Htû̌sò̌htò̌ 104 - Kawyaw RC

Htû̌sò̌ǐ Cǒmara pwa̤bǒlò̤ta̤

¹ He htû̌sò̌ǐ Cǒmara tûjûpwa̤ ta hesò̌phlǒsamabò. Kǒ Cǒmara tûjûpwa̤, hecǒmaradû̌, na mî̌ adû̌ayǒ mè̤mè̤̌. Na kûsǒhtò̌nṳ ta̤sîrîdû̌sîrîhtû ta ta̤lîta̤rakha.

² Na kûsǒhtò̌ǐ ta̤lî pwǐ kò kûsǒhtò̌ hǐdo. Na cǐtadǎ mǒla̤ pwǐ kò cǐtadǎ hǔgò.

³ Na ma̤htò̌ nahǐ dě poǒlṳkhû̌. Na noǎǐ poǒlṳ pwǐ natîsî̌lo̤. Na dò̌cû̌ǐ gili̤ aděge.

⁴ Na nohtûhtò̌ gili̤ pwǐ natanaphû̌nu. Na nohtûhtò̌ mî̌gèrosho pwǐ napwa̤ma̤ta̤phû̌nu.

⁵ Na ma̤htò̌ hǎkhû̌ akòshî̌kòtṳ dě a guyṳjòpe tò̤ hǒ.

⁶ Na hǔbǐ hǎkhû̌ ta shidû̌shite̤we̤ pwǐ kò hǔbǐ nû̌ûta hǐdopo̤to̤. Shi toǒ dû̌htò̌ to̤ dě kholo akhi.

⁷ Na sǎhtǎ dě shidû̌cû̌ tephekèbò hǒ. A gana̤de na tî̌lî̌ dě a tṳplutî̤wî̤ hǎhtò̌khlè̌cû̌ phwèkèbò hǒ.

⁸ Na nohtûhtò̌plǔhtò̌bò kholo, na nolòte̤nṳyo̤ lo̤to̤kû. A htûhtò̌bò pwǐ na sò̌yṳ nohtûhtò̌ asî dě agûla̤ ta agûla̤nu.

⁹ Ma̤pûhǐ shidû̌bǐjò hǎkhû̌ tò̤nu, na ma̤dǐdònǎkè bǎ asîgaku.

¹⁰ Na nodû̌lò̤bò shiklophû̌ dě lo̤to̤nṳyo̤ akû. Shidû̌cû̌ lǒkho bǎ shǒdeshǒplǎ.

¹¹ Shilo̤ htǒotoǒ ǐpa̤ lǒ̤꤮ bò ta̤phû̌ta̤li̤ shila̤o. Mòû̌lǎmi̤ sîtoǒ okǒobebò shi.

¹² Htû̌phû̌ yṳphû̌ dě mǒla̤ ma̤ apli̤ bǎ shiklohtu. A po̤htò̌ dě sǒdû̌khi.

¹³ Na ǒ dě nahǐmǒkhû̌, na nojulò̤ khwè̌ dě kholo toǒ akhû̌. Hǎkhû̌nu a lǒbebò ta na ta̤howi̤hî̌wǒ.

¹⁴ Na nodǒhtò̌ mi̤mṳ ta ta̤phû̌ta̤li̤ aya. Na nophǎhtò̌ sǒdosǒlǎ ta kòyòhǎkhû̌phû̌ la̤ǎ aya. Asî shǒ sǎhtò̌phohtò̌ ǐjòpo̤ sǒsǎwû̌pho bǎ hǎkhû̌.

¹⁵ Asî nî̤bǎsobîshisî̌yo̤ dě a ma̤mo̤ kòyòhǎkhû̌phû̌ sò̌phlǒ, htǒshi dě a ma̤ya̤ asî, ta shǎǎshǎo dě a ǐ asî ta̤khû̌ta̤ǎ.

¹⁶ Cǒmara tûjûpwa̤ shǒǐ sǒmṳdû̌sǒmṳtònò dě Lebanokhololo̤, a nî̤bǎ lǒbe khwè̌shi.

¹⁷ Htû̌phû̌ toǒ ma̤ apli̤ dě sǒmṳnu toǒ alo̤. Htû̌shiphabûdû̌ toǒ ma̤ ala̤ǒ gûla̤ dě sǒmṳdû̌sǒmṳtònò akla.

¹⁸ Kholodû̌kholohtû mî̌ pè̤mi̤ la̤ǒtûdû. Lo̤dû̌lo̤htû mî̌ phwǐ la̤ǒhǔ akû.

¹⁹ Na bǒlò̤ la ta la̤ma̤dòǐ khwè̌jugagû akhîakha. Lṳmṳnu a tobǎ lò̤ bò̌khòtènu, a sî̌ya tû̌.

²⁰ Na bǒlò̤ ta̤khǐ, a htûhtò̌ lṳmṳkhǐ. Lǒ̤꤮ bò ta̤phû̌ta̤li̤ dě mi̤kla hǎhtò̌cû̌ǒlè bǎnukha.

²¹ Sî̌ò̌ tolo la̤pṳ̂ǎ ashǎ, agoakrû̌ lǒkho. A kè̌lǎ ashǎ la̤ǎ htě Cǒmaradû̌ ǐnu.

²² Bǎ lṳmṳlîbû hèhǒ akhanu, asî gesǒ, a gehǎmoǒsǒ dě akû.

²³ Kòyòhǎkhû̌phû̌ hǎhtò̌cû̌ ma̤ta̤ma̤, a ǎwè̤ to̤htû̌ lṳmṳhǎlò̤.

²⁴ Kǒ Cǒmara tûjûpwa̤, na ma̤ta̤ toǒnu a ǒplṳ̂꤮ mè̤mè̤̌. Na bǒlò̤ ta̤nu toǒ lǒ̤꤮ bò ta ta̤sî̌ta̤jò. Hǎkhû̌htǒo aǒbebò ta nata̤bǒlò̤ta̤.

²⁵ Shidû̌shite̤we̤ htǒomî̌ adû̌alè̤. Ta̤bǒlò̤ adû̌dû̌ apî̌tî̌tî̌ htě a yò̤cû̌ dě shikla toǒnu dǒbòpè̤pe tò̤, a ǒbò lǒkho bǎnu.

²⁶ Sǒkhlidû̌ toǒ cû̌gecû̌hè bǎnu. Tò̤phû̌dû̌ Lawǐta htě na bǒlò̤ yǎ htǒonu a pe̤ lò̤we̤lò̤so mo̤ bǎnu.

²⁷ Ma̤pûhǐ na ǐbò꤮ ta̤phû̌ta̤li̤nu toǒ ashǎǎshǎo akhîakha ta akhîakha ayanudě, asî kè̌shuǐ dě naǒ.

²⁸ Bǎ na ǐlò̤ asî shǎǎshǎo akhanu, asî nî̤bǎbò. Bǎ na yṳ̂lò̤ asî shǎǎshǎo akhanu, asî sò̌phlǒmo̤bò.

²⁹ Bǎ na kè̌khǒkè akhanu, asî ǐsha sò̌gònò̤bò. Bǎ na phî̌htò̌kè asîsò̌htûpwa̤ akhanu, asî sikè, a htûbò gesǒ lo̤hǎ.

³⁰ Bǎ na sûhè bǎ asî nata̤htûpwa̤ akhanu, na bǒsa tèplè̌khǒkè asî. Na ma̤sawǒ gesǒ hǎkhû̌.

³¹ Cǒmara tûjûpwa̤ asîrîdû̌sîrîhtû ǒlo̤lo̤ tû̌ta tûjûpwa̤ talakhǎ nî̌. Cǒmara tûjûpwa̤ sò̌le̤sò̌lò̤ tû̌ta ata̤phî̌ta̤ma̤ htǒo nî̌.

³² Na kè̌lò̤ hǎkhû̌ dě a guyṳ. Na tè̌wa̤ pwǎ kholo dě mî̌khǔ toohtò̌.

³³ He glè sò̌po̤htò̌ Cǒmara tûjûpwa̤ to̤htû̌ he si. Bǎ he ǒhtûpwa̤pe akhanu, he glè sò̌po̤ htû̌sò̌ǐ hecǒmaradû̌.

³⁴ Pwa̤ htě a ma̤mo̤ hesò̌phlǒ mî̌ aǒ pǒ̤꤮ na pwǎ. Heta̤hî̌bǎ toǒ totû̌ta Cǒmara tûjûpwa̤ asò̌phlǒ nî̌.

³⁵ Ta̤ma̤sǔphû̌ pî̌kèbò tû̌ta dě hǎkhû̌ nî̌. Kòyòphû̌mò̤ hǎmǎkèbò tû̌ta tûjûpwa̤ nî̌. He htû̌sò̌ǐ Cǒmara tûjûpwa̤ ta hesò̌phlǒsamabò. Htû̌sò̌ǐ Cǒmara tûjûpwa̤.