò̌ge asî.

⁹ Na hî̌lò̤ nayo̤ ta shidû̌shite̤we̤lî̤ dě a sǔkhwedè̌khwè̌kèbò. Na sûcû̌ sělěbò̌kè Israelphû̌ sîtoǒ ta shidû̌shite̤we̤ lò̤ta asî cû̌tûlû̌bò̌ lo̤mî̌shǒkla.

¹⁰ Na ma̤lû̌htò̌ge asî dě kòyò sò̌khěkhû̌khwè asî acǔdekû. Na htè̌ge asî dě khuwè̤ toǒ acǔdekû.

¹¹ Shi plû̌bǐ sikèbò pwa̤sò̌khě asînu. A ǒhtûpwa̤pe dǐpwǎ̤꤮ tò̤.

¹² Pěmî̌ asî yṳǎ nata̤olò̤. A sò̌po̤ htû̌sò̌ǐ na.

¹³ Pwǎ̤ta teděsǎ akû, asî shope̤nǎ phwèkèbò ta̤ htě na ma̤htonu toǒ. A ǒyṳ̂bò̌pe nata̤yṳ̂klè̌nè̌klò tò̤.

¹⁴ Bǎ asî ǒ dě lo̤mî̌shǒklakhû̌ akhanu, asî kwiǎ shǎǎshǎo htě a nǎsǔ sǎǎsò̌onu toǒ. Asî sèlèkè̌ma̤kè̌ Cǒmara bǎnu.

¹⁵ Hǐnudě pwǐ asî kwihtò̌nu, na ǐlò̤ bǎ asî. Pwǎ̤tadě na nohtûhtò̌ ta̤shasila̤ dě asîkla.

¹⁶ Bǎ asî ǒpe dě lo̤mî̌shǒklakhû̌ akhanu, a sò̌khě Mǒ̤jè ta Cǒmara tûjûpwa̤ apwa̤lṳhtò̌ hǐkǒdû̌ cahtǐ, Aro htǒosò̌gini̤.

¹⁷ Ma̤hǐnu akhû̌akhî, hǎkhû̌ è̌phò̌ dě a û̌nṳkè Datana dě a û̌nṳpadǒ Abǐramǎ ta asû̌akho.

¹⁸ Cǒmara plûlò̤ mî̌ dě asî aprṳ̂aho alo̤ dě a gèsikèbò kòyòphû̌mò̤ htǒo toǒ.

¹⁹ Asî bǒ lǒkho pṳ̂phaphû̌ yo̤ todo bǎ Hò̌rǎkholo kòshî̌. A subusabahtò̌ ǐ lǒkho ta̤yo̤ta̤gî.

²⁰ Asî htû̌lè̌kè Cǒmara htě asîrîdû̌sîrîhtû htǒotapwa̤ ta pṳ̂phaphû̌ htě a ǎpwǎ mi̤ htǒotodo ayo̤agî.

²¹ Asî shope̤nǎkè Cǒmaradû̌ htě a ma̤lû̌htò̌gehto asî, a ma̤hto bǎ asî ta̤sû̌pi̤sò̌pi̤ adû̌ayǒ dě Egyptgakûnu tapwa̤.

²² A ma̤ cǒklî̌kî̌ya bǎ Hamǎkhlilèphû̌ ǒǐ gakû. Htohǒtò̤ a ma̤ ta̤te̤pe̤ sû̌pi̤sò̌pi̤ bǎ shidû̌shite̤we̤lî̤htu htǒotapwa̤nu, asî shope̤kè.

²³ Hǐnuakhû̌akhî, Cǒmaradû̌ sò̌phlǒdû̌ asî, a glè̌ ma̤sikèbò asî. Pò̤̌ta ma̤pûhǐ Cǒmara sò̌phlǒgûjû gesǒ, a ma̤sikè asî tò̤ ayanu, Mǒ̤jè htě Cǒmaradû̌ wû̌lǎ htǒotapwa̤, a kwigwèbǎǐ Cǒmara asîgûla̤.

²⁴ Asî yṳǎ kû̌ Cǒmaradû̌ ata̤olò̤nu tò̤ akhû̌akhî, a gènè̤ pî̌tî̌ gamo̤gawǒnu ta̤ga.

²⁵ Asî ǒ lǒkho dě ahǐphû̌kû dě a tṳ̂mṳ̂ta̤ma̤. A gana̤de Cǒmara tûjûpwa̤ ayo̤ tò̤.

²⁶ Ma̤hǐnudě Cǒmara bèlò̤ ayo̤ ta asî dě a glè ma̤sibò asî bǎ lo̤mî̌shǒklakhû̌.

²⁷ A nosikè asî akhlialè toǒ dě khlilèphû̌hǔwa̤ akla. A nohtò̌pò̌htò̌shî cû̌bò asî dě shigahǔwa̤khlo.

²⁸ Asî sabahtò̌ lǒkho khlilèphû̌hǔwa̤ acǒmara htě kò kaǎ yǎta Balǎ bǎ Peorakholokhinu tò̤glò. A ǎ lǒkho ta̤yî̌ htě amî̌ kò ma̤si lṳhtò̌ ta̤phû̌ta̤li̤ ta Cǒmara dě a sinu toǒ.

²⁹ Dě asî ma̤ ta̤phû̌mò̤shî̌hto akhû̌akhî, a ma̤ sò̌phlǒdû̌ Cǒmara tûjûpwa̤. Hǐnudě ta̤shasila̤ ǒhtûhtò̌ dě asîkla.

³⁰ Pwǎ̤tadě Phǐnehǎ ma̤sikè pwa̤ma̤sǔta̤nu toǒ dě Cǒmara noǒkǔkènǒ ta̤shasila̤.

³¹ Ma̤hǐnudě kò gènè̤htò̌bǎ nû̌û pwǐ kòyòcǒkòyòtè̤ tapwa̤ tuhtu hto tuhtu, tûjûpwa̤ talakhǎ.

³² Asî ma̤ sò̌phlǒdû̌bò Cǒmara tûjûpwa̤ bǎ Merǐbǎ shipo̤htǎkhû̌nu. Dě asî ma̤ hǐnuakhû̌akhî, Mǒ̤jè shěto̤bǎ ta ta̤pò̤ta̤sha.

³³ Asî ma̤sò̌phlǒdû̌ lǒkho Mǒ̤jè akhû̌akhî, Mǒ̤jè hî̌bǎbǐ hî̌bǎǒbò.

³⁴ Pwǐ Cǒmara tûjûpwa̤ noma̤si asî ta khlilèphû̌hǔwa̤ toǒnu, asî ma̤ pwǐ a noma̤ asînu tò̤.

³⁵ Pwǎ̤tadě asî ǒshîkla kû̌bò lǒkho ta khlilèphû̌nu toǒ. Asî sû̌ǐ gûma̤ kû̌bò pwǐ khlilèphû̌nu toǒ ala̤kloma̤nu.

³⁶ Asî subusabahtò̌ kû̌bò khlilèphû̌nu toǒ ayo̤agî akhû̌akhî, asî to̤bò ta ta̤pî̌ta̤lṳ̂.

³⁷ Asî lṳhtò̌bò aphû̌mamǔ, aphû̌makhû toǒ ta khînǎkhîno.

³⁸ Asî ma̤sibò kòyò htě ata̤sǔ ǒtò̤ toǒ dě amî̌ asî phû̌mamǔ ta phû̌makhû tû̌. A lṳhtò̌kè nû̌ûta Khana̤ga ayo̤agî. Hǎkhû̌ htǒonu a phû̌mò̤shî̌htobò nû̌ûta asî ma̤si sǐlò̤ kò htǒo.

³⁹ Dě asî ma̤ phû̌mò̤shî̌hto wi̤jabò ana̤ hǐnuakhû̌akhî, asî ma̤ sǒsǒ lǒkho ana̤ ta mamǔpò̤lò̤.

⁴⁰ Ma̤hǐnudě Cǒmara tûjûpwa̤ sò̌phlǒdû̌ akòyò, a wi̤ja akòyò.

⁴¹ A ǐlò̤kè asî dě khlilèphû̌hǔwa̤ toǒ acǔdekû. Kòyò htě a sò̌khěkhû̌khwè asînu toǒ pǒǐbò asî.

⁴² Pwa̤sò̌khě asî toǒ ma̤jîma̤jûbò asî. A pǒǐ asî dě asî bǎǒ lǒkho dě asîkhuwè toǒ ata̤shû̌ta̤sho akla.

⁴³ Cǒmara tûjûpwa̤ ma̤lû̌htò̌ge plṳ̂ akòyò toǒ. Pwǎ̤tadě asî gènè̤ còcè̌꤮ la̤ma̤tukutakǎshǔ ta̤. Asî ta̤sǔta̤plě ǒ akhû̌akhî, a to̤bò ta ta̤pî̌ta̤lṳ̂.

⁴⁴ Bǎ Cǒmara tûjûpwa̤ gana̤de asî kwihtò̌ ta̤ma̤jè akhanu, a kè̌shǐ sî̌ya asî ata̤khòbǎ ta̤jîta̤jû.

⁴⁵ A gènè̤htò̌to̤ ata̤wṳ̂dò htě a olò̤hto ta asî htǒo. Dě a mo̤ǐ asî ta ta̤mo̤ǐ htě ahǎbòjò tò̤ htǒo akhû̌akhî, asò̌phlǒgûjû gesǒ.

⁴⁶ A nogwèbǎǐ asî ta kòyò lǒ̤꤮ bò htě a pṳ̂cû̌ asînu toǒ.

⁴⁷ Kǒ Cǒmara tûjûpwa̤ mî̌ pacǒmaradû̌, ma̤lû̌htò̌ge pa. Kaǎhǎhtò̌mò̌ pa dě khlilèphû̌ htǒotoǒ akla, nogeǒplǒsǒmò̌ pa. Pěmî̌ pa glè hî̌bwǐsîrî nami̤ cahtǐ, pa sò̌le̤sò̌lò̤ htû̌sò̌ǐ nama̤ta̤ toǒ pě.

⁴⁸ Htû̌sò̌ǐ Cǒmara tûjûpwa̤, a mî̌ Israelkhlilèphû̌ acǒmaradû̌ htǒo. Htû̌sò̌ǐ yǎ tûjûpwa̤ talakhǎ. No hî̌bò kòyò pṳ̂̌꤮ tapwa̤ ta, “Amè̤.” Htû̌sò̌ǐ Cǒmara tûjûpwa̤.