Hebrǔ 9 - Kawyaw RC

Ta̤wṳ̂dò ali̤

¹ Khònò̤dě ta̤wṳ̂dò awǐ tûmû htě Cǒmara olò̤kè akòyò toǒnu, a ǒ ta a ta̤subusaba a ta̤sû̌ta̤tòwò la̤klola̤bò̌ toǒ ta la̤saba hǐphû̌dû̌ cahtǐ htě kòyò ma̤htò̌ yǎnu tama.

² Hǐphû̌dû̌ cahtǐ htǒonu a ǒ ginǐ̤to̤. Awǐ to̤to̤nu kò bè̌ yǎta mî̌kowa̤ tabǎ, dîwa̤htò̌yî̤ tabǎ ta mû̌ cahtǐ htě kò bè̌htò̌ nû̌û dě dîwa̤htò̌yî̤khû̌ toǒ. Htǒoto̤to̤ numî̌ kò kaǎ yǎta ta̤cahtǐ gûla̤.

³ Hǐphû̌dû̌ cahtǐ a takhakû la̤nṳ htǒonu kò co te̤tṳbǐ yǎta hǔgòpwî̌ tṳpṳ. Hǔgòpwî̌ ǒpe tṳpṳ dě kò cobǐ dǐdòkè alo̤mo̤ to̤to̤ htě kò kaǎ yǎta gûla̤cahtǐgutṳ̌ htǒonu to̤to̤.

⁴ Gûla̤ htǒoto̤to̤ akûnu, ta̤lṳwa̤hta htě kò la̤shû̌gèhtò̌ yǎta ta̤nṳmû̌nṳshu toǒnu aǒ ta̤wa̤, htodě ta̤wṳ̂dò tǒcahtǐ htě kò lòbǐ yǎta htanu aǒ tama. Dě tǒhtǒo akûnu, kò bè̌nṳ yǎta pè̌phû̌ tama dě kò shû̌nṳ nû̌ûta mû̌manǎ, ta Aro nò̌htǒ htě alǎ dǒjahtò̌nu tabo, ta ta̤mǎlò̤ amûshǐ a ta̤wṳ̂dò lo̤běnu ginǐ̤bě.

⁵ Dě tǒcahtǐ akhû̌nu, kò bǒ mǒkhû̌tanaphû̌ htě kò kaǎ yǎta Kherǔbe aplò̌rakhahtǒo ginǐ̤pwa̤ ǒ dě a hǔlò̤bǐ aděge ta tǒcahtǐ akhû̌dǒ dě Cǒmara la̤bòlû̌kè kò ta̤sǔ htǒo alo̤nu. La̤dǒhtû̌ǐphlo bǎ sînu a ǒplṳ̂pe akhû̌akhî, khònò̤dě hî̌phlohî̌wǒbò bǎ sî tò̤.

⁶ Bǎ kò tîwî̌tòwò bè̌ te̤bǎte̤tohtobò ta̤htǒotoǒ agûla̤ ta agûla̤ akhanu, pṳ̂̌ti̤ni̤꤮ pwa̤lṳhtò̌ta̤ toǒ nṳ hǐphû̌dû̌ cahtǐkû awǐgutṳ̌ to̤to̤ dě a nṳma̤ lǒkho a ta̤phî̌ta̤ma̤.

⁷ Pwǎ̤tadě ta̤cahtǐgutṳ̌ htǒo to̤to̤ akûnu, a nṳjò pwǎpǒ̤ pwa̤lṳhtò̌ta̤ hǐkǒdû̌gutṳ̌nu tapwǎ̤pa. Taněnu a nṳpwǎ taplǎpa dě a bǎ phî̌nṳ sǐ htě a glè lṳhtò̌ǐtû̌ ata̤sǔ aya htǒonu, ta kòyò htě a gènè̤ to̤tò̤ dě a ma̤sǔ te̤tò̤ toǒ ata̤sǔ aya.

⁸ Dě ta̤htǒo akhû̌akhî, Běcǎ sǎcahtǐ dǔlṳ bǎ pa ta, kò dè noǎǐ sadape hǐphû̌dû̌ cahtǐ ali̤ htǒotama hî̌mò̌nu klè̌la̤nṳ mè̤mè̤̌ dě hǐphû̌ cahtǐ htǒotama akûnu, a lṳ̂mo hǒtò̤.

⁹ Ta̤htǒotoǒ mî̌ a sò̌yṳ dǔlṳkhǒ pa ta̤ma̤dòǐ htě pa htukha khònò̤kha htǒotoǒ hǒ. A sò̌yṳ yṳ̂lṳ pa ta ta̤lṳta̤tò̌ htǒotoǒ ta ta̤phû̌ta̤li̤ htě kò lṳhtò̌ yǎ htǒotoǒnu, a ma̤ mṳ̂plîphǔjò bǎ pwa̤ hè subusabahtò̌ ta̤htǒo toǒ asò̌phlǒ tò̤.

¹⁰ Ta̤lṳta̤tò̌ htǒotoǒnu, a gètè̤ nǎla̤htò̌ǐ pwǎ ta̤subusaba a la̤klola̤bò̌ toǒ dě a hî̌ ta htǒomî̌ ǎyǎanî̤, htǒomî̌ oyǎanî̤ tò̤, tobǎ shǔbò na̤ pwǐhè̌o hǐnu, a hî̌ htǒonu toǒ hǒ. Ta̤sû̌ta̤tòwò htǒonumî̌ gûma̤ta̤ dě akhlo tokho pwǎ, a ma̤ tèlè̌jò sò̌phlǒ tò̤. Na̤klû phěyî̌ tokho, kòyòhǎkhû̌phû̌ bǎ gûma̤ to̤htû̌ Cǒmara ma̤tèplè̌ bǎ asî klè̌ asa tabo.

Ta̤wṳ̂dò asa

¹¹ Pwǎ̤ta khònò̤htǒo Khrî̌stu hè htû pwǐ pwa̤lṳhtò̌ta̤ hǐkǒdû̌ htě adû̌khlo kò tapwa̤nu hǒ. A phî̌hènṳ bǎ pa ta̤wî̤ta̤wǒ htě a ǒ ta pa khònò̤htǒo toǒ hǒ. A cû̌nṳhto dě hǐphû̌dû̌ cahtǐ adû̌khlo, a lǒbekhlo ta kòyò ma̤nu tama akûhǒ. Hǐphû̌dû̌ cahtǐ htǒonu, kòyò ma̤ yǎta acǔde dǐpwǎ̤꤮ tò̤, kò bǒlò̤ nû̌û mè̤tò̤tò̤, a ǒ dě hǎkhû̌ bǎonu mè̤tò̤tò̤.

¹² Bǎ a cû̌nṳ lṳhtò̌ta̤ dě ta̤gûla̤ cahtǐgutṳ̌ htǒoto̤to̤ akhanu, a phî̌nṳ pè̤ toǒ asǐ, pṳ̂pha toǒ asǐnu mè̤tò̤. A nṳ lṳhtò̌ta̤ ayanu, a phî̌nṳtû̌ asǐ akhû̌akhî, a hènṳ pwǎ taplǎpa dě ahtoaphlǔkè hǒ, dě a ma̤lû̌htò̌ge pa tûjûpwa̤ hǒ.

¹³ Dě pa ta̤sû̌ta̤tòwò ali̤htǒo akûnu, pè̤ toǒ ta pṳ̂phatolo toǒ asǐ htǒo ta pṳ̂phû̌ htě kò shû̌gèhtûhtò̌bò nû̌û ta phǎ htǒotoǒnu, kò bǎ plṳ yǎta kòyò htě a hî̌bǎphû̌mò̤ ta ta̤subusaba ala̤klo htǒonu tapwa̤ alo̤, ma̤tè̤hî̌dě ma̤pûhǐ ana̤klû mṳ̂plî dě akhlo tokho ayanudě, asî ma̤mṳ̂plî nû̌û hǐnu.

¹⁴ Hǐnudě, gènè̤kè̌ lǒkhomò̌ Khrî̌stu asǐ htǒonu, a ma̤ mṳ̂plî bûkhlo pa ta ta̤htǒotoǒ pě. Běcǎ sǎcahtǐ ǒhtûpwa̤ tûjûpwa̤ akhû̌akhî, Khrî̌stu lṳhtò̌ ana̤klû htě ata̤sǔ ǒ dǐcǎ tò̤ htǒo dě Cǒmara a ǒ hǒ. Ma̤pûhǐ pa ma̤ bǎ Cǒmara htě a htûpwa̤ htǒotapwa̤ ata̤ma̤ ayanu, Khrî̌stu shǔbòkè pa sò̌phlǒ htǒotoǒ ta pa ta̤ma̤ htě abwǐasîrî ǒkû̌kò tò̤ htǒotoǒ ta asǐ pě.

¹⁵ Dě ta̤wi̤ta̤kè̌ htǒo akhû̌akhî, ta̤howi̤ tûjûpwa̤ htě Cǒmara olò̤htokè bǎ kòyò htě a kaǎ nû̌û toǒ nî̤bǎpě ayanu, Khrî̌stu phî̌hènṳ bǎ Cǒmara akòyò toǒ ta̤wṳ̂dò asa htǒotacǎ dě Cǒmara a ǒ hǒ. Ma̤pûhǐ Khrî̌stu htè̌ge ta plûhǎhtò̌ pelecû̌kè kòyò ǒ bǎ ta̤wṳ̂dò ali̤kla toǒ ayanu, a bǎ khòsikè asò̌. Dě a khòsi asò̌ akhû̌akhî, asî nî̤bǎbò̌kû̌ û̌cata̤ya, a ta̤howi̤homò̤ tûjûpwa̤ htě Cǒmara olò̤hto htǒotoǒnu hǒ.

¹⁶ Hî̌kû̌nǎ lî̤ tabǎ htě kòyò tapwa̤pwa̤ dè khwè̌nǎ ta kòyò htǒotapwa̤ glè bè̌nṳ kòyòsinu tapwa̤ a û̌cata̤ya hî̌numî̌, ma̤pûhǐ a nî̤bǎ û̌cata̤ya htǒonu, a bǎ dǔlṳ nû̌ûta kòyò khwè̌ lî̤htǒo tapwa̤ mî̌ a bǎ sihtohǒ, hǐnu.

¹⁷ Kòyò htě a khwè̌ lî̤si htǒotabǎ tapwa̤nu, a dè ǒhtûpwa̤ pepwǎ hî̌dě, lî̤htǒotabǎ ma̤jò ta̤dǐcǎ tò̤. Pò̤̌ta htû̌ a sihto pěmî̌ kòyònu tapwa̤ phî̌nṳ nǒpwǎ kòyòsinu tapwa̤ a û̌cata̤ya.

¹⁸ Hǐnu akhû̌akhî, ma̤pûhǐ ta̤wṳ̂dò awǐnu tûmû tèhtò̌ ma̤ta̤ ayanu, a lo̤bǎ ta̤phû̌ta̤li̤ htě kò lṳhtò̌ nû̌û htǒonu asǐ.

¹⁹ Bǎ Mǒ̤jè pwe̤ǐlṳhtobò bǎ kòyò pṳ̂̌ tapwa̤ ta Cǒmara mǎnǎbò a ta̤sû̌ta̤tòwò toǒ akhanu, a phî̌ pṳ̂phû̌ toǒ asǐ ta pè̤ toǒ asǐ dě a kloshîlo̤dǒ nû̌ûta shi, htodě a phî̌ sophû̌shû̌lî̤ dě a bǒmě nû̌ûta sǒphò htě kò kaǎ yǎta hyssop phòphû̌ htǒotòphò akhi dě a shǐ nû̌ûta lî̤ htě kò khwè̌nǎ yǎta Cǒmara a ta̤sû̌ta̤tòwò htǒo tabǎ, htohǒtò̤ a shǐnṳbò nû̌ûta kòyò pṳ̂̌ tapwa̤.

²⁰ Mǒ̤jè hî̌ kòyò toǒ, “Sǐ htǒonumî̌ a ma̤měma̤gle Cǒmara ta̤wṳ̂dò htě Cǒmara mǎnǎ ta sî glè gûma̤kû̌ ayanu hǒ” a hî̌ asî hǐnu.

²¹ Htodě hǐphû̌dû̌ cahtǐ htǒotama ta ta̤kî̌ta̤kû̌ lǒ̤bò htě kò noǎ yǎta ta̤subusaba aya toǒnu, a shǐbò nû̌ûta sǐ hǐnunu.

²² Dè hî̌ mè̤mè̤̌ mî̌, ta̤sû̌ta̤tòwò hî̌, ta̤kî̌ta̤kû̌ htě kò noǎ yǎta ta̤subusaba aya toǒnu, kò bǎ ma̤mṳ̂plî nû̌û ta sǐnu a glè phǔbò pṳ̂̌tacǎ. Sǐ dè sǐlò̤ tò̤nu, Cǒmara bòlû̌bò̌kè ta̤sǔ dǐcǎ tò̤.

Khrî̌stu lṳhtò̌ ana̤ khû̌khî Cǒmara bòlû̌kè ta̤sǔ

²³ Hǐphû̌dû̌ cahtǐhtǒo ta ta̤kî̌ta̤kû̌ htě kò noǎ yǎta ta̤subusaba aya toǒnu, kò ma̤ kè̌mò̌mṳkû̌pwǎ mǒkhû̌htǒo a ta̤kî̌ta̤kû̌ toǒ. Ta̤kî̌ta̤kû̌ ǒ akû pṳ̂̌ tacǎnu kò bǎ ma̤ mṳ̂plîbò yǎta ta̤phû̌ta̤li̤ asǐ hǐnu. Pwǎ̤tadě mǒkhû̌ ata̤kî̌ta̤kû̌ mè̤mè̤̌ toǒnu, kò glè ma̤ mṳ̂plî yǎta ta̤lṳhtò̌ htě awǒkhlope ta ta̤phû̌ta̤li̤ asǐhtǒonu.

²⁴ Ma̤tè̤hî̌dě hǐphû̌dû̌ cahtǐ htě kò ma̤ nû̌ûta kòyò cǔde dě kò kè̌mò̌mṳ ma̤kû̌ mè̤mè̤̌pwǎ amo̤glo htǒotama akûnu, Khrî̌stu cû̌nṳ bǎnu mè̤tò̤. A cû̌nṳtû̌ mǒkhû̌ dě khònò̤htǒo a kwigwèbǎǐ bǎ pa dě Cǒmara alo̤mo̤.

²⁵ Pwa̤lṳhtò̌ta̤ hǐkǒdû̌gutṳ̌ htǒotapwa̤nu, a bǎ phî̌nṳ ta̤phû̌ta̤li̤ asǐ dě a nṳ ta̤gûla̤ cahtǐgutṳ̌nu to̤to̤ pṳ̂̌taně pwǎ̤tadě Khrî̌stu htǒonu a nṳ lṳhtò̌ ana̤ taplǎ hto taplǎ hǐnu mè̤tò̤.

²⁶ Khrî̌stu dè lo̤bǎ sala̤la̤ hǐnu hî̌mò̌nu, a tobǎ khòsi sala̤la̤dǒ asò̌ dě hǎkhû̌ htûhtò̌ akhape kò̌. A lo̤bǎ khòsi hǐnutò̤. Khònò̤htǒo bǎ hǎkhû̌ glè phǔ gutṳ akhanu, a hè khòsipwǎ taplǎpa dě a htophlǔ hǒ. Dě a lṳhtò̌ǐ ana̤klû ta ana̤htǒo akhû̌akhî, a phî̌cû̌ tephekè kòyòhǎkhû̌phû̌ toǒ ata̤sǔ toǒ hǒ.

²⁷ Kòyò pṳ̂̌ tapwa̤ bǎ sipwǎ taplǎpa. Dě a sihto pěnu, Cǒmara cèrò asî pě.

²⁸ Hǐnuakho ma̤pûhǐ Khrî̌stu phî̌cû̌ tephebòkè kòyò saprṳ̂ ata̤sǔ toǒnu dě a khòsipwǎ taplǎ pa. A hè gesǒ pě pwǎ̤tadě a hè phî̌cû̌ tephekè bǎ pa ta̤sǔ pěnu mè̤tò̤. A hè ma̤lû̌htò̌ge kòyò htě a ǒpo̤kè̌shuǐ nû̌ûnu toǒ pě.