Htû̌sò̌htò̌ 1 - Kawyaw RC

Ta̤htû̌sò̌ǐalî̤ awǐlǒ tabǎ ( Ta̤htû̌sò̌ǐ 1-41 ) Kòyòcǒkòyòtè̤ ta kòyò sò̌phlǒphû̌mò̤ toǒ aklè̌

¹ Kòyò htě a nî̤bǎ ta̤howi̤ toǒmî̌ a gûkû̌ pwa̤phû̌mò̤shî̌hto ata̤yṳ̂klè̌nè̌klò tò̤. A ihtǒ ǒhtukû̌ ta kòyò ta̤sǔǒnu toǒ aklè̌kû tò̤. A hǎnòò̌ǒkû̌ dě pwa̤hî̌phû̌mò̤ Cǒmara a ta̤cǐplǒhtěhtu akû tò̤tò̤.

² A sò̌le̤sò̌lò̤ dě Cǒmara tûjûpwa̤ ata̤sû̌ta̤tòwò akû. A gènè̤ te̤mǎ Cǒmara tûjûpwa̤ ata̤sû̌ta̤tòwò pṳ̂̌ni̤pṳ̂̌sa.

³ Kòyò hǐnutoǒ mî̌ alò̤ta kò shǒǐ sǒmṳ dě shiklohtu, asǎ toshutokha. Alǎ lòsu kû̌kò dǐkhò̌꤮ tò̤. A ma̤ titètè̌꤮ mî̌ a ǎbǎǒbǎ.

⁴ Kòyò htě aphû̌mò̤shî̌hto toǒ mî̌ asǒsǒ hǐnu tò̤. Alò̤ta htǒphî dě gili̤sǎ htû̌nûkè nû̌ûnu pwǎ.

⁵ Htû̌꤮ Cǒmara tûjûpwa̤ mṳni̤ cèrò pě ti̤ni̤nu kòyòkhuphû̌mò̤ khòbǎ ta̤cèrò pě. Kòyò ta̤sǔ ǒ toǒ glè ǒhtukû̌pe dě kòyòcǒkòyòtè̤ asaprṳ̂kû tò̤.

⁶ Cǒmara tûjûpwa̤ ǒpo̤kè̌ǐkhwè̌ǐ bǎ kòyòcǒkòyòtè̤ aklè̌. Kòyò phû̌mò̤shî̌hto aklè̌nu a glè gutṳkè ta ta̤pî̌ta̤lṳ̂.