Htû̌sò̌htò̌ 103 - Kawyaw RC

Cǒmaradû̌ ata̤mo̤ǐ

Khwǐdǎ̤wi̤ ata̤sò̌po̤ htû̌sò̌ǐ.

¹ He htû̌sò̌ǐ Cǒmara tûjûpwa̤. He htû̌sò̌ǐ ami̤ cahtǐ htǒo ta hesò̌phlǒsamabò.

² He htû̌sò̌ǐ Cǒmara tûjûpwa̤ ta hesò̌phlǒsamabò. Lǒ̤꤮ bò ta̤wǒ htě a ma̤hto bǎ he toǒnu, he shope̤nǎpè̤pe tò̤.

³ A bòlû̌kèbò heta̤sǔta̤plě lǒ̤꤮ bò. A ma̤hǎmǎkèbò heta̤shǐta̤sha pṳ̂̌꤮ tacǎ.

⁴ A htè̌ge he dě ta̤si akla. Ata̤mo̤ǐ htě ahǎbòjò tò̤ ta ata̤gwèbǎǐ glûbǐ hehǐkǒ lò̤ta khû̌glûnu hǒ.

⁵ A bè̌mo̤ hesò̌phlǒ ta ta̤wî̤ta̤wǒ. He phû̌sǎ khû̌ǎshû̌sho sǒsǒgesǒta le̤dû̌cǎsò.

⁶ Cǒmara tûjûpwa̤ cèròcǒ cèròtè̤, cèròto cèròbǎ lǒ̤꤮ bò kòyò htě kò ma̤jîma̤jû yǎnu toǒ.

⁷ Ata̤yè̤lò̤nǎ sîtoǒ, a dǔlṳ sî̌ya ta Mǒ̤jè. Ata̤phî̌ta̤ma̤ sîtoǒ, a dǔlṳ sî̌ya ta Israelkhlilèphû̌.

⁸ Cǒmara tûjûpwa̤ mî̌ a gwèbǎǐ kò, a ma̤bwǐma̤sîrî kò. A sò̌phlǒhtû, a lǒbe ta ta̤mo̤ǐ htě ahǎbòjò tò̤.

⁹ A bè̌ sayè̤ kò ta̤sǔ tò̤, a sò̌phlǒdû̌ sayè̤ nǒ kò tò̤.

¹⁰ Pwǐ pata̤sǔta̤plě ǒ dě pa gwata khòbǎnu, a nokhòbǎ pa tò̤. Pwǐ pa ma̤sǔ ta̤nu, pa to khòbǎ pwǎ̤tadě a ma̤ geshǔ pa ta ali̤ tò̤.

¹¹ Pwǐ mǒkhû̌ ǒhtò̌yî̤khlo ta hǎkhû̌nu, Cǒmara ata̤mo̤ǐ htě ahǎbòjòtò̤ htǒo, adû̌ahtûkhlo mè̤mè̤̌ ta kòyò ǐsha bè̌dubè̌na̤ nû̌ûnu toǒ aya.

¹² Cǒmara wîtepheyî̤kèbò pata̤sǔ toǒ lò̤kèta lṳmṳhtò̌ ta lṳmṳlò̤ ǒtepheyî̤ kè̌khînû̌ûnu.

¹³ Pwǐ꤮ pha gwèbǎǐ aphû̌ toǒnu, Cǒmara tûjûpwa̤ gwèbǎǐ pwa̤ htě a ǐsha bè̌dubè̌na̤ nû̌ûnu toǒ.

¹⁴ Pana̤klûhtǒo kò bǒ yǎ hî̌tènu, a sî̌yabò. Pa mî̌ lo̤hǎ pwǎnu a shope̤nǎ tò̤.

¹⁵ Kòyòhǎkhû̌phû̌ amṳni̤mṳsa htǒonu, a phǒ sǒsǒpwǎta mi̤mṳ. Pa sǒsǒpwǎta ta̤pho htě a phohtò̌ dě ya̤dakhû̌nu toǒ pwǎ.

¹⁶ Bǎ gili̤sǎ hèhtû̌bǎ asî akhanu, apho toǒ nûhǎmǎkèbò, a gûla̤ ǒkèpe tò̤.

¹⁷ Pwa̤ htě a ǐsha bè̌dubè̌na̤ Cǒmara tûjûpwa̤ toǒ aya lè̌dě, ata̤mo̤ǐ htě ahǎbòjò tò̤nu a ǒměǒgle tûjûpwa̤ talakhǎ. Ata̤cǒta̤tè̤ toǒnu a ǒměǒgle sělě to̤htû̌ aphû̌ali̤ alṳ̂ala̤ sîtoǒ tuhtu hto tuhtu.

¹⁸ Htohǒtò̤ a ǒměǒglepo̤ bǎ pwa̤ htě acǒtè̤ ta Cǒmara ata̤wṳ̂dònu toǒ ta pwa̤ htě a gana̤de jûle̤phî̌yo̤ nû̌ûta̤sû̌ta̤tòwònu toǒ aya.

¹⁹ Cǒmara tûjûpwa̤ bè̌ǒǐ agògohtahtò̌yî̤ dě mǒkhû̌. A htû Khwǐ bǎnu dě a pǒǐbò ta̤ pṳ̂̌꤮ tacǎ.

²⁰ Kǒ mǒkhû̌tanaphû̌ htě ashû̌asho, a gana̤de nû̌ûta̤sû̌ta̤tòwò, a jûle̤phî̌yo̤ nû̌ûyo̤ toǒ꤮, htû̌sò̌ǐ lǒkho Cǒmara tûjûpwa̤.

²¹ Lǒ̤꤮ bò mǒkhû̌tanaphû̌ akliprṳ̂hodû̌ htě a ma̤ to Cǒmara asò̌phlǒ lǒ̤bò toǒ꤮, htû̌sò̌ǐ lǒkhomò̌ Cǒmara tûjûpwa̤.

²² Lǒ̤꤮ bò a bǒlò̤ nû̌û toǒ ta lǒ̤꤮ bò a pǒǐ gûla̤ pṳ̂̌꤮ tò̤glò toǒ꤮, htû̌sò̌ǐ lǒkhomò̌ Cǒmara tûjûpwa̤. He htû̌sò̌ǐ Cǒmara tûjûpwa̤ ta hesò̌phlǒsamabò.