Htû̌sò̌htò̌ 105 - Kawyaw RC

Cǒmaradû̌ ma̤lû̌htò̌kè akòyò toǒ

¹ Hî̌bwǐhî̌sîrî Cǒmara tûjûpwa̤, kwisabahtò̌ yǎta ami̤. Ǐsî̌yadǒ bǎ khlilèphû̌ toǒ ta a ma̤hto ta̤nu.

² Sò̌po̤htò̌mò̌ yǎ, sò̌po̤ htû̌sò̌ǐmò̌ nû̌û. Pwe̤ǐlṳbòmò̌ bǎ kò ta lǒ̤꤮ bò a ma̤ ta̤cǒklî̌kî̌yanu.

³ Htû̌sò̌ǐ mò̌ ami̤cahtǐ. No sò̌le̤sò̌lò̤ mò̌ kòyò htě a kè̌lǎ Cǒmara tûjûpwa̤nu.

⁴ Kè̌lǎ mò̌ Cǒmara tûjûpwa̤, kwihtò̌ mò̌ atakhû̌ta̤ǎ. Pṳ̂̌plǎplǎ hèphǔ alo̤mo̤.

⁵ Gènè̤htò̌to̤ ta̤cǒklî̌kî̌ya, ta̤ma̤te̤pe̤ sû̌pi̤sò̌pi̤, ta̤cèròtocèròbǎ htě a ma̤htonu.

⁶ Sî mî̌ Cǒmaradû̌ apwa̤ma̤ta̤phû̌ mî̌ Abraham aphû̌ali̤ hǒ. Sî mî̌ Yǎ̤kò akhlialè htě Cǒmara wû̌lǎ toǒ hǒhǒ.

⁷ A mî̌ Cǒmara tûjûpwa̤, pacǒmaradû̌ hǒ. A cèròtocèròbǎbò hǎkhû̌běkhû̌.

⁸ A gènè̤ǐ ata̤wṳ̂dò pṳ̂̌꤮ taplǎ. Yo̤sǎ htě a olò̤hto toǒnu, kòyòtuhtu hto tuhtu, htu dě arî̌kû a shope̤nǎpè̤ tò̤.

⁹ A glè cǒtè̤ ta ayo̤ htě a wṳ̂dòhto ta Abraham, a bèlò̤hto ta Isǎkonu.

¹⁰ A bè̌měbè̌gle ata̤sû̌ta̤tòwò ta Yǎ̤kò. A wṳ̂dò měgle ayo̤ ta Israel tûjûpwa̤.

¹¹ A hî̌ ta, “He glè ǐ na Khana̤ga pwǐ naû̌cata̤bî̌.”

¹² Bǎ a hî̌ yo̤ hǐnu akhanu, asî ǒpî̌tî̌lepe pwǎ. Asî htû shǐpwa̤shǐmè̤ dě Khana̤gakûnu a ǒpî̌tî̌pe pwǎ.

¹³ Asî lè ta̤ga hto ta̤ga, tò̤glò hto tò̤glò.

¹⁴ A noma̤jîma̤jû asî ta kòyò dǐpwǎ̤꤮ tò̤. Dě asî ayanu, a ǐsè̌rè̌nṳ Khwǐ toǒ dě a glè ma̤kwaǐ asî.

¹⁵ A hî̌ ta, “Ma̤bǎma̤sha pûma̤ kòyò htě he wû̌lǎ yǎnu toǒ ma̤. “Ma̤shama̤htò pûma̤ hepwa̤po̤nu toǒ ma̤.”

¹⁶ Cǒmara tûjûpwa̤ noǒhtûhtò̌ gawi̤gakodû̌ dě Khana̤gakû. A ma̤pî̌ma̤lṳ̂kèbò asîsǒsǎwû̌pho bǔmṳ sîtoǒ.

¹⁷ A sûcû̌wǐ kòyò tapwa̤ dě asî alo̤mo̤. Kò shaǎcû̌kè Jǒjè dě Egyptga pwǐ jû tapwa̤.

¹⁸ Kò coklo htòbò nû̌ûkhò̌lopo̤ ta sǒpli̤ te̤htò̌. Kò kǒle̤nṳ te̤htò̌pli̤ dě agobolo̤.

¹⁹ Cǒmara tûjûpwa̤ pwe̤ǐnǎ yo̤ toǒ lǒhtò̌behtò̌ hǒtò̤nu, a ma̤kè̌pe Jǒjè ata̤bè̌ sò̌phlǒsû̌shi.

²⁰ Egyptgaphû̌ plûhtò̌kè Jǒjè. Pwa̤pǒǐ khlilèphû̌ toǒnu tapwa̤ plûhtò̌ pelekè nû̌û.

²¹ Khwǐ nohtû nû̌û ta pwa̤pǒǐ yǎ hohta. A nopǒǐ nû̌û ta Khwǐ ata̤kî̌ta̤kû̌ lǒ̤꤮ bò.

²² Jǒjè yṳ̂klè̌nè̌klò bǎ Khwǐ apwa̤ma̤ta̤phû̌ toǒ pwǐ ata̤sò̌yṳ ǒnu. A sû̌tòwòǐ pwa̤htû hǐkǒlǒkòdû̌ htě a ǐsî̌yajè Khwǐ htǒotapwa̤nu toǒ.

²³ Htodě Israel hèto̤ dě Egyptga. A hèǒ shǐtè̤mè̤ gûmṳ̂ bǎ Hamǎkhlilèphû̌ ǒǐ gakû.

²⁴ Cǒmara tûjûpwa̤ nophû̌ǒwo̤ li̤ǒphǎ akòyò. A nokhû̌ǎshû̌shokhlo asî ta pwa̤sò̌khě asînu.

²⁵ A notèlè̌khǒkè Egyptkhlilèphû̌ asò̌phlǒ. A nosò̌khěkhû̌khwè Egyptkhlilèphû̌ toǒ ta Cǒmara apwa̤ma̤ta̤phû̌ toǒ.

²⁶ A sûhè apwa̤ma̤ta̤phû̌ Mǒ̤jè ta Aro htě a wû̌lǎ htǒonu sò̌gini̤.

²⁷ Mǒ̤jè ta Aro dǔlṳ bǎ Cǒmara ata̤ma̤te̤pe̤ sû̌pi̤sò̌pi̤ dě Egyptkhlilèphû̌ akla. A dǔlṳpo̤ ta̤ma̤cǒklî̌kî̌ya dě Hamǎkhlilèphû̌ agakû.

²⁸ Cǒmara nokhǐlò̤ sagala̤bò. Pwǎ̤tadě Egyptkhlilèphû̌ ma̤tukutakǎshǔ yo̤ dě a hî̌lò̤nu tò̤.

²⁹ Cǒmara nohtûhtò̌kèbò asîshikhî̌ ta sǐ, dě tò̤phû̌ sikèbò.

³⁰ Dî̌phû̌ toǒ ǒbetî̌pî̌꤮ bò dě asîgakû pṳ̂̌꤮ tò̤glò. A cû̌to̤ ǒto̤bò dě Khwǐcophǎ hohtakû.

³¹ Bǎ Cǒmara hî̌lò̤ ayo̤ akhanu, phǔsǒphû̌ ta kadǎ toǒ a wi̤cû̌ ǒbebò asîga sagala̤.

³² Khwè̌ to ju dě asîga sagala̤ pwǎ̤tadě Cǒmara nojulò̤ sèwèji, anolò̤ tî̌lî̌ dě asî gakû.

³³ A ma̤pî̌kèbò Egyptphû̌ asobîmṳ ta dǐshimṳ. A ma̤lòkhǔ ma̤la̤gakèbò sǒmṳ dě asîgakû.

³⁴ A hî̌lò̤ ayo̤ dě dèpo̤ toǒ hèlò̤bò. Dèpo̤ toǒ mî̌ dǒbòpè̤pe tò̤.

³⁵ Asî lò̤ǎbò sǒdosǒlǎ sulè̌sula ǒ dě gakû. A lò̤ǎbò ta̤sǎta̤pho htě asî lǔ dě ahǔklakhû̌.

³⁶ Htodě Cǒmara ma̤sikèbò Egyptkhlilèphû̌ aphû̌wè̤pwa̤. Phû̌wè̤pwa̤ mî̌ asî ta̤khû̌ta̤ǎ awǐgutṳ̌ tacǎ.

³⁷ A kaǎhǎhtò̌gekè Israelphû̌ toǒ, asî to̤ge lǒkho wûhta. Dě asîkhli aklanu, akhû̌ǎyû̌lò̤ ǒ dǐpwǎ̤꤮ tò̤.

³⁸ Egyptkhlilèphû̌ sîtoǒ ǐsha mè̤mè̤̌ Israelphû̌ toǒ ala̤ akhû̌akhî, bǎ asî hǎhtò̌ge akhanu, Egyptkhlilèphû̌ toǒ sò̌le̤sò̌lò̤ lǒ̤꤮ bò.

³⁹ Cǒmara hǔyo̤ǔ ma̤kwabǐ asî ta poǒlṳ. Lṳmṳkhǐ dě a shělîlò̤ bǎ asî ta mî̌.

⁴⁰ Asî kwihtò̌ ta̤yî̌ dě a ǐlò̤ bǎ asî htû̌wǐ. A ǐlò̤ asî ta mû̌ ǒ dě mǒkhû̌ hèlò̤, asî ǎkǒobebò.

⁴¹ Cǒmara ma̤phò̌ bǎ asî lo̤ dě shi shǐhtò̌. A dû̌cû̌ nò̤꤮ dě lo̤mî̌shǒklakhû̌ lò̤kèta shikhî̌.

⁴² Hǐnudě Cǒmara gènè̤to̤ ata̤olò̤ htě acahtǐ dě a olò̤hto ta apwa̤ma̤ta̤phû̌ Abrahamnu, dě a ma̤ bǎ asî hǐnu.

⁴³ Hǐnudě a kaǎhǎhtò̌ge akòyò dě Egyptgakû ta ta̤sò̌le̤sò̌lò̤. A kaǎhǎhtò̌ge akòyò htě awû̌lǎnu ta ta̤sò̌po̤ mo̤sû̌mo̤sò̌.

⁴⁴ Khlilèphû̌hǔwa̤ hǎkhû̌ hǔkla toǒnu, a ǐbò nû̌ûta asî. Kòhǔkla htě kò htǒkhû̌htǒǎma̤ toǒnu, a htûkè asî ta̤.

⁴⁵ Ma̤pûhǐ asî gana̤debò Cǒmara ata̤hî̌bǎlò̤yo̤ dě asî glè jûle̤phî̌yo̤bò nû̌ûta̤sû̌ta̤tòwò ayanu, a ma̤pwǎ ta̤ htǒotoǒ. Htû̌sò̌ǐ Cǒmara tûjûpwa̤.