Hebrǔ 2 - Kawyaw RC

Ta̤ma̤lû̌htò̌ge mî̌ adû̌ayǒ

¹ Dě pa sî̌ya ta Cǒmara aphû̌khû mî̌ adû̌ayǒ hǐnu akhû̌akhî, ma̤pûhǐ pa cû̌pa̤kè ta̤te̤ta̤mǎ htě pa gana̤dehto htǒonu tò̤ ayanu, pa bǎ bè̌dubè̌na̤khlo yǎ.

² Cǒmara ǐlò̤ paphipaphu dě nukha toǒ ta̤wi̤ta̤kè̌ tacǎ. Dě a nohî̌bǎlò̤ tṳtṳ nû̌ûta mǒkhû̌tanaphû̌ toǒ. Dě kòyò htě a gana̤de ta̤wi̤ta̤kè̌ htǒotoǒnu, a bǎ gana̤de gûma̤ yǎ. Kòyò htě a gana̤de gûma̤ kû̌kò tò̤ toǒnu, Cǒmara cèròhtokè asî pwǐ a gwa ta asînu hǒ.

³ Hǐnudě, khònò̤htǒo pa dè bè̌dubè̌na̤ kû̌kò ta̤ma̤lû̌htò̌ge adû̌ayǒ htǒo tò̤ hî̌mò̌nu Cǒmara cèrò mè̤mè̤̌ pa pě. Cǒmara a ta̤ma̤lû̌htò̌ge aklè̌aklò htǒonu, Běcǎ sana̤ dǒhtû̌ǐlṳ wǐgutṳ̌ bǎ kò hǒ. Dě kòyò htě a gana̤de nû̌û hî̌htǒo toǒnu a pwe̤ǐlṳphlo tṳtṳ bǎ pa ta ta̤ma̤lû̌htò̌ge ta̤wi̤ta̤kè̌ htǒotoǒ numî̌ a mè̤mè̤̌ hǐnu.

⁴ Cǒmara pwe̤ǐlṳphlopo̤ bǎ kò ta ta̤ma̤lû̌htò̌ge ta̤wi̤ta̤kè̌ htǒonumî̌ ato mè̤mè̤̌. Dě ta̤dǔlṳ ta̤ma̤dòǐ cǒklî̌, ata̤ma̤ cǒklî̌kî̌ya toǒ ta ata̤ma̤ sû̌pi̤sò̌pi̤ cǒklî̌ toǒ akhû̌akhî, a dǔlṳphlo bǎ kò ta ta̤ma̤lû̌htò̌ge ta̤wi̤ta̤kè̌ htǒonumî̌ a tohǒ. Htohǒtò̤, jǔ꤮ tû̌ ato Cǒmara asò̌phlǒ dě a ǐlò̤ko bǎ kò ta̤sî̌ta̤jò sû toǒ. Dě a ǐlò̤ tṳtṳ nû̌ûta Běcǎ sǎcahtǐ. Běcǎ sǎcahtǐ sûhtǒo toǒ akhû̌akhî, Cǒmara dǔlṳphlo bǎkò ta ta̤wi̤ta̤kè̌ htǒonumî̌ a tohǒ.

Kòyò htě a sûcû̌ pa dě ta̤ma̤lû̌htò̌ge tapwa̤

⁵ Pa hî̌ bǎ sî ta hǎkhû̌sa ǒhtò̌ htû̌꤮ nǒkòpě awi̤akè̌htǒo numî̌, Cǒmara wû̌lǎdǒ mǒkhû̌tanaphû̌ toǒ dě a glèbǎ pǒǐ ta̤ayanu tò̤.

⁶ A wû̌lǎ tèplè̌khǒlè̌ kòyòhǎkhû̌phû̌ tokhohǒ, ma̤tè̤hî̌dě ta̤hî̌bǎ ǒ lî̤cahtǐkû to̤to̤ dě a hî̌, “Kǒ꤮ Cǒmara, na cû̌ shope̤nǎpè̤pe kòyòhǎkhû̌phû̌ toǒtò̤ děmî̌, asî mî̌ kòyò hî̌tè toǒ tètè? Asî mî̌pwǎ kòyò htě ale̤apwî̤ ǒkû̌kò tò̤ toǒ dě na cû̌ kè̌ǐkhwè̌ǐ asî pwî̌꤮ htǒo ma̤tè?

⁷ Na ǐ kòyòhǎkhû̌phû̌ toǒ a ta̤shû̌ta̤sho htě ajòkhlo ta mǒkhû̌tanaphû̌ toǒ teděsǎ pwǎ̤tadě anǒkònu, na ǐ gesǒ asî ta̤sîrîdû̌sîrîhtû, dě na bè̌dû̌bè̌htû gesǒ asî htǒotoǒ, dě

⁸ Na nopǒǐbò asî,” a hî̌ hǐnu. Bǎ Cǒmara nopǒǐ ta̤lǒ̤꤮ bò ta asî akhapěnu, ta̤htě a pǒǐtò̤nu aǒkèpe dǐcǎ꤮ tò̤. Pwǎ̤tadě khònò̤kha htǒonu pa kè̌shǐ kòyòhǎkhû̌phû̌ pǒǐbò ta̤lǒ̤꤮ bò hǒtò̤.

⁹ Pwǎ̤tadě, ta̤wi̤ta̤kè̌ htě pa sî̌ya mè̤mè̤̌ numî̌ Ye̤shǔ htǒonuhǒ. Bǎ a hèlò̤ hǎkhû̌bǎo akhanu, a nî̤bǎ ta̤sîrîshû̌sho htě ajakhlo ta mǒkhû̌tanaphû̌ toǒ tîkî̌phû̌, ma̤tè̤hî̌dě, Cǒmara abwǐasîrî akhû̌akhî, Ye̤shǔ bǎ khòsi bǎ pa lǒ̤꤮ bò aya. Dě Ye̤shǔ khòsi akhû̌akhî, khònò̤htǒo pa sî̌ya ta Cǒmara ǐ ta̤sîrîdû̌sîrîhtû, ta̤bè̌dû̌bè̌htû kò ta Ye̤shǔ hǒ.

¹⁰ Ta̤ lǒ̤꤮ bò toǒ numî̌ Cǒmara ayabò pwǎ dě a bǒlò̤bò ta̤ pṳ̂̌꤮ tacǎ hǒ. Ma̤pûhǐ Cǒmara ǐ pa̤dǒ kòyò saprṳ̂ ta a ta̤sîrîdû̌sîrîhtû toǒ ayanudě, a ma̤lǒma̤behtò̌ Běcǎ Ye̤shǔ ta a nokhòjîkhòjû nû̌û htǒonu hǒ. Cǒmara ma̤ ta̤ pwǐhè̌o numî̌ ato pwǎ. Dě Běcǎ Ye̤shǔ htû bǎ pa pwa̤sû klè̌ htě a ma̤lû̌htò̌ge pa tapwa̤ pě.

¹¹ Ye̤shǔ ma̤ mṳ̂plîge kòyòhǎkhû̌phû̌ a ta̤ma̤sǔ toǒ. Kòyòhǎkhû̌phû̌ htě Ye̤shǔ ma̤ mṳ̂plîge asîta̤sǔnu toǒ ta Ye̤shǔ htǒonumî̌, apha jûnû̌û tapwǎ̤pa pwǎ akhû̌akhî, Ye̤shǔ kaǎ asî ta pṳwè̤nu a sòwò̤ tò̤.

¹² Dě Ye̤shǔ hî̌ Cǒmara, “He pwe̤ǐlṳ bǎ he pṳwè̤ toǒ ta nami̤ pě. Dě kò subusabaplǒ nû̌û akǎmakûnu, he htû̌sò̌ǐ na pě.”

¹³ A hî̌po̤, “He nǎla̤ yṳǎǐ Cǒmara.” Dě a hî̌po̤, “He ǒplǒkû̌ ta phû̌mǔphû̌khû htě Cǒmara ǐlò̤ he toǒ bǎo.”

¹⁴ Phû̌mǔphû̌khû a kaǎ nû̌û htǒotoǒnu, a ǒ ta ana̤klû sǐshi dě a sijò akhû̌akhî, Běcǎ Ye̤shǔ hèlò̤ phî̌nṳkû̌ kòyòhǎkhû̌phû̌ ana̤klû htě a sǒsǒkû̌ta asînu. A htûhtò̌ sǒsǒta kòyòhǎkhû̌phû̌ akhû̌akhî, a sijò. Ma̤pûhǐ Ye̤shǔ ma̤pî̌kè khînǎmo̤pha hǐkǒdû̌ htě kò kaǎ yǎta Sehto htě a ǒ ta a ta̤po̤ta̤phǎshû̌sho dě a pǒǐ ta̤si htǒotado ayanu, a khòsikè asò̌.

¹⁵ Htohǒtò̤ a khòsihto akhû̌akhî, a plûhǎhtò̌ pelekèbò kòyò htě a ǐsha ta̤si ala̤nu toǒ hǒ. Asî htǒotoǒnu asǒsǒta a htû ta̤si ajû toǒ, dě sahtò̌ bǎ a ǒphijaû̌lò̤ akhape a ǐsha lǒkho ta̤si ala̤.

¹⁶ Pa sî̌yaphlowǒ ta Běcǎ Ye̤shǔ ma̤jè mǒkhû̌tanaphû̌ toǒ tò̤. A ma̤jè ta̤pǎ̤ Abraham akhlialè toǒ.

¹⁷ Hǐnu akhû̌akhî, ma̤pûhǐ Běcǎ Ye̤shǔ htûtû̌ pwa̤ htě a ma̤ Cǒmara a ta̤phî̌ta̤ma̤ pwǐ pwa̤tòlûhtò̌ hǐkǒdû̌gutṳ̌ htě acǒatè̤ ta ayo̤ dě a gwèbǎǐjò kò tapwa̤, htohǒtò̤ ma̤pûhǐ a khòsibǎ ta kòyò toǒ a ta̤ma̤sǔ bòlû̌kè ayanu, a hèlò̤ phî̌ kòyòhǎkhû̌phû̌ ala̤klo sǒsǒta apṳawè̤ htǒonu toǒ hǒ.

¹⁸ Dě khònò̤htǒo, ana̤ sana̤ kè̌shǐ shěto̤bǎ hèhto ta̤khòjîkhòjû toǒ, ta̤lǒǎplò̤ǎ toǒ akhû̌akhî, kòyò htě a kè̌shǐ shěto̤bǎ ta ta̤lǒǎplò̤ǎ toǒnu a ma̤jèbò̌pwǎ kò.