Galatǐ 2 - Kawyaw RC

Pò̌lu ta pwa̤nophû̌ ahǔwa̤ toǒ

¹ Anǒkò shǐlǐ̤něhtonu he ta Banabǎ gesǒ Ye̤rǔshèlèwî̤ dě he kaǎnṳpo̤ Tǐtǔ.

² Cǒmara dǔlṳhtò̌ he ta he tobǎ cû̌ bǎnu akhû̌akhî, he cû̌ pwǎ. Bǎ he ǒ bǎnu akha, he kè̌shǐhǔ kòyò htě kò bè̌ asî ta pwa̤yṳǎta̤ aprṳ̂aho hǐkǒdû̌ toǒ dě he dǒhtû̌ǐpo̤ bǎ asî ta ta̤sò̌le̤sò̌lò̤ awi̤akè̌ pwǐ he dǒhtû̌ǐ bǎ kò pṳ̂̌꤮ plǎ dě Yṳ̌daphû̌ mè̤tò̤ toǒ aklanu pwǎ. He ta̤dǒhtû̌ǐ htě a tûlû̌kèhtonu toǒ bǎbǎ, khònò̤htǒo toǒnu bǎbǎ, he sò̌yṳ nohtûhtò̌ nòdû̌ yǎtò̤.

³ Tǐtǔ htě a ǒkû̌ ta he htǒotapwa̤ numî̌ Greek khlilèphû̌ cǒtè̤ tapwa̤ pwǎ̤ta ta̤dǔtṳphěnu, kò noshû̌ nǒyǎ dǐpwǎ̤꤮ tò̤.

⁴ Pwǎ̤ta Tǐtǔnu kòyò toǒǒ sò̌yṳ nodǔtṳ nû̌û phě. Asînu toǒ mî̌ kòyò htě a sûlûlòho ana̤ pwǐ pṳwè̤nu toǒ pwǎ. Ma̤pûhǐ asî nṳ sèlèhǔ pa htû ta̤pelesesǎ dě Ye̤shǔkhrî̌stu akû htǒonudě asî hènṳhǔpwǎ dě pakla. Dě asî sò̌yṳ nohtûhtò̌pwǎ pa ta Yṳ̌daphû̌ toǒ a ta̤mǎlò̤ ajû.

⁵ Pò̤̌ta ma̤pûhǐ ta̤sò̌le̤sò̌lò̤ awi̤akè̌ atoamè̤ htǒo ǒměǒgle dě sîkû ayanu, pa gana̤dekû̌ asî ta̤hî̌bǎ dî̌kî̌꤮ tò̤.

⁶ Kòyò htě kò nohtû asî ta hǐkǒdû̌ dě pwa̤yṳǎta̤ aprṳ̂aho akû toǒ numî̌, a noshû̌nṳlǒ shû̌nṳkhlopo̤ ta he ta̤dǒhtû̌ǐ htǒotoǒ dǐcǎ꤮ tò̤. Kò hî̌ ta asî mî̌ hǐkǒdû̌ htě ami̤dû̌ toǒ pò̤̌ta he sî̌ya ta Cǒmaranu a kè̌dû̌ kè̌pî̌tî̌ nǒ kò dǐpwǎ̤꤮ tò̤.

⁷ Kòyò htû hǐkǒdû̌nu toǒ hî̌lǒhî̌khlo ta he ta̤dǒhtû̌ǐ dǐcǎ꤮ tò̤. A hî̌ ta̤pǎ̤꤮ pe he ta, asî kè̌shǐ Cǒmara ǐ he ta̤phî̌ta̤ma̤ dě he glè hè dǒhtû̌ǐ bǎ kò ta ta̤sò̌le̤sò̌lò̤ awi̤akè̌ dě Yṳ̌daphû̌ mè̤tò̤ toǒ a ǒ pwǐ a ǐlò̤hto Petru ta̤ma̤ htě a bǎ dǒhtû̌ǐ bǎ kò ta̤sò̌le̤sò̌lò̤ awi̤akè̌ dě Yṳ̌daphû̌ toǒ aklanu hǒ.

⁸ Ma̤tè̤hî̌dě Cǒmara ǐlò̤ tṳtṳ a ta̤po̤ta̤phǎ ta Petru dě a glè ma̤ ta̤ma̤ pwǐ pwa̤nophû̌ tapwa̤nu ta Yṳ̌daphû̌ toǒ aya. A sǒsǒta hǐnuakho Cǒmara ǐlò̤ tṳtṳ he ta he glè ma̤kû̌pwǐ pwa̤nophû̌ tapwa̤nu ta Yṳ̌daphû̌ mè̤tò̤ toǒ aya hǒ.

⁹ Jǎgomo̤ ta Petru ta Jowǎ̤ni̤ htě kò bè̌ asî ta hǐkǒdû̌ htǒotoǒnu, a sî̌yaphlo lǒkho ta ta̤bwǐta̤sîrî htǒonumî̌ Cǒmara ǐpwǎ he, a kè̌shǐ lǒkho hǐnu. Dě ta̤htǒo akhû̌akhî, asî kè̌shǐ ta Banabǎ ta he numî̌ pwa̤ma̤plǒnû̌ûta̤ ta asî hǐnu pwǎ. Asî sò̌phlǒto sǔshibǎ ta pa glè ma̤ta̤ dě Yṳ̌daphû̌ mè̤tò̤ toǒ aklahǒ, asî dě a glè ma̤lè̌ bǎ Yṳ̌daphû̌ toǒ akla hǐnu pwǎ.

¹⁰ Tǒ̤ ta̤tacǎ dě asî sò̌yṳ noma̤ pa numî̌ pwǎpǒ̤ pa shope̤ ma̤jè pûma̤ kòyò shuphǔshèwè toǒ ma̤nu pwǎ. Htǒonumî̌ ta̤tacǎ htě he sò̌phlǒsho ma̤nòtû̌nu pwǎ.

Pò̌lu sû̌ǐ Petru dě Atiǒwî̤kû

¹¹ Pwǎ̤ta bǎ Petru ǒ dě Atiǒwî̤ akhanu, a ma̤tota̤tò̤ akhû̌akhî, he hî̌ yǎ dě kòyò yṳǎ Khrî̌stu toǒ a lo̤mo̤ hǒ.

¹² Ma̤tè̤hî̌dě bǎ Jǎgomo̤ nohè akòyò Yṳ̌daphû̌ htě a yṳǎna̤ǎta̤ toǒ hèto̤ hǒtò̤ akhanu, Petru ǎhtukû̌dǒ ta Yṳ̌daphû̌ mè̤tò̤ dě a yṳǎna̤ǎ Khrî̌stu toǒ. A ǎhtuohtu hǐnumî̌ ato pwǎ. Pwǎ̤ta nǒkò, bǎ Jǎgomo̤ nohè akòyò htǒotoǒ hèto̤ akhanu, a sǒsǔ tephecû̌kè dě a ǎhtukû̌dǒpe ta asînu toǒ tò̤, ma̤tè̤hî̌dě Jǎgomo̤ a sû̌kho Yṳ̌daphû̌ htǒotoǒnu, a sò̌yṳ ta Yṳ̌daphû̌ mè̤tò̤ toǒ dǔtṳphě akhû̌akhî, a ǐsha asîla̤ dě a sǒsǔ tephecû̌kè pwǎ.

¹³ Yṳ̌daphû̌ htě a yṳǎ Khrî̌stu ahǔwa̤ toǒnu, a sî̌ya ta Petru ma̤ htǒonumî̌ a totò̤, pwǎ̤ta a gûma̤kû̌ pwǐ Petru ma̤nunu. Banabǎ gûma̤kû̌ tû̌ pwǐ asî jîkhǒjîyò ma̤nu hǒ.

¹⁴ Bǎ he kè̌shǐ ta asî cû̌tope ta ta̤sò̌le̤sò̌lò̤ awi̤akè̌ a ta̤te̤ta̤mǎ aklè̌aklò tò̤ akhanu, he hî̌ Petru dě asî lo̤mo̤, “Na mî̌ Yṳ̌daphû̌ tapwa̤ pwǎ̤ta na ǒhtûpwa̤ pwǐ Yṳ̌daphû̌ mè̤tò̤ tapwa̤ numî̌ anî̤ hǒ. Pwǐ Yṳ̌daphû̌ tapwa̤ ala̤klo ma̤nu, na to lṳ̂kû̌ ma̤kû̌pe tò̤, ma̤tè̤hî̌dě khònò̤htǒo na yṳǎhto Khrî̌stu hǒ. Ma̤hǐnudě khònò̤htǒo na cû̌ noshû̌ Yṳ̌daphû̌ mè̤tò̤ dě a yṳǎ Khrî̌stu toǒ ta a glè gûma̤kû̌ pwǐ Yṳ̌daphû̌ ala̤klo numî̌ anî̤ ya?”

Yṳ̌daphû̌ ta Yṳ̌daphû̌ mè̤tò̤ toǒ a ta̤yṳta̤nǎ khû̌khî, asî nî̤bǎ ta̤ma̤lû̌htò̌ge

¹⁵ He hî̌ sělěpo̤ Petru, “Pa dě pa ǒlò̤ pwǐ Yṳ̌daphû̌ htě a sî̌ya Cǒmara a ta̤mǎlò̤ htǒotoǒnǔ. Pa mî̌ asǒsǒta Yṳ̌daphû̌ mè̤tò̤ htě a sî̌ya kû̌kò ta̤mǎlò̤ tò̤nu toǒ mè̤tò̤. Htodě kòyò hǐnu toǒ mî̌ pa kaǎ asî ta ta̤ma̤sǔphû̌.

¹⁶ Pwǎ̤ta pa Yṳ̌daphû̌ htě a yṳǎ Khrî̌stu htǒotoǒ numî̌, pa sî̌ya ta Cǒmara bè̌cǒbè̌tè̤ kòyò tapwa̤numî̌ a bè̌cǒbè̌tè̤ nû̌û ta a lṳ̂kû̌ ma̤kû̌ ta̤sû̌ta̤tòwò akònu mè̤tò̤. Mî̌pwǎ a yṳǎna̤ǎ Ye̤shǔkhrî̌stu htǒonu pwǎ. Pa htǒotoǒnu bǎbǎ, ma̤pûhǐ Cǒmara bè̌cǒbè̌tè̤ kû̌ pa ta pa ta̤yṳ Khrî̌stu htǒo akhû̌akhînu dě, pa yṳǎna̤ǎ Ye̤shǔkhrî̌stu hǒ. Mî̌ htě pa gûma̤kû̌ ta̤sû̌ta̤tòwò akònu mè̤tò̤, ma̤tè̤hî̌dě kò lṳ̂ma̤bò̌ ta̤sû̌ta̤tòwò akò dě kò htûhtò̌bò̌ kòyòcǒkòyòtè̤nu a ǒ dǐpwǎ̤꤮ tò̤.

¹⁷ “Bǎ pa jipwi̤ kè̌lǎ ta Cǒmara bè̌cǒbè̌tè̤ pa ta Khrî̌stu khû̌khî akhanu, kò kè̌shǐ pwǎ pa pwǐ pa htû ta̤ma̤sǔphû̌ sǒsǒta Yṳ̌daphû̌ mè̤tò̤nu toǒ pwǎ. A dè htûpwǎ hǐnu hî̌dě, Khrî̌stu mî̌ pwa̤ htě a noshû̌ pa ta pa bǎ ma̤ta̤sǔ hǐnu ya? A noshû̌ pa hǐnu mè̤tò̤.

¹⁸ Pwǎ̤ta he dè hî̌ tikhlǐ kî̌yasǒ heyo̤ ta Cǒmara bè̌cǒbè̌tè̤ kòyò htě a lṳ̂kû̌ ta̤mǎlò̤nu toǒ pwǎ dèhî̌mî̌ he htû pepwǎ ta̤ma̤sǔphû̌ tapwa̤ pwǎ.

¹⁹ Bǎ he jipwi̤ lṳ̂kû̌ ta̤sû̌ta̤tòwò akhanu, he lṳ̂ ma̤tobò̌jò Cǒmara asò̌phlǒ dǐkhò̌꤮ tò̤. Hǐnudě ma̤pûhǐ he ǒhtûpwa̤bò̌ ta Cǒmara ayanudě, he sikè dě ta̤sû̌ta̤tòwò akû hǒ.

²⁰ Htǒonumî̌ alò̤ta he si kû̌ta Khrî̌stu dě nò̌dòhtǔ alo̤ hǒ. He ǒhtûpwa̤ mè̤petò̤ pwǎ̤ta Khrî̌stu ǒhtûpwa̤ dě hekû hǒ. Ta̤ǒhtûpwa̤ htě he ǒhtûpwa̤ khònò̤ htǒonumî̌ mî̌pwǎ he ǒhtûpwa̤ ta ta̤yṳǎ Cǒmara aphû̌khû htě a mo̤ǐ he dě a ǐlò̤kè a ta̤htûpwa̤ ta heya htǒonu tapwa̤ akhû̌akhî pwǎ.

²¹ He wîkè Cǒmara abwǐasîrî tò̤, ma̤tè̤hî̌dě kòyò tapwa̤pwa̤ dè htûhtò̌bò̌jò kòyòcǒkòyòtè̤ ta lṳ̂ma̤kû̌ ta̤sû̌ta̤tòwò akhû̌akhî pwǎ dèhî̌dě, Khrî̌stu khòsi asò̌ htǒonumî̌ a nòdû̌bò hǒ.”