Hebrǔ 11 - Kawyaw RC

Ta̤yṳ

¹ Ta̤yṳ amûasǎ mî̌ ta̤ htě pa kè̌shuǐ yǎ toǒnu, pa yṳǎ měgle ta pa nî̤bǎ hǒ. Htohǒtò̤ ta̤yṳ amûasǎ mî̌ ta̤htě pa kè̌shǐjò hǒtò̤ toǒnu, pa yṳǎ měgle sayè̤pe ta pa glè nî̤bǎpěnu hǒ.

² Cǒmara htû̌sò̌ǐ kòyò dě wǐkha toǒ mî̌ a ǒ lǒkho ta ta̤yṳta̤nǎ pwǐhè̌onu hǒ.

³ Ta̤yṳ akhû̌akhî, pa sî̌yapwǎ ta Cǒmara bǒlò̤ mǒla̤ aphwǐaphrû̌ ta ayo̤ pwǎ. Hǐnudě ta̤ htě pa kè̌shǐjò khònò̤kha htǒotoǒ numî̌ a ǒ bǎ ta̤htě pa kè̌shǐjòtò̤ toǒ a ǒ hè pwǎ.

⁴ Ta̤yṳ akhû̌akhî, Abělè lṳhtò̌ Cǒmaranu awǒkhlo ta Kaî̌no ata̤lṳ. Cǒmara phî̌shǔ Abělè a ta̤lṳta̤tò̌. Hǐnudě, Abělè ata̤yṳ akhû̌akhî, Cǒmara bè̌ nû̌û pwǐ kòcǒkòtè̤ tapwa̤nu hǒ. Abělè ata̤yṳ khû̌khî, a sihtohǒ pwǎ̤tadě a hî̌bǎpe pa ta ata̤yṳ awi̤akè̌.

⁵ Ěnò̌ htǒonu bǎbǎ, ata̤yṳ akhû̌akhî, a shěto̤bǎ kû̌kò ta ta̤si tò̤, Cǒmara kaǎge kihtò̌ htûpwa̤ nû̌û dě mǒkhû̌. Cǒmara kaǎge hǎmǎkè nû̌û akhû̌akhî, kò kè̌shǐjòpe nû̌û tò̤. Ma̤tè̤hî̌dě bǎ Cǒmara kaǎge kihtò̌ Ěnò̌ hǒtò̤ akhanu, a mî̌ kòyò htě a ma̤to Cǒmara asò̌phlǒ tapwa̤, lî̤cahtǐkû hî̌hǐnu.

⁶ Ta̤yṳ dè ǒtò̤nu, tapwǎ̤꤮ mî̌ kò ma̤tobò̌ Cǒmara asò̌phlǒ tò̤, ma̤tè̤hî̌dě, kòyò lǒ̤bò htě a hè Cǒmara a ǒ toǒnu, a bǎ yṳǎ ta Cǒmaranu a ǒhtûpwa̤ dě kòyò htě a sò̌phlǒsho kè̌lǎ nû̌û toǒnu, a bǎ yṳǎ ta Cǒmara ǐ asî ta̤ma̤nî̤khû̌kǎ pě hǐnu.

⁷ Nǒa ata̤yṳ akhû̌akhî, Cǒmara ǐsè̌rè̌nǎ nû̌û ta̤htě a kè̌shǐ sî̌ya hǒtò̤ dě a glè htûhtò̌ htû̌꤮ anǒkòpěnu toǒ. A bè̌dubè̌na̤ Cǒmara, a gana̤de nû̌ûyo̤ dě a ma̤htò̌ sǒkhlidû̌ htě a glè ma̤lû̌htò̌ge nû̌ûta a hǐphû̌phòphû̌ aya tabǎ. Nǒa ta̤yṳ akhû̌akhî, a dǔlṳ ta Cǒmara cèrò kòyòhǎkhû̌phû̌ toǒ pě. Ata̤yṳ khû̌khî, Cǒmara bè̌ yǎ pwǐ kòcǒkòtè̤ tapwa̤ hǒ.

⁸ Bǎ Cǒmara kaǎ Abraham dě a nohǎhtò̌cû̌ nû̌û gataga htě a glè ǐ nû̌ûta a pě akhanu, a to hǎhtò̌cû̌ bǎtè tò̤glònu a sî̌ya tò̤ pwǎ̤tadě ata̤yṳ akhû̌akhî, a gana̤de dě a hǎhtò̌cû̌.

⁹ Ta̤yṳ akhû̌akhî, a cû̌ǒ bǎ kòhǔwa̤shi kòhǔwa̤ga htě Cǒmara olò̤ ta a glè ǐ nû̌ûnu tebě. A cû̌ǒ sǒsǒta khlilèhǔwa̤phû̌ tapwa̤ dě a cû̌ ma̤htò̌nṳ ahǐphû̌ ato̤hǔbǐ nû̌ûta hǔgòpwî̌ toǒ dě a cû̌ǒ pwǎ hǐphû̌kû. Dě a phû̌makhû Isǎko ta ali̤ Yǎ̤kò htě a nî̤bǎ sǒsǒdǒ ta̤olò̤ dě Cǒmara a ǒ htǒo sò̌gini̤nu, a ma̤ sǒsǒkû̌ ahǐphû̌ bǎnunu.

¹⁰ Abraham ma̤ pwǐ Cǒmara hî̌ nû̌ûnu, ma̤tè̤hî̌dě a ǒpo̤ kè̌shuǐ wî̤ htě akòshî̌ měgle tûjûpwa̤ htǒonu tî̤wî̤. Wî̤ htǒotî̤wî̤nu, Cǒmara tîwî̌tòwònǎhto dě a ma̤htò̌htotû̌ ta ana̤.

¹¹ Abraham mo̤pwa̤ hǒ, htohǒtò̤ ama Shǎra mî̌ a shodophû̌phû̌ pwǎ̤ta ata̤yṳ akhû̌akhî, aphû̌ ǒbò̌pe dě a htûhtò̌bò̌pe pha tapwa̤. A yṳǎ ta Cǒmaranu acǒatè̤ ta a ta̤olò̤.

¹² Abraham mo̤pwa̤ glè sikèhǒ pwǎ̤ta a tapwǎ̤pa dě aphû̌ali̤ toǒnu a ǒwo̤ǒphǎ sǒsǒta shǎ dě mǒla̤, a ǒwo̤ǒphǎ sǒsǒta lo̤semě dě shidû̌shite̤we̤htu htě kò dǒbòpè̤pe yǎtò̤nu toǒ.

¹³ Kòyò lǒ̤bò htě Cǒmara olò̤ nû̌ûta a glè ǐ nû̌û htǒotoǒnu a yṳǎ gutṳ Cǒmara to̤ bǎ a si lǒkhonu ti̤ni̤. Ta̤ htě Cǒmara olò̤kè nû̌û dě a glè ǐ asî htǒotoǒnu, a nî̤bǎ hǒtò̤, pwǎ̤ta asî kè̌shǐnǎwǐ yî̤hǒ dě a sò̌le̤ phî̌shǔnǎwǐ ta̤olò̤ htǒotoǒ hǒ. Asî olò̤ lǒkho ta asî mî̌ a cû̌htû shǐtè̤mè̤ dě kòshikòga pwǎ, dě asî hè ǒkǔpwǎ bǎ hǎkhû̌bǎo teděsǎphû̌ pwǎ, a hî̌ lǒkho hǐnu.

¹⁴ Kòyò htě a hî̌ lǒkho hè̌o toǒnu a dǔlṳ lîtîklî̌ ta asî kè̌lǎǐ lǒkho tû̌ ashiga hǒ.

¹⁵ Wî̤ htě Abraham ta kòyò htǒotoǒ hǎhtò̌cû̌kènu, asî gènè̤ ta wî̤ mî̌ asîya mè̤tò̤. Ma̤tè̤hî̌dě, a dè mè̤mè̤̌ hî̌mò̌nu, asî genṳsǒ numî̌ anî̤ pwǎ.

¹⁶ Pwǎ̤tadě asî nǎsǔ kè̌shuǐ mè̤mè̤̌ mǒkhû̌ shiga htě a mo̤khlo htǒonu tebě. Hǐnudě asî kaǎ Cǒmara ta asî Cǒmaranu, Cǒmara sòwò̤tò̤. Dě Cǒmara ma̤wǒnǎ bǎ asî wî̤htǒo akhû̌akhî, a dǔlṳ ta asî toǒ glè kaǎ Cǒmara ta asî Cǒmaranu a sòwò̤ lǒkho tò̤.

¹⁷ Bǎ Cǒmara sèlèkè̌ Abraham akhanu, ata̤yṳ akhû̌akhî, a lṳhtò̌ aphû̌khû Isǎko. A nî̤bǎ Cǒmara a ta̤olò̤ pwǎ̤ta a tîwî̌tòwònǎ dě a glè lṳhtò̌ǐ aphû̌khû htě a ǒtû̌ tapwǎ̤꤮ pa htǒonu tapwa̤.

¹⁸ Cǒmara hî̌ yǎ, “He olò̤ ta nakhlinalè toǒnu a hèlò̤ tṳtṳ dě Isǎko a ǒ pě.” Pwǎ̤ta Abraham tîwî̌tòwò dě a glè lṳhtò̌ aphû̌khû htě a ǒpwǎ tapwǎ̤꤮ pa htǒonu tapwa̤.

¹⁹ Abraham gènè̤hto ta Cǒmara glè ma̤htûpwa̤gebò̌sǒ pwǎ Isǎko hǐnu. Dè hî̌ mè̤mè̤̌ mî̌ asǒsǒta a nî̤bǎ gesǒ aphû̌khûhtǒo dě ta̤si akû hǒ, ma̤tè̤hî̌dě Cǒmara dè hî̌ dǐdò nû̌û tò̤ hî̌nu, a glè ma̤si mè̤mè̤̌pwǎ aphû̌khû pwǎ.

²⁰ Ta̤yṳ akhû̌akhî, Isǎko howi̤nǎ aphû̌ Yǎ̤kò, Ětò̌ ta ta̤howi̤ htě a nî̤bǎ anǒkò pě toǒ.

²¹ Ta̤yṳ akhû̌akhî, bǎ Yǎ̤kò glè phǔsi akhanu, a howi̤nǎwǐkè ali̤ Jǒjè aphû̌ sò̌gini̤. A pṳ̂mě gètè̤wa̤pwǎ a nò̌htǒnǒkò dě a sabahtò̌ Cǒmara.

²² Ta̤yṳ akhû̌akhî, bǎ Jǒjè glè̌ si akhanu, a hî̌nǎkè ta htû̌꤮ anǒkòpěnu, Israelphû̌ toǒ hǎhtò̌gekè bǎ Egyptgakû htǒonu pě. Dě a mǎnǎ ayo̤ ta htû̌꤮ sî hǎhtò̌ge pěnu, phî̌genṳ lǒkho hekhwǐ pěnî̌꤮, a hî̌ hǐnu.

²³ Ta̤yṳ akhû̌akhî, bǎ Mǒ̤jè ǒlò̤hto akhanu, amo̤apha kè̌shǐ ta phijaû̌phû̌ htǒotapwa̤nu, awî̤ kî̌yatû̌ akhû̌akhî, asî bè̌hǔ nû̌û sula. Khwǐ hî̌lò̤ ayo̤ ta a ma̤sibò Yṳ̌daphû̌ a phû̌makhû phijaû̌ toǒ pě pwǎ̤tadě asî ǐshape Khwǐ a ta̤hî̌bǎlò̤yo̤ htǒonu tò̤.

²⁴ Ta̤yṳ akhû̌akhî, bǎ Mǒ̤jè phû̌sǎ dû̌htò̌ akhanu, kò kaǎ nû̌û ta Khwǐpharǒ aphû̌mamǔ aphû̌khû dě, a nokaǎ kò hǐnu dǐpwǎ̤tò̤.

²⁵ Mǒ̤jè bè̌lò̤ asò̌phlǒ, wǐ꤮ ta a glè lṳ̂ ta̤mo̤ teděsǎphû̌ htě a ǐ htûhtò̌ ta̤sǔ htǒonu, a glè khòkû̌dǒ ta̤jîta̤jû ta Cǒmara akòyò toǒnumî̌, a mo̤khlope a sò̌yṳ hǐnu.

²⁶ Mǒ̤jè bè̌lò̤ asò̌phlǒ ta, khòbǎ ta̤pi̤jishǐcǒ ta Khrî̌stu ayanu, ale̤dû̌pwî̤htû khlope ta Egyptga a ta̤dû̌yò̤htò̌sa toǒ, ma̤tè̤hî̌dě a ǒpo̤kè̌shuǐ ta Cǒmara ǐ nû̌û a ta̤ma̤nî̤khû̌kǎ htû̌꤮ anǒkòpě.

²⁷ Ta̤yṳ akhû̌akhî, a hǎhtò̌cû̌ dě Egyptgakû. Khwǐ sò̌phlǒdû̌ nû̌û pwǎ̤tadě a ǐsha tò̤. Ma̤tè̤hî̌dě a kè̌shǐ Cǒmara htě kò kè̌shǐjò yǎtò̤ htǒotapwa̤ akhû̌akhî, a khòsò̌do sělěpo̤.

²⁸ Ta̤yṳ akhû̌akhî, a ma̤htò̌ bǎ kò pwè htě kò kaǎ yǎta ta̤cû̌tûlû̌pwè. Ma̤pûhǐ tanaphû̌ htě a ma̤si phû̌wè̤pwa̤htǒo hè ma̤si pû Israelphû̌ wè̤pwa̤ toǒ tò̤nu, a noplṳbò kò sophû̌sǐ dě takhalo̤.

²⁹ Ta̤yṳ akhû̌akhî, Israelphû̌ toǒ geginṳ cû̌tûlû̌bò̌kè shidû̌shite̤we̤lî̤ htǒotoǒ htě asǒsǒta klè̌ cû̌ dě khosûkhû̌ htǒonu. Pwǎ̤tadě bǎ Egyptphû̌ toǒ gûnṳkû̌ akhanu, asî lòjǔ sikèbò.

³⁰ Ta̤yṳ akhû̌akhî, bǎ Israelphû̌ toǒ cû̌te̤we̤hto Yerikhò̌wî̤ susǒti̤ni̤ akhanu, wî̤we̤ htò̌yî̤ lòte̤jakè.

³¹ Dě Ya̤rikhò̌wî̤kûnu, mamǔpò̤lò̤ htě ami̤ ta Rakhǎ ǒtapwa̤. A yṳǎ Cǒmara akhû̌akhî, bǎ kò ma̤si kòyò htě a yṳǎ Cǒmara tò̤ toǒ akhanu, kò ma̤si to̤dǒ nû̌û tò̤. Ma̤tè̤hî̌dě a dǒshuǐ Israelphû̌ htě a nṳ kè̌sû̌ǐ gabǎnu taga akûnu toǒ dě ahǐkû akhû̌akhî, kò ma̤si to̤ nû̌û tò̤.

³² He lo̤bǎ pwe̤ǐlṳpo̤ bǎ sî mî̌titè? He dè pwe̤ǐlṳpo̤ bǎ sî ta Gǐdao, Barè̌, Shaso, Yě̤phatǎ, Dǎ̤wi̤, Shamuělè ta pwa̤po̤ toǒ awi̤akè̌ hî̌dě akhîakha ǒpe tò̤.

³³ Ta̤yṳ akhû̌akhî, asî htǒotoǒnu, a shěpè̤ shiga toǒ. Asî pǒǐ cǒcǒtè̤tè̤ ta̤ dě a nî̤bǎ ta̤ htě Cǒmara olò̤ asînu toǒ. A ma̤pè̤ lǒkho sî̌ò̌ dě sî̌ò̌ toǒnu a ě asî tò̤.

³⁴ Asî ma̤pi̤bò̌ lǒkho mî̌gè plo̤dû̌ toǒ. Asî lû̌htò̌bò̌ lǒkho ta kò shusi asî ta nò̌shesòbò toǒ. Asî khû̌ǎyû̌lò̤ pwǎ pwǎ̤tadě asî htûhtò̌ kòyò htě ashû̌asho mè̤mè̤̌ toǒ. Asî nî̤bǎ ta̤sîrîshû̌sho ta ta̤shěta̤pe̤ aya dě a ma̤pè̤kè shihǔwa̤ gakhlophû̌ htě a sò̌khě asî toǒ.

³⁵ Ta̤yṳ akhû̌akhî, mamǔ toǒǒnu, akhlialè toǒ sihtohǒ pwǎ̤tadě a nî̤bǎ gesǒ asî dě ta̤si akû. Pwa̤yṳǎta̤phû̌ toǒǒnu, kò ma̤jîma̤jû asî. Kò hî̌ asî ta asî dè wîkè lǒkho ata̤yṳ hî̌dě, kò glè plûhǎhtò̌ pelecû̌kè asî pwǎ̤tadě a jûshǔ kò tò̤. Dě asî ma̤hǐnu akhû̌akhî, kò ma̤jîmajûsi asî. Pwǎ̤ta, htû̌꤮ asî si htûpwa̤gesǒ pě ti̤ni̤nu, ma̤pûhǐ asî nî̤bǎ lǒkho ta̤ǒhtûpwa̤ htě a mo̤khlo ta htǒotuhtu ayanudě, asî ma̤ lǒkho hǐnu pwǎ.

³⁶ Toǒǒnu, kò ma̤ sòwò̤bò asî, kò pi̤jishǐcǒbò asî, dě kò phlě asî ta sǒpli̤nò̌plè, toǒǒnu kò coglo asî ta sǒpli̤te̤htò̌, dě kò dǒnṳ asî dě apo̤kû.

³⁷ Toǒǒnu kò wîsi asî ta lo̤, kò dǔtṳ kǒkî asî ta htò̌bǔbǎdû̌, kò shusi asî ta nò̌shesòbò. Asî cû̌shido lǒkho dě a kûsǒ lǒkho pwǎ sophû̌phě, pè̤phě toǒ, asî hǒwi̤shèwè mè̤mè̤̌, kò ma̤jîma̤jû asî. Kò pè̤ǎpè̤obò asî toǒ.

³⁸ Kòyò htǒotoǒnu awǒ tûlû̌shû̌ dě a gwape ta hǎkhû̌htǒo tò̤. Asî ǒhtûpwa̤ bǎ hǎkhû̌ bǎonu, a bǎ cû̌shido te̤we̤ sǒsǒta kòyò htě a shodohǐ shodophò toǒ, asî bǎ cû̌ǒpwǎ gûla̤ htě kòyò cû̌ǒto̤ dǐpwǎ̤tò̤ toǒ agûla̤ pwǎ.

³⁹ Asî ta̤yṳ akhû̌akhî, kòyò lǒ̤bò htǒotoǒnu, Cǒmara kè̌mo̤ǐ mè̤mè̤̌ asî. Pwǎ̤ta Cǒmara olò̤bò toǒnu, asî nî̤bǎ kû̌kò tò̤.

⁴⁰ Ma̤tè̤hî̌dě ta̤ htě awǒkhlo ta htǒotoǒnu, Cǒmara yè̤lònǎhto bǎ paya dě a ǐ nû̌ûta pa pě. Cǒmara bè̌lò̤hto asò̌phlǒ ta pa tobǎ nṳ ǒpa to̤kû̌ ta kòyò dě꤮ wǐkha toǒ. A ta̤yè̤lò̤nǎ numî̌ pa glè ma̤lǒma̤be plǒkû̌ ta asî htǒonuhǒ.