Tîsalònǐ ginǐ̤bǎ tôbǎ 3 - Kawyaw RC

Kwisabadǒ bǎ paya

¹ Pa pṳwè̤ sî꤮, pa sò̌yṳ pwe̤ǐ gutṳ̌lò̤ sî ta, ma̤pûhǐ Běcǎ a ta̤sò̌le̤sò̌lò̤ awi̤akè̌ lṳpîshîcû̌ phwèphwè ayanu, kwisaba bǎ paya nî̌꤮. Htohǒtò̤ pwǐ sî phî̌shǔhto ata̤sò̌le̤sò̌lò̤ awi̤akè̌ htǒonu ta dě ta̤bè̌dubè̌na̤ akûnu, ma̤pûhǐ kò phî̌shǔ sǒsǒta pwǐ sî phî̌shǔ htǒonudě, kwisabapo̤ lǒkho bǎ paya nî̌꤮.

² Kwisabapo̤ bǎ pa ta Běcǎ glè ma̤lû̌htò̌ pa ta dě kòyòphû̌mò̤nu toǒ ta kòyòjînu toǒ a cǔdekû nî̌꤮. Ma̤tè̤hî̌dě Cǒmara a ta̤sò̌le̤sò̌lò̤ awi̤akè̌ htǒonu kò yṳǎbò pṳ̂̌꤮ tapwa̤ mè̤tò̤.

³ Pwǎ̤tadě Běcǎ htǒonu acǒatè̤ ta ayo̤ dě a ǐshû̌htò̌ sî sò̌ akhû̌aǎ pě, dě a tè̤gè̌tò̤gò dǐdò bǎ sî ta kòyòphû̌mò̤nu tapwa̤ pě.

⁴ Dě pa yṳǎ Běcǎ akhû̌akhî, pa sî̌ya ta sî gûma̤ sělěpo̤ pwǐ pa mǎnǎ sî htǒonu hǒ.

⁵ Běcǎ sûcû̌ tû̌pû sî dě Cǒmara ta̤mo̤ǐ akû ta Khrî̌stu a ta̤khòsò̌do akû htǒonu pě nî̌꤮.

Ta̤ma̤ lò̤bǎkhû̌ ta bǎma̤ ta̤phî̌ta̤ma̤ aya

⁶ Pṳwè̤ Khrî̌stuphû̌ toǒ꤮, dě Běcǎ Ye̤shǔkhrî̌stu ami̤akû, pa mǎnǎ sî yo̤ ta, pṳwè̤ lǒ̤꤮ bò htě a cè̌klèlèbǒ a gûma̤kû̌kò pwǐ pa la̤kloma̤ dě pa ǐkè sî htǒonu tò̤ toǒnu cû̌ bǒsû̌ pûma̤ ta asî ma̤ nî̌꤮.

⁷ Sî sana̤ sî to gûkè̌mò̌mṳ ma̤kû̌ pa hî̌tènu sî sî̌ya te̤mǎhtotû̌ hǒ. Ma̤tè̤hî̌dě bǎ pa ǒplǒ ta sî akhanu, pa cè̌klèlèbǒ nǒtò̤.

⁸ Kò ma̤bòkè bǎ nǒ pa la̤ǎla̤o aya tò̤. Mî̌tanu, ma̤pûhǐ a htûhtò̌ pû ta̤bǐta̤glî ta sîya dǐpwǎ̤꤮ tò̤nu, pa jipwi̤ǎ jipwi̤wè̤ jòjî̌꤮ tò̤.

⁹ Pa dè kwima̤jè sî ta pa la̤ǎla̤o ta la̤ǒdo hî̌numî̌ a gwa pwǎ. Pwǎ̤tadě ma̤pûhǐ pa htûhtò̌ sî la̤kè̌mò̌mṳ dě sî gûma̤kû̌ pwǐ pa ma̤htǒo ayanu, pa bǎ goǎgowè̤ mè̤mè̤̌.

¹⁰ Bǎ pa ǒplǒ ta sî akhanu, pa sû̌ǐkè sî ta, “Kòyò htě a cè̌klè tû̌aya tapwa̤nu, kò tobǎ ǐǎyǎ dǐcǎ꤮ tò̤.”

¹¹ Pa cû̌hî̌tǒ̤ pwǐhè̌o ma̤tè̤hî̌numî̌, pa gana̤de ta dě sîklanu kòyò cè̌klè dě aǎawè̤ kû̌kò dǐcǎ꤮ tò̤nu aǒ toǒ. Dě a cû̌nṳ ma̤shû̌shǎbò kòhǔwa̤ a ta̤wi̤ta̤kè̌nu aǒ toǒ, pa gana̤de hǐnu.

¹² Dě Běcǎ Ye̤shǔkhrî̌stu akû, pa mǎnǎ payo̤ htǒonu ta kòyò cè̌klèlèbǒ htǒotoǒ aya. Ma̤pûhǐ asî ǒhtûpwa̤ te̤bǎte̤to kû̌kò, htohǒtò̤ a guǎguwè̤kû̌ lǒkho kò dě a bǔǎlò̤ lǒkho tûû̌ a ta̤htûpwa̤ ayanu, pa hî̌shû̌hî̌shokè asî hǒ.

¹³ Pwǎ̤tadě, pṳwè̤ Khrî̌stuphû̌ toǒ꤮, bǎ sî ma̤ ta̤wǒ akhanu, sò̌phlǒpî̌ pûma̤ lǒkho ma̤ nî̌꤮. Tûrû̌ ma̤ sělě lǒkho hǐnu nî̌꤮.

¹⁴ Kòyò tapwa̤pwa̤ dè jûle̤phî̌yo̤ kû̌kò lî̤ htě pa sûbǎ sî htǒotabǎ a ta̤sû̌ǐtòwòǐ tò̤ hî̌numî̌ kè̌nǎǐ yǎ nî̌꤮. Ma̤pûhǐ a sòwò̤lò̤tû̌ ana̤ pěnu dě, bǒsû̌ pûma̤ lǒkho yǎ ma̤ nî̌꤮.

¹⁵ Pwǎ̤ta sò̌khěkhû̌khwè pûma̤ yǎ ma̤ nî̌꤮, mî̌tanu ǐsè̌rè̌ yǎ pwǐ na ǐsè̌rè̌ na pṳwè̤ Khrî̌stuphû̌ tapwa̤nu pwǎ nî̌꤮.

Ta̤hî̌bǎ gutṳ̌lò̤

¹⁶ Ta̤gûjûkabǎ a Běcǎ ǐlò̤tû̌ sî ta̤gûjûkabǎ pṳ̂̌꤮ taplǎ ta klè̌ pṳ̂̌꤮ tabo akû nî̌꤮. Běcǎ ǒkû̌ tû̌ta sî pṳ̂̌꤮ tapwa̤ nî̌꤮.

¹⁷ He mî̌ Pò̌lu dě he khwè̌tû̌ ta̤hî̌mo̤hî̌wǒ htǒonu ta he cǔde. Lî̤ pṳ̂̌꤮ tabǎ htě he khwè̌hto dě agutṳnu, he khwè̌ ma̤dòǐkhǒkè tû̌ hǐnu. He khwè̌ ma̤dòǐkè hǐnu pṳ̂̌꤮ taplǎ.

¹⁸ Pa Běcǎ Ye̤shǔkhrî̌stu abwǐasîrî ǒkû̌ tû̌ta sî pṳ̂̌꤮ tapwa̤ nî̌꤮.