Htû̌sò̌htò̌ 102 - Kawyaw RC

Ta̤kwisabahtò̌ bǎ shěto̤bǎ ta ta̤pò̤ta̤sha akha

Pwa̤khòbǎ ta̤jîta̤jû htě akhû̌ǎyû̌lò̤ gilò̤nu ta̤pwa̤ ata̤kwisaba ta a ta̤hǎwo dě Cǒmara tûjûpwa̤ alo̤mo̤.

¹ Kǒ Cǒmara tûjûpwa̤, gana̤de heta̤kwisabahtò̌ na. Gana̤dekû̌ he kwigwèbǎǐ na ta̤ma̤jè.

² Bǎ he shěto̤bǎ ta ta̤pò̤ta̤sha akhanu, ǒhǔ pûma̤ hela̤ ma̤. Bǎ he kaǎguhtò̌ na akhanu, gana̤de hekwi nahtǒo, kǒshǔphwèpû he.

³ Hemṳni̤mṳsa htǒotoǒnu, a khǔhǎmǎkèbò lò̤kèta mî̌khǔ, hekhwǐ htǒonu alòte̤ja sǒsǒta mî̌klû̌ lòte̤janu.

⁴ Ajî tûlû̌꤮ hesò̌phlǒ lò̤kèta mi̤mṳ nokhwekènu. He sǎǎsò̌ope tò̤.

⁵ He kookasha tûlû̌꤮ shû̌ akhû̌akhî, a ǒkè pwǎpǒ̤ hekhwǐ ta hephě.

⁶ He lò̤ta te̤le̤htò ǒ dě lo̤mî̌shǒklakhû̌. He lò̤ta htû̌bǔ ǒ dě gapî̌galṳ̂ kòyò ǒpe dǐpwǎ̤꤮ tò̤ akûnu.

⁷ He hǎmoǒ pwǎ̤tadě hǎmoǒnî̤ tò̤. He sǒsǒkèpwǎ ta htû̌phû̌ htě a ǒ tû̌꤮ dě gukhěkhû̌ tabǎ.

⁸ Pwa̤sò̌khě he toǒ hî̌phû̌mò̤ he ti̤nǐ̤ mṳhǎ. Pwa̤ htě a pi̤jishǐcǒ he toǒ, a po̤ lǒkho hemi̤ dě a ǐsho lǒkho he.

⁹ He bǎ ǎ phǎ pwǐ hedîla̤ǎnu. He bǎ oshîlo̤htu shi ta hemi̤sǎshi.

¹⁰ Na sò̌phlǒdû̌ tûlû̌꤮ shû̌ he akhû̌akhî, na johtò̌ he, na wîlòte̤yî̤kè he.

¹¹ Hemṳni̤mṳsa toǒnu a glè̌ cû̌tûlû̌ hǎmǎphwè lò̤kèta lṳmṳlò̤ ayo̤ǔ hǎmǎkè dě akhǐkla. Henohekhwe lò̤kèta mi̤mṳ.

¹² Pwǎ̤tadě kǒ Cǒmara tûjûpwa̤, na mî̌ Khwǐ, na pǒǐ ta̤ tûjûpwa̤. Kòyò tuhtu hto tuhtu glè gènè̤htò̌ na.

¹³ Na glè ihtǒ hèlò̤ dě gwèbǎǐ tû̌ Sǐowî̤. Khîkhato̤ ta na to gwèbǎǐ yǎ akhû̌akhî, khîkhato ta na to hèlò̤ hǒ.

¹⁴ Kò ma̤pî̌kè yǎ pwǎ̤tadě napwa̤ma̤ta̤phû̌ toǒ mo̤ǐpe pwǎ wî̤nu tî̤wî̤. Kò ma̤lòte̤jakè wî̤nu tî̤wî̤ pwǎ̤tadě pa gwèbǎǐpe yǎ.

¹⁵ Khlilèphû̌ toǒ glè ǐshabò Cǒmara tûjûpwa̤ ami̤. Lǒ̤꤮ bò Khwǐdû̌ ǒ hǎkhû̌ bǎotoǒ bè̌dubè̌na̤bò nasîrîdû̌sîrîhtû pě.

¹⁶ Cǒmara tûjûpwa̤ glè ma̤htò̌ gesǒ Sǐowî̤. A ǒlṳhtò̌ tû̌ta asîrîdû̌sîrîhtû.

¹⁷ A glè gana̤de bǎ kòyòshodohǐ shodophò toǒ ata̤kwisaba. A la̤kè asîta̤kwisaba tò̤.

¹⁸ Lǒ̤꤮ bò ta̤ htě Cǒmara tûjûpwa̤ glè ma̤ bǎ pa toǒnu bǎ khwè̌mǎnǎbò yǎta kòyò htû̌꤮ anǒkò tuhtu aya. Hǐnudě kòyò htě a ǒphijaû̌lò̤ kû̌kò hǒtò̤ toǒ glè htû̌sò̌ǐ Cǒmara tûjûpwa̤.

¹⁹ Cǒmara tûjûpwa̤ ǒ agûla̤ cahtǐ htò̌yî̤nu tò̤glò dě a kè̌lò̤. A ǒ dě mǒkhû̌, a kè̌lò̤ hǎkhû̌.

²⁰ A gana̤de pwa̤lòte̤ dě apo̤kû toǒ ata̤kookasha. A ma̤lû̌htò̌ge kòyò htě kò glè̌ cèròsi nû̌ûnu.

²¹ Bǎ khlilèphû̌ toǒ hèǒhtu ǒplǒ nû̌û akha pěnu, kò glè dǒhtû̌ǐlṳ Cǒmara tûjûpwa̤ ami̤ dě Sǐokholokhû̌. Kò htû̌sò̌ǐ nû̌û dě Ye̤rǔshèlèwî̤kû pě.

²² Shiga toǒ ma̤ lǒkho Cǒmara tûjûpwa̤ ata̤ma̤ pěpě.

²³ He nějape pwǎ pwǎ̤ta, Cǒmara tûjûpwa̤ phî̌cû̌kè hekhû̌heǎ. A ma̤ phǒtǔkè hemṳni̤mṳsa.

²⁴ He hî̌ ta, Kǒ hecǒmaradû̌, na ǒhtûpwa̤ tûjûpwa̤, bǎ he mo̤pwa̤ hǒtò̤ akhanu, phî̌kè pûma̤ heta̤htûpwa̤ ma̤.

²⁵ Bǎ ta̤dǐcǎ꤮ htûhtò̌ hǒtò̤ akhanu, na bǒlò̤ tû̌ hǎkhû̌. Na bǒlò̤ tû̌ mǒla̤ toǒ ta nacǔde.

²⁶ “Ta̤nu toǒ glè pî̌kèbò pwǎ̤ta na ǒsělě sayè̤ tûjûpwa̤. “A glè htò̌yè̌htò̌mǔ pwǐ hǔgòpwî̌li̤ hǔgòpwî̌yò̤. “Na htû̌lè̌tèplè̌ khǒkèbò asî pwǐ hǐdonu pě, asî hǎmǎkèbò pě.

²⁷ “Pwǎ̤tadě tṳ̂gûla̤la̤ na bè̌ pwǎ nasò̌phlǒ pě. “Na mṳni̤nu, a hǎbòjò tò̤.

²⁸ “Napwa̤ma̤ta̤phû̌ mî̌ pahtǒo aphû̌ glè ǒhtûpwa̤ dě nata̤ma̤kwaǐ ala̤. “Asî akhlialè ǒhtûpwa̤ ǒtûdûbǐwǒ dě nalo̤mo̤ pě.”