Hebrǔ 13 - Kawyaw RC

Ta̤ma̤to Cǒmara asò̌phlǒ

¹ Mo̤ǐhè lǒkho nû̌û tapwa̤ ta tapwa̤ pwǐ Khrî̌stuphû̌ tobǎ mo̤ǐ nû̌û tapwa̤ ta tapwa̤nu nî̌.

² Shope̤ kaǎshǔ lǒkho pûma̤ shǐpwa̤shǐmè̤ ma̤ nî̌. Kòyò toǒǒnu asî kaǎshǔ lǒkho shǐtè̤mè̤ dě a ta̤gènè̤ to̤tò̤ akûnu, a kaǎshǔ lò̤to tanamǒkhû̌phû̌ toǒ.

³ Sî̌ya ma̤jèkû̌dǒ kòyò lòte̤ apo̤kû toǒ dě bè̌ na sò̌phlǒ pwǐ na lòte̤kû̌dǒ ta asî apo̤kû hǐnu nî̌꤮. Gènè̤ ma̤jèkû̌dǒ kòyò htě a khòjîkhòjû ta̤ toǒ dě bè̌ na sò̌phlǒ pwǐ na khòbǎkû̌dǒ ta̤ ta asî hǐnu nî̌꤮.

⁴ Kòyò lǒ̤bò htě a ǒ ta hǐtaphò toǒ ayalè̌ dě, a ǒ ta aphû̌ama htǒo akhû̌akhî, a bǎ bè̌dubè̌na̤ lǒkho a ǒ ta hǐtaphò htǒonu. Ma ta wṳ̂nu bǎ ma̤bò̌ nû̌ûkhû̌ tò̤, bǎ cǒtè̤ nû̌ûkhû̌ tapwa̤ ta tapwa̤. Kòyò htě asò̌phlǒ patǎ phû̌mò̤nu toǒ ta kòyò htě a cû̌sǔnṳ kòphû̌kòma toǒnu Cǒmara cèrò asî pě.

⁵ Ǒtephe lǒkho ta ta̤mo̤ǐ wû toǒ nî̌꤮. Sò̌phlǒtobǎ lǒkho ta ta̤ htě a ǒ ta nanu toǒ, ma̤tè̤hî̌dě Cǒmara hî̌, “He bè̌kè nǒ na dî̌kî̌꤮ tò̤, he wîkè na dǐkhò̌꤮ tò̤,” a hî̌ hǐnu.

⁶ Hǐnudě, “Cǒmara mî̌ pwa̤ htě a ma̤jè he. Kò ma̤ he hî̌tètè̌꤮ bǎbǎ, he ǐsha tò̤,” pa hî̌ hè̌o numî̌ anî̤ pwǎ.

⁷ Gènè̤htò̌nṳ dǒ lǒkho kòyò htě a htûhto sî hǐkǒdû̌ dě a dǒhtû̌ǐhto bǎ sî ta Cǒmara ale̤ayo̤nu toǒ nî̌꤮. Gènè̤kè̌ lǒkho asî ta̤ǒhtûpwa̤ htě awǒnu toǒ, dě gûkè̌mò̌mṳ dǒ lǒkho asî ta̤yṳ htǒonu toǒ nî̌꤮.

⁸ Ye̤shǔkhrî̌stu htǒonu, bǎhǎno bǎbǎ, khò̌ti̤ni̤ bǎbǎ, pe̤wo̤pě bǎbǎ, a htû̌lè̌jò tò̤, tṳ̂gûla̤la̤ pwǎ.

⁹ Nolǒǎplò̤ǎ cû̌sǔ pûma̤ sî ta ta̤sû̌ǐtòwòǐ lǒ̤bò htě a kî̌yanu toǒ ma̤ nî̌꤮. Gûcû̌kû̌ pûma̤ nî̌꤮. Sî sò̌phlǒ htǒonu, a to khû̌ǎshû̌shohtò̌ ta Cǒmara abwǐasîrî akhû̌akhî pwǎ. Sî gana̤de gûma̤kû̌ shǎǎshǎo a ta̤sû̌ta̤tòwò toǒ akhû̌akhî, sî sò̌phlǒ khû̌ǎshû̌shohtò̌ tǒ̤ hǐnu mè̤tò̤. Sî gana̤de gûma̤kû̌ ta̤sû̌ta̤tòwò akhû̌akhî htǒonu, a nî̤bwǐnî̤sîrî sîya dǐcǎ꤮ tò̤.

¹⁰ Pa yṳǎ Khrî̌stu toǒ ayanu, pa ǒ ta pa ta̤lṳhtò̌wa̤. Pwǎ̤ta Yṳ̌daphû̌ pwa̤lṳhtò̌ta̤ htě a lṳhtò̌ǐ ta̤ dě a ma̤ta̤ hǐphû̌dû̌ cahtǐ akû toǒnu, ta̤lṳhtò̌ htě pa ǎ yǎmî̌ anî̤nu asî ǎjò kû̌kò tò̤.

¹¹ Yṳ̌daphû̌ pwa̤lṳhtò̌ta̤ hǐkǒdû̌gutṳ̌ tapwa̤nu, a phî̌nṳ ta̤phû̌ta̤li̤ asǐ a cû̌nṳ ta̤gûla̤ cahtǐgutṳ̌ htǒoto̤to̤ dě a nṳlṳhtò̌ bǎ kò ta̤lṳhtò̌ dě a glè bòlû̌kè kò ta̤sǔ htǒonu toǒ. Pwǎ̤tadě ta̤phû̌ta̤li̤ ana̤klû toǒnu kò bǎ cû̌ shû̌gèkèbò yǎ dě ta̤lṳhtò̌ho khlo.

¹² Hǐnudě ma̤pûhǐ Ye̤shǔ ma̤ cahtǐ bǎ kòyòhǎkhû̌phû̌ htǒotoǒ ta asǐ ayanu, a bǎcû̌ khòsi ana̤ dě wî̤khlo tò̤glò.

¹³ Hǐnudě pa cû̌ khòplǒdǒ ta̤pi̤jishǐcǒ ta a dě wî̤khlo htǒonu hò̌꤮.

¹⁴ Ma̤tè̤hî̌dě payanu wî̤ htě a ǒměgle tûjûpwa̤ dě hǎkhû̌ bǎonu a ǒ dǐwî̤ tò̤. Pa kè̌lǎ wî̤ htě a glè hè pě htǒonu tî̤wî̤.

¹⁵ Hǐnudě, pa Běcǎ Ye̤shǔkhrî̌stu a ta̤ma̤jè pa akhû̌akhî, pa lṳhtò̌ pa ta̤htû̌sò̌ǐ a ta̤lṳhtò̌htǒo dě Cǒmara a ǒ pṳ̂̌꤮ taplǎ dě Ye̤shǔ mî̌ pa Běcǎ, pa olò̤ pwǐhè̌onu hò̌꤮.

¹⁶ Ma̤ta̤wǒ toǒ bǎbǎ, ta̤ma̤shû̌ma̤jo nû̌û tapwa̤ ta tapwa̤ toǒnu bǎbǎ shope̤ lǒkho pûma̤ nî̌꤮, ma̤tè̤hî̌dě htǒotoǒ numî̌ ta̤lṳta̤tò̌ htě ato Cǒmara asò̌phlǒ.

¹⁷ Gana̤de lǒkho sî ta̤subusaba a hǐkǒdû̌ toǒ ayo̤ dě gûma̤kû̌ pwǐ asî hî̌lò̤nu nî̌꤮. Asî ǒpo̤ kè̌ǐkhwè̌ǐ sî ta̤htûpwa̤ dě ta̤ htě asî ma̤ toǒnu, a bǎ pwe̤ǐlṳgesǒ Cǒmara pě. Sî dè gana̤de tò̤ hî̌dě a ma̤ ta ta̤sǎpla̤sǎyṳ pě. Dě a htûbwǐhtûsîrî sîya dǐcǎ꤮ tò̤.

¹⁸ Kwisabapo̤ bǎ lǒkho paya. Pa sî̌ya te̤mǎ ta dě pa sò̌phlǒkû htǒonu mo̤mo̤ a mo̤pwǎ, a bè̌ pa ta̤sǔ dǐcǎ꤮ tò̤. Htodě pa ma̤ta̤ titètè̌꤮ bǎbǎ, pa sò̌yṳ ma̤còcè̌pwǎ ta̤ htě ato toǒ pṳ̂̌꤮ taplǎ.

¹⁹ Dě sî kwisaba akhanu, he kwigwèbǎǐ gutṳgla sî ta ma̤pûhǐ Cǒmara sûge lǎgesǒ he dě sîǒnu dě, kwi sabashoshopo̤ bǎ lǒkho heya nî̌꤮.

Ta̤kwisaba gutṳ̌lò̤

^20-21 Ma̤pûhǐ sî ma̤toma̤bǎ ta̤pè̤ta̤dû a Cǒmara htǒotapwa̤ asò̌phlǒnu dě, ta̤wǒ lǒ̤꤮ bò htě sî lo̤bǎ toǒnu, a ǐ bòmṳ̂sîglî tû̌ta sî nî̌꤮. Ye̤shǔkhrî̌stu akhû̌akhî, Cǒmara ma̤ta̤ dě pakû pwǐ a to tû̌ta asò̌phlǒnu toǒ nî̌꤮. Cǒmara ma̤htûpwa̤gehto pa Běcǎ Ye̤shǔ ta ta̤si hǒ. Dě Běcǎ Ye̤shǔ khòsi asò̌ dě asǐ bǎ mèlò̤ akhû̌akhî, a ma̤měma̤glekèhto Cǒmara a ta̤wṳ̂dò asa htě a ǒ tûjûpwa̤ htǒonutûmû hǒ. Dě a ma̤ hǐnu akhû̌akhî, Ye̤shǔ htû pa pwa̤gèǐsophû̌ htě adû̌khlokò tapwa̤ hǒ. Pa mî̌ asophû̌ toǒ hǒ. Kò ma̤sîrîdû̌sîrîhtû tû̌ta Ye̤shǔkhrî̌stu tûjûpwa̤ talakhǎ nî̌꤮.

Yo̤sǎ gutṳ̌lò̤

²² He khobǒsû̌ sî, lî̤ htě he khwè̌ ǐkhû̌ǐǎ sî htǒonu a htû nǒtò̤. Htodě he kwigwèbǎǐ sî ta sî khòsò̌do gana̤de he ta̤ǐkhû̌ǐǎ sî htǒonu nî̌꤮.

²³ He sò̌yṳ ǐsî̌ya sî ta kò plûhǎhtò̌ pa pṳwè̤ Timò̤̌te dě apo̤kû hǒ. A dè hèto̤ lǎkû̌ he pě hî̌dě htû̌꤮ he hè ǒlèkû̌ sî pěnu, he kaǎhènṳ yǎ pě.

²⁴ Pwe̤ǐlṳcû̌ bǎ pa ta̤hî̌mo̤hî̌wǒ htǒotoǒnu ta sî hǐkǒdû̌ lǒ̤꤮ bò ta bò Cǒmara akòyònu toǒ nî̌꤮. Htodě pa pṳwè̤ Khrî̌stuphû̌ Italiganu toǒ sûhè bǎ sî ata̤hî̌mo̤hî̌wǒ toǒ.

²⁵ Cǒmara abwǐasîrî ǒkû̌ tû̌ta sî lǒ̤bò nî̌꤮.