Hebrǔ 12 - Kawyaw RC

Papha Cǒmara

¹ Hǐnudě, kòyò htě a dǔlṳ bǎ pa ta a ta̤yṳta̤nǎ htǒotoǒnu, a ǒ te̤we̤plṳ̂te̤we̤phǎ ta pa. Hǐnu akhû̌akhî, pa wîkè ta̤pṳ̂̌ tacǎ htě a ma̤ dǐdò pa toǒ ta ta̤sǔ htě a ma̤ topho lòkhǔkè pa htǒotoǒ hò̌! Dě pa kè̌plǒnû̌û kòyò ǐ pa ta̤bò̌htò̌htǔ palo̤mo̤ htǒo dě pa khòsò̌do khlè̌hèto̤ a ǒnu hò̌.

² Alò̤ta kòyò khlè̌ toǒ kè̌hètotǐ pwǎpǒ̤ ta̤ma̤pè̤ bò̌htò̌htǔ htǒonuhǒ, hǐnudě pa kè̌hètotǐ tû̌pwǎ Ye̤shǔ hò̌. Ma̤tè̤hî̌dě a mî̌ pa ta̤yṳta̤nǎ a kòshî̌kòtṳ tapwa̤. Htohǒtò̤, a mî̌ pwa̤ htě a ma̤lǒma̤be bǎ pa ta̤yṳta̤nǎ tapwa̤. A khòsihtopěmî̌, a sî̌yanǎhto ta a nî̤bǎ ta̤sò̌le̤ pě akhû̌akhî, a tobǎ khòsi nò̌dòhtǔlo̤ pwǎ̤tadě a sòwò̤ dǐcǎ꤮ tò̤. Khònò̤dě a hǎnòò̌ Cǒmara a la̤hǎnòò̌ htò̌yî̤ bǎ cǔdemûnu tokho hǒ.

³ Ma̤pûhǐ sî ma̤ ta̤wǒ dě sî lòdǒlòde pûtò̤, dě sî sò̌phlǒpî̌kè pûtò̤ ayanu, gènè̤kè̌ lǒkhomò̌ Běcǎ Ye̤shǔ awi̤akè̌ htǒonu, ta̤ma̤sǔphû̌ toǒ sò̌khěkhû̌khwè nû̌û ma̤tukutakǎ mè̤mè̤̌ nû̌û pwǎ̤tadě a khòsò̌do mè̤mè̤̌ asîkhû̌.

⁴ Sî shěshǔ ta ta̤ma̤sǔphû̌ htǒotoǒ pwǎ̤tadě sî khòbǎ ta̤jîta̤jû to̤htû̌ kò bǎma̤si sînu, a ǒ dǐpwǎ̤hǒtò̤.

⁵ Cǒmara ǐkhû̌ǐǎ sî pwǐ aphû̌ ta ana̤ numî̌ sî shope̤ hǒ ya? A hî̌ sî ta, “Kǒ꤮ hephû̌ sî꤮ bǎ Běcǎ sǎhtǎ sû̌ǐtòwòǐ wǒge sî akhanu, bè̌dubè̌na̤ a ta̤sǎhtǎ sû̌ǐwǒ sî htǒonu nî̌꤮. Bǎ a sǎhtǎ sî akhanu, sò̌phlǒpî̌ pûma̤ lǒkho ma̤ nî̌.

⁶ Ma̤tè̤hî̌dě, Cǒmara sǎhtǎ sû̌ǐwǒge kòyò htě a mo̤ǐnu toǒ. Dě kòyò lǒ̤bò htě Cǒmara bè̌ asî ta aphû̌nu toǒnu, a phlě nû̌û.”

⁷ Sî khòbǎ ta̤toǒnu, khòsò̌do dě bè̌yǎ pwǐ pha Cǒmara sû̌ǐwǒgepwǎ sînu nî̌꤮. Cǒmara sǎhtǎ sû̌ǐwǒge aphû̌ ta ana̤nu toǒ pwǎ. Pha htě a sǎhtǎ sû̌ǐwǒge aphû̌ toǒ tò̤ numî̌ a ǒnǒ tapwa̤pwa̤ ya?

⁸ Cǒmara sû̌ǐtòwòǐ wǒgebò aphû̌ pṳ̂̌꤮ tapwa̤. A dè sǎhtǎ sû̌ǐwǒge sî tò̤ hî̌mò̌nu, sî htû mè̤mè̤̌ aphû̌ mè̤hǒtò̤. Sî mî̌pwǎ phû̌ htě a shodo phanu toǒ pwǎ.

⁹ Pa ǒ ta pamo̤papha bǎ hǎkhû̌bǎo toǒ dě a sǎhtǎ sû̌ǐtòwòǐ wǒge pa dě pa bè̌dubè̌na̤ asî. A sǒsǒ hǐnuakho pa ǒ ta papha dě mǒkhû̌ htǒotapwa̤ akhû̌akhî, pa to shò̌lò̤khlope pa sò̌phlǒ dě ala̤ htǒonu. Dě pa nî̤bǎ ta̤htûpwa̤ pě.

¹⁰ Papha bǎ hǎkhû̌ bǎotoǒ sǎhtǎ sû̌ǐtòwòǐ wǒge pa aněala amṳni̤mṳsa sî toǒnu, a yî̤tò̤, teděsǎphû̌pwǎ dě a bè̌ lǒkho ta a ma̤ ta̤ htǒonumî̌ awǒ pwǎ a gènè̤ dě a sû̌ǐpwǎ pa. Ma̤pûhǐ pa cahtǐ sǒsǒ pwǐ papha Cǒmara htǒonudě, a sǎhtǎ sû̌ǐtòwòǐ wǒge pa ta̤ htě a glè htûbwǐhtûsîrî tû̌ paya htǒonu toǒ pwǎ.

¹¹ Bǎ Cǒmara sǎhtǎ sû̌ǐ wǒge pa akhanu, alò̤ta sǎpla̤sǎyṳnu, alò̤ta ta̤sò̌le̤sò̌lò̤ ǒ dǐcǎ꤮ tò̤. Pwǎ̤tadě kòyò htě a khòbǎnǒ kò sǎhtǎ sû̌ǐtòwòǐ wǒge nû̌û htǒotoǒnu, nǒkòpě dě a nî̤bǎlè̌ khû̌kǎ pěnumî̌ mî̌pwǎ ta̤ǒhtûpwa̤ acǒatè̤ dě a nî̤bǎ sò̌phlǒ gûjûkabǎ pě.

Ta̤sû̌ǐtòwòǐ toǒ ta ta̤ǐsè̌rè̌sè̌so toǒ

¹² Hǐnudě, ma̤shohtò̌ge sî cǔde htě a gaya̤ htǒonu toǒ, dě ma̤shohtò̌ gesǒ sîkhò̌leme̤ htě a gònò̤gèglè htǒonu toǒ.

¹³ Tûrû̌ gûhè sělěkû̌ ta̤te̤ta̤mǎ aklè̌ htǒonu nî̌꤮. Kòyò htě ata̤yṳ pî̌tî̌ toǒnu, alò̤ta kòyò khò̌lopo̤děnu toǒ hǒ. Ma̤pûhǐ kòyò htě a khò̌lopo̤dě htǒotoǒ htò̌tukhu pûtò̤, htodě ma̤pûhǐ asî khò̌lopo̤ wǒgesǒ ayanu, tûrû̌ gûhè sělěkû̌po̤ lǒkho nî̌꤮.

Ta̤ǐsè̌rè̌sè̌so kò ta ta̤htû̌tiwǐ cû̌khǒkè Cǒmara awi̤akè̌

¹⁴ Jipwi̤ ǒmo̤ǒkla kû̌ta kò pṳ̂̌꤮ tapwa̤ nî̌. Jipwi̤ ǒhtûpwa̤ cahtǐ lǒkho nî̌꤮. Ma̤tè̤hî̌dě ta̤ǒhtûpwa̤ cahtǐ dè ǒtò̤ hî̌mò̌nu, kò kè̌shǐjò Běcǎ dǐpwǎ̤tò̤.

¹⁵ Ma̤pûhǐ sî pṳ̂̌꤮ tapwa̤ nî̤bǎdǒ lǒkho Cǒmara abwǐasîrî htǒonudě, sè̌rè̌ǐ lǒkho sîna̤ nî̌꤮. Nohtûhtò̌ pûma̤ lǒkho sîna̤ pwǐ sǒmṳwè̤ htě kò ǎyǎ dě a sijò kònu toǒ dǐpwǎ̤꤮ ma̤ nî̌. Kòyò htě alò̤ta sǒmṳwè̤ htě kò ǎyǎ dě kò sijò htǒotoǒnu, a glè dǒhtò̌ sîkla dě a ma̤pò̤ma̤sha kòyò saprṳ̂ ta a wè̤htò̌si htǒonu pě.

¹⁶ Nohtûhtò̌ lǒkho pûma̤ sî na̤klû htǒonu ta kòyò htě a cû̌sǔnṳ mamǔmakhûnu toǒ ma̤ nî̌. Htûhtò̌ sǒsǒ lǒkho pûma̤ pwǐ Ětò̌ htě a bè̌ duna̤ kû̌kò Cǒmara ayo̤ tò̤ dě a shaǎkè aphû̌wè̤pwa̤ û̌cata̤ya ta hǎsǐ tabanu tapwa̤ ma̤ nî̌.

¹⁷ Pwǐ sî sî̌yahtotû̌nu hǒ, nǒkò dě bǎ a sò̌yṳ hè phî̌dǒ ta̤howi̤ dě apha ǒ akhanu, apha ǐpe nû̌û tò̤. A kè̌lǎ ta̤howi̤ ta ami̤sǎshi pwǎ̤tadě, a shaǎhto phû̌wè̤pwa̤ a û̌cata̤ya htǒo akhû̌akhî, a htû̌lè̌ tèplè̌khǒjòpe tò̤.

^18-19 Sî hèphǔ dě Cǒmara a ǒ htǒonumî̌, alò̤ta Israelphû̌ dě wǐkha toǒ hè Sǐnǎkholo a ǒnu mè̤tò̤. Asî hè Sǐnǎkholo dě kò kè̌shǐjò yǎ, kò pṳ̂bǎjò yǎ htǒǒnutama a ǒ, mî̌gèhtò̌ dě kholohtǒotama alo̤, poǒlṳ khǐsuwu jobǐ, gili̤sǎpla̤hèdû̌, tèhtè po̤htò̌ ta Cǒmara ayo̤po̤htò̌ dě kholohtǒonu tama akû. Israelphû̌ toǒ gana̤de yo̤po̤htò̌ dě a ǐsha tûlû̌shû̌ akhû̌akhî, asî kwigwèbǎǐ Cǒmara ta a glè hî̌bǎ pǒhǒ.

²⁰ Ma̤tè̤hî̌dě, yo̤po̤htò̌ dě a hî̌, “Ta̤phû̌ta̤li̤ bǎbǎ a dè hè tè̌bǎ kholohtǒotama hî̌nu, bǎ wîsikè yǎta lo̤,” yo̤ po̤lò̤ htǒotûmûnu asî khòpè̤pe tò̤.

²¹ Asî kè̌shǐ lǒkho ta̤ htûhtò̌ pwǐhè̌o bǎ asî lo̤mo̤ dě, asî ǐsha mè̤mè̤̌ akhû̌akhî, “He ǐsha gònò̤gèglè” Mǒ̤jè hî̌ hǐnu.

²² Pò̤̌ta, sî lè̌dě sî hèto̤ dě Sǐokholo hǒ. Kholo htǒotamanu mî̌ Cǒmara htě a htûpwa̤ htǒotapwa̤ awî̤ tî̤wî̤ dě kò kaǎ nû̌ûta Ye̤rǔshèlèwî̤ dě mǒkhû̌ htǒonu tî̤wî̤ hǒ. Cǒmara atanamǒkhû̌phû̌ htě a ǒ asě ta asěkû toǒ hèǒplǒ sò̌le̤sò̌lò̤plǒbò nû̌û bǎnu. Dě sî hè ǒkû̌dǒ ta atanamǒkhû̌phû̌ htǒotoǒ hǒ.

²³ Sî hèto̤ dě Cǒmara a phû̌wè̤pwa̤ toǒ la̤hè ǒpo̤htunû̌û agûla̤ htǒonuhǒ. Kò khwè̌nṳmǎnǎ asîmi̤ dě mǒkhû̌ hǒ. Sî hèto̤ lǒkho dě Cǒmara htě a glè cèrò kò pṳ̂̌꤮ tapwa̤ ta ana̤ htǒotapwa̤ alo̤mo̤ hǒ. Sî hèto̤ kòcǒkòtè̤ dě wǐkha toǒ a yolahtûpwa̤ htě Cǒmara ma̤lǒbehto nû̌û htǒotoǒ a ǒ hǒ.

²⁴ Sî hèto̤ Ye̤shǔ a ǒ hǒ. Ta̤wṳ̂dò asa htě kòyòhǎkhû̌phû̌ ta Cǒmara aplǎkû htǒonu a htû bǎ pwa̤ma̤ta̤ma̤ aplǎkû tapwa̤ hǒ. Htohǒtò̤ sî hèto̤ dě Běcǎ Ye̤shǔ asǐ la̤sǐlò̤ agûla̤ htě awǒkhlope ta Abělè asǐhtǒonu a ǒ hǒ.

²⁵ Hǐnudě, ma̤pûhǐ sî htû pûma̤ kòyò htě a gana̤de Cǒmara ayo̤po̤htò̌ dě a la̤lò̤kè Cǒmaranu toǒ ma̤nu, sè̌rè̌ǐ lǒkho sîna̤ nî̌꤮. Bǎ Israelphû̌ toǒ gana̤de ta̤ǐsè̌rè̌sè̌so asî bǎ hǎkhû̌bǎo akhanu, asî gana̤de lǒkho nû̌ûyo̤ tò̤. Hǐnudě a khlè̌ lû̌htò̌bò̌ lǒkho ta ta̤cèrò tò̤. Dè ma̤hǐnudě pa dè la̤lò̤kè mǒkhû̌ htǒotapwa̤ ǐsè̌rè̌ pahtǒo dèhî̌dě, gènè̤kè̌mò̌, sî khlè̌ lû̌htò̌bò̌jòpe nǒta Cǒmara a ta̤cèrò dî̌kî̌꤮ tò̤.

²⁶ Bǎnuakha Cǒmara ayo̤ htǒonu apo̤ guyṳbò hǎkhû̌ tebě. Pwǎ̤ta khònò̤mî̌ a olò̤ ta, “He ma̤guyṳpo̤sǒ pě taplǎ, dě he ma̤guyṳ tû̌ hǎkhû̌ htǒonu tò̤, he ma̤guyṳpo̤bòdǒ mǒla̤ toǒ pě,” a hî̌ hǐnu.

²⁷ A hî̌ ta, “Ma̤po̤sǒ pě,” amûasǎ mî̌, a hî̌lṳphlo ta Cǒmara ma̤guyṳhtò̌bò ta̤bǒlò̤nu toǒ pě, dě a hǎmǎkèbò pě. A guyṳjò tò̤ toǒ ǒkè tû̌pwǎ ayanu, Cǒmara ma̤guyṳ hǐnupwǎ.

²⁸ Hǐnudě, pa hî̌bwǐhî̌sîrî plǒnû̌û Cǒmara hò̌, ma̤tè̤hî̌dě pa nî̤bǎ shiga htě a guyṳjòtò̤ htǒotaga. Pa sabahtò̌ Cǒmara ta ta̤saba htě ato nû̌ûsò̌phlǒ ta ta̤ǐsha bè̌dû̌bè̌htû nû̌û akû htǒonu hò̌.

²⁹ Ma̤tè̤hî̌dě pa Cǒmara mî̌ alò̤ta mî̌plo̤ htě a gèsikè kò htǒonuhǒ.