Hebrǔ 4 - Kawyaw RC

La̤ǒkǔ ta Cǒmara akòyò toǒ aya

¹ Cǒmara olò̤ sadape pa tǒ̤lò̤khònò̤ ta pa nṳjò dě la̤ǒkǔ agûla̤ htǒonu pě. Ma̤pûhǐ sî pṳ̂̌꤮ tapwa̤ nṳjò dě la̤ǒkǔ ta Cǒmara olò̤ htǒo ayanu, pa bǎsè̌rè̌ǐ pana̤.

² Ma̤tè̤hî̌dě pa gana̤debǎ dǒ ta̤sò̌le̤sò̌lò̤ awi̤akè̌ pwǐ paphipaphu toǒ gana̤dehtonu hǒ. Ma̤tè̤ hî̌nu asî gana̤debǎ pwǎ̤tadě, a phî̌shǔkû̌ lǒkho kò ta̤sò̌le̤sò̌lò̤ awi̤akè̌ htǒo ta ta̤yṳ tò̤ akhû̌akhî, a htûbwǐhtûsîrî ta asîya tò̤.

³ Pò̤̌ta pa yṳǎ htǒotoǒnu, la̤ǒkǔ htě Cǒmara olò̤ htǒonu pa nṳbò̌ hǒ. Kòyò htě a yṳǎ kû̌kò Cǒmara tò̤ htǒotoǒ ayanu, Cǒmara hî̌ asî, “He sò̌phlǒdû̌ asî dě he hî̌lò̤ phlǔkè asî, ‘Shiga htě he glè ǐ yǎta asî la̤ǒkǔ htǒotò̤glònu, asî nṳbǎpe tò̤ hǒ,’” a hî̌ hǐnu. Pwǎ̤ta la̤ǒkǔ htě Cǒmara olò̤ ta a ǐ kò pě htǒonu, a ma̤htope dě a bǒlò̤ hǎkhû̌ akhanu pe.

⁴ Ma̤tè̤hî̌dě susǒti̤ni̤nu ti̤ni̤ awi̤akè̌ numî̌ lî̤cahtǐkû hî̌nǎ to̤to̤, “Ni̤susǒ akûnu Cǒmara ma̤htobò ata̤ma̤ dě bǎ susǒti̤ni̤nu ti̤ni̤nu a ǒkǔ,” a hî̌ hǐnu.

⁵ A hî̌ sǒsǒkè̌khînû̌nu a ǒ to̤to̤, “Shiga htě he glè ǐ yǎta asî la̤ǒkǔ ayanu, asî nṳbǎpe tò̤ hǒ” a hî̌po̤sǒ hǐnu.

⁶ Kòyò htě a nṳjòpe dě Cǒmara a la̤ǒkǔ htǒonu, a ǒkèpe toǒǒ. Pò̤̌ta kòyò bǎ꤮ nukha toǒ htě a gana̤dehto ta̤sò̌le̤sò̌lò̤ awi̤akè̌ toǒnu, a gana̤dekû̌ lǒkho Cǒmara ayo̤ tò̤ akhû̌akhî, a nî̤bǎ kû̌pe kò la̤ǒkǔ htǒonu tò̤ hǒ.

⁷ Hǐnudě mṳni̤ akhîakha htě kò glènṳ dě Cǒmara la̤ǒkǔ htǒonu, a bè̌ ǒkhǒtû̌ mṳni̤ ahǔwa̤ ti̤ni̤. A bè̌ ǒkhǒpe mṳni̤ ahǔwa̤ ti̤ni̤ numî̌ khò̌ti̤ni̤ hǒ. Děanǒkò něyî̤layî̤nu, Cǒmara pwe̤ǐlṳ tṳtṳ bǎ ayo̤htǒo tûmû ta Dǎ̤wi̤ pwǐ he khwè̌htonu dě a hî̌, “Khò̌ti̤ni̤ sî dè gana̤de Cǒmara ayo̤po̤ hî̌dě hǐkǒshò̌ lǒkho pûma̤ nî̌꤮” a hî̌ hǐnu.

⁸ Jò̌shua sûnṳ kò dě Khana̤gakû htǒonu, a dè mè̤mè̤̌ ga htě Cǒmara olò̤kè la̤ǒkǔ agûla̤ htǒo taga hî̌mò̌nu, Cǒmara hî̌khǒpe mṳni̤ ahǔwa̤ ti̤ni̤ dǐkhò̌꤮ tò̤.

⁹ Hǐnudě, alò̤ta Cǒmara ma̤hto ata̤ma̤ ni̤susǒ dě a ǒkǔ mṳni̤ susǒti̤ni̤nu ti̤ni̤nu hǒ, Cǒmara akòyò toǒ genṳǒkǔ kû̌ta Cǒmara pě.

¹⁰ Ma̤tè̤hî̌dě, pwǐ Cǒmara ǒkǔ dě ata̤ma̤ akûnu, kòyò htě a nṳjò dě la̤ǒkǔ ta Cǒmara olò̤ htǒotoǒnu, a ǒkǔ lǒkho ata̤ma̤ pě.

¹¹ Pa phiphu dě꤮ wǐ toǒnu, a gana̤dekû̌ Cǒmara ayo̤ tò̤ akhû̌akhî, a nṳjò kû̌kò dě Cǒmara la̤ǒkǔ agûla̤ htǒonu tò̤. Ma̤pûhǐ pa gûkè̌mò̌mṳ kû̌ pû paphipaphu dǐpwǎ̤꤮ tò̤, htohǒtò̤ ma̤pûhǐ pa nṳbǎ kû̌kò dě la̤ǒkǔ agûla̤ htǒo ayanu, pa tapwa̤ ta tapwa̤ jipwi̤ sělěplǒwǒnû̌û hò̌꤮.

¹² Cǒmara ale̤ayo̤nu, a htûpwa̤ dě a ma̤jò ta̤. A htòkhlope ta tǒ̤phû̌ htě a htò cî̌htè̌cî̌khobò tabǎ. A nṳ phò̌pa̤ to̤ dě yolahtûpwa̤ ta sò̌phlǒ la̤ǒplǒnû̌û agûla̤nu, htodě a nṳ phò̌pa̤ to̤dě awi̤ahtû̌ ta khwǐgîkû la̤ǒ gûla̤nu tò̤glò. A dǔlṳhtò̌ bǎ kòyò sò̌phlǒ a ta̤gènè̤ toǒ ta a ta̤sò̌yṳ awǒ ta a phû̌mò̤ toǒ.

¹³ Ta̤bǒlò̤ lǒ̤꤮ bò toǒnu, Cǒmara kè̌shǐjòbò a ǒhǔnu toǒ. Dě alo̤mo̤nu, alò̤pwǎta pa ǒkûglebò pṳ̂̌꤮ tapwa̤. Pa ma̤hto ta̤toǒ, ta pa gènè̤hto ta̤toǒnu, a kè̌shǐ sî̌ya lǒ̤꤮ bò. Pa bǎ hè pwe̤ǐhtò̌lṳbò yǎ pṳ̂̌꤮ tacǎ pě.

Ye̤shǔ mî̌ pwa̤tòlûhtò̌ hǐkǒdû̌gutṳ̌ tapwa̤

¹⁴ Hǐnudě, pa pṳ̂měpṳ̂glewǒ pa ta̤yṳta̤nǎ htě pa olò̤hto htǒonu hò̌꤮, ma̤tè̤hî̌dě, pa ǒ ǐ ta pa pwa̤tòlûhtò̌ hǐkǒdû̌gutṳ̌ htǒotapwa̤, dě a cû̌nṳ bǎ paya dě mǒkhû̌ hǒ. A mî̌ Cǒmara a phû̌makhû Ye̤shǔ htǒonuhǒ.

¹⁵ Pa pwa̤tòlûhtò̌ hǐkǒdû̌gutṳ̌ htǒotapwa̤nu, a sî̌ya pa ta̤khû̌ǎyû̌lò̤ toǒ dě a gwèbǎǐ pa. Ma̤tè̤hî̌dě a kè̌shǐ shěto̤bǎ ta ta̤lǒǎplò̤ǎ pṳ̂̌꤮ tacǎ pwǐ pa kè̌shǐ shěto̤bǎ htǒonu pwǎ̤tadě a ma̤sǔ ta̤ tò̤.

¹⁶ Hǐnudě, pa lo̤bǎ ta̤ bò̌khòtè꤮ bǎbǎnu, pa to hènṳ khuha dě pa Cǒmara htě a gwèbǎǐ kò htǒotapwa̤ a la̤hǎnòò̌ alo̤mo̤nu. Pa nî̤bǎ a ta̤gwèbǎǐ pě dě pa kè̌shǐbǎ abwǐdû̌sîrîhtû htě a ma̤jè pa htǒonu pě.